1 Reyes 11

Salomoon jatasacari taatujuri necocohua jeecojotesano pueyasohuacuara jacamajara

1Salomoon caminiu nuhuaji Faraoon niyatu, nojuajaari socua queraatia taatujuri paniquiaari. Naacuatej nojuajaari camiyoquiaari nio taucuacajinijiniojuhuaj: Moab, Amoon, Edom, Sidoon, Hititanio. 2Pueyasojuanaacuajaari Israel pueya tenujuquiaari tojetaarucuajanaa maja cuno taucuacajinijinio taatujuri nojori camiyonura. Pueyasoori naa Israel pueya tenujuquiaaritij, na niishishacari cuno taatujuriiri neyaca carteteriquiano Pueyasojuanaa cutara, saniniuujia jeecojosano casaacuara na jacamatunura. Camarnu Salomoon maniniuquiojonuucua cuno taatujuri, nojuajaari saaja cuno taatujuri camiyoquiaari. 3Naacuatej, camarnu Salomoonri seteciento na camiyosano niquiocohuaraca quijia. Cuno seteciento necocohuani, cunoori tamasaca jiyacajinijinio narta camarucua niquiohua quijia. Salomoonri socua tresciento nareja na rucuajeejosano taatujuri jiitiaja. Puetunu cuno necocohuajanaani, nojoriiri camarnu Salomoon cartetequiaari Pueyaso. 4Camarnu Salomoon saaquianoshishacari, necocohuari nojori nuhuaji na nitinitiuquiaari. Naacuatej, camarnu Salomoonri jeecojosano casaa secojojuara jataquiaari Pueyaso niti. Nojuajaari naa sesequiaaritij, maja tojetaarucuajanaa Pueyasoocua tiuujia na quiniuucua. Na shipininio David cutaraari seetanujuanaa Pueyasoocua tiuujia quijia cutara. 5Camarnu Salomoonri Pueyaso soosano Astartee jiyanishano secojojuara jataquiaari. Cunoori Sidoon jiyajinijinio taucuaca jiyatesano na pueyasora quijia. Sacuaraatia niquishano Milcoom jiyanishano secojojuara jataquiaarijaariuhuaj. Cunoori Amonita taucuaca pueyaso quijia. Puetunu cuno taucuaca pueyasohuajanaari nareja jeecojosano casaa quijia. 6Naa Pueyaso niquiara camarnu Salomoon miijionuucua sacuaraatiatej, cunoori maja maninia na quiniu quijia Pueyasora. Na shipininio David cutaraari Pueyaso tojijia quijia.

7Naa camarnu Salomoon sesenuucuatej, necocohua secojojuara Quemoos, Moloc tiatejoquiaariiri. Nojuajaari Jerusaleen tiaca taquijiria pananu muetasamajiria tuhuananuucua querajacocuara tiatejoquiaari. Cuno Quemoosri Moab taucuaca jiyatesano na pueyasora quijia. Saniniuujia Molocri Amonita taucuaca jiyatesano na pueyasora quijiajuhuaj. 8Taucuaca jiyatesano na pueyasora cuno jeecojosano casamini, cunoori tojetaarucuajanaa Pueyaso soosano quijia. Salomoonri naa miijioquiaari tamonu jiyacajinijinio puetunu necocohuarajanaa. Naacuatej, puetunu taatujuri necocohuajanaari shanohua jaanutaja catijiajonuujua jeecojosano na pueyasohuara. Naajuhuaj nojoriiri seya catijiajonuujua na pueyasora na jiyatetusano Molocra. 9Naacuatej, Pueyasoori Salomoon juaarii nocuaji na rupatenuucua. Pueyasojuanaacuajaari tarijia Salomooncua pacutejoquiaari muetanu na rootanura juucua taa na miiniutianiyani. 10Jiyacari Pueyaso muetasacari nocua, Pueyasojuanaari juucua maatia na rootanocuaja maja taucuaca pueyasohua jiyanishoosequeecuara jacamaja na quiniuria. Camarnu Salomoonri saaja rejetequiaari Pueyaso sequesano nojuaja. 11Naacuatej, Pueyasoori jiyacari naa sequeree Salomoontej:

—Naa sacuaraatia quia miijionuucuatej, majaari seetanujuanaa quiarano cua sequesano quia tojiniu quiriucuaa. Naajuhuaj, majaari quia tojishocoriquiano cua naajio quia tojiniu quiriucuaajuhuaj. Naacuatej janiyari quiarta pueya quia jiitiasano quia jaariutianutaniyani. Janiyari saniniuujia niquiriyatu quia seyajinijinio jiyatenutaniya camarnu na quiniuria quia nitini. 12Saniniuujia, quia shipininio Davidcua cua taraajenuucua, maja juhuari quia jiitiasano pueya cua jaariutianu quiniutianiya quia rishishacarijia. Janiya cutaraari quia niyanu na jaariutiariquianoni, nojuaja jaara quia niti camarnu quiri. 13Majaari puetunu na jiitiasano pueyajanaa cua jaariutianu quiniutianiyaquinioj. Janiyari nia supuetanaacuajinio niquiriyatu pueya maanurano caneno pueya curonutaniya nerani. Cunoori quia shipininio Davidcua cua taraajenuucua, cua saquiriojosano Jerusaleen tiacaacua cua taraajenuucuajuhuaj.

Camarnura Roboam jiyatesaanu na que Salomoon shaajesacari

43Jiyacaritij, camarnu Salomoon jaara shaajequiaari, na shipininio David Jerusaleen tiacajinia jamosaaquiaariiri. Neyanu Roboamri saniniuujia na que niti camarnu quiquiaari.

Currently Selected:

1 Reyes 11: arl

Highlight

Copy

Compare