Gálatas 4

1Kamb'i'ij k'u wa' che alaq: Echiri' k'a ch'uti'n ruk'ajol juna b'eyom, e junam ruk' pacha' juna aj chak pa ja. Tob' ne e rire ri rajaw ronoje ri b'eyomalil, pero wa' k'amaja' kak'oji' puq'ab' 2ma k'a k'o pakiq'ab' ri e chajal re y ri kakichakuj rub'itaq re, kopon na ruq'ijol b'i'tal kan ruma ruqaw echiri' kel chuxe' ri taqanik ke rike. 3Jek'ula' qak'ulumam ri'oj ojertan, e pacha' oj ak'alab' k'a oj k'o puq'ab' ri taqanik kojotal che ruwachulew. 4No'j echiri' xopon ruq'ijol cha'tal chi lo ruma ri Dios, Rire xutaq lo Ruk'ajol, ri xalax ruma jun ixoq y xalax chuxe' ri taqanik re ri Tzij Pixab' tz'ib'ital kan ruma ri Moisés. 5Rire xk'unik cha' kojukolob'ej ri oj k'o chuxe' wa taqanik, y jek'ula' koju'ana oj ralk'o'al ri Dios. 6E uwari'che, ruma oj chi ralk'o'al ri Dios, Rire xutaq lo ri Ruxlab'ixel Ruk'ajol chupa ri qanima'; y ruma k'u ri Ruxlab'ixel, utz kaqab'i'ij che ri Dios: «¡Tat, Lal Nuqaw!» kojcha'. 7E uwari'che na lal ta chi pacha' jun aj chak k'o puq'ab' juna patrón, ma wo'ora lal ralk'o'al ri Dios. Y ruma lal ralk'o'al, Rire kuya na che'la janipa ri ub'i'tisim chike ri ralk'o'al.

Pixab'anik chike ri ketzelej tanchi chuxe' ri taqanik na re ta ri Dios

8Paqatzij wi, rojertan echiri' na eta'am ta alaq uwach ri Dios, ralaq e keloq'nimaj alaq taq ri tiox, ri lik kewi na e ta dios. 9Ek'u wo'ora eta'am chi alaq uwach ri Dios, o ri más jusuk' ub'i'xikil e “ralaq eta'matal chi wach alaq ruma ri Dios”. ¿Sa' k'u ub'e ri' kaya tanchi ib' alaq chuxe' taq ri taqanik na il ta uwach y na jinta uchak? 10Ma lik kaloq'nimaj alaq taq ri nimaq'ij re ri jujun q'ij, ri jujun ik', ri jujun junab' yey ruq'ijol ri jachb'al upa taq ri junab'. 11Lik kub'isoj nuk'u'x ma k'axtaj ri chak nu'anom chixo'l alaq na jinta kutiqoj.

12Hermanos, lik kantz'onoj che alaq 'ana e alaq jela' pacha' ri nu'anom ri'in, ma ri'in jela' xin'ano pacha' ralaq.#4:12 Ri Pablo echiri' xukoj rub'i' ri Cristo, na xutaqej ta chi ri kojob'al ke raj judi'ab'. Yey echiri' rire xopon kuk' ri e k'o Galacia, rike na kakitaqej ta ri kojob'al ke raj judi'ab', ma na e ta aj judi'ab'. Pero xeb'opon jujun k'utunel e petinaq Judea y xkik'ut chike chirajawaxik kakikoj ri kojob'al ke raj judi'ab'; y jek'ula' ri e k'o Galacia xkijeq kakitaqej wa'. Yey echiri' xink'oji' uk' alaq na jinta juna k'ax x'an alaq chwe. 13Ma eta'am chi alaq, echiri' xintzijoj ri Utzilaj Tzij che alaq ri nab'e laj, xinkanaj kan uk' alaq ruma jun yab'il in k'o wi. 14Yey na tzel ta xinil alaq, na xk'aq tane b'i alaq nuq'ij tob' e la' k'o wa yab'il chwe. Ma ri x'an alaq e xink'ul alaq, x'an alaq chwe pacha' in jun ángel re ri Dios, pacha' chi e xk'ul alaq ri Qanimajawal Jesucristo. 15¿Pa k'u xkanaj kan wi ri' ri ki'kotemal k'o uk' alaq echiri' xinopon chila'? Ma ri xinwil che alaq e kaya ne anima' alaq kesaj ri wach ralaq cha' kaya alaq chwe ri'in. 16¿Ruma kami ximb'i'ij ri lik qatzij che alaq, e tzel kinil wi alaq ri' wo'ora?

17Taq la' la tikawex lik chakojo' lik k'ax kakina' alaq tob' na e ta kakitzukuj ri utz che alaq, ma ri kakaj rike e na kojtaqej ta chi alaq cha' xew e ketaqej alaq rike. 18Paqatzij wi lik utz we ralaq ketaqej alaq jujun chik, xew tane we rike e kakitzukuj ri lik utz che ralaq. Jek'ula' kuaj ka'an ralaq wuk' ri'in y na xew ta echiri' in k'o uk' alaq.

19Ralaq pacha' alaq walk'o'al, ri'in kantij tanchi k'ax uma ralaq jela' pacha' juna ixoq echiri' kutzir uwach. Y kantij k'u wa k'ax k'a echiri' ri b'inik silab'ik alaq ku'ana pacha' ri re ri Cristo. 20Lik ne kuaj ta e la' in k'o chila' uk' alaq wo'ora yey na lik ta k'ax kinch'aw pawi' alaq, ma lik uchapom wanima' ri 'anom alaq.

Ri k'amb'al na'oj chwi rixoq Agar y rixoq Sara

21Ralaq ri ka'aj alaq kak'oji' alaq chuxe' ri taqanik ke raj judi'ab', kantz'onoj che alaq: ¿Na tom ta neb'a alaq ri ub'i'im kan ri Moisés chupa ri Tzij Pixab'? 22Ma tz'ib'ital kanoq ri Abraham xek'oji' ka'ib' uk'ajol. Jun chike xalax ruk' rixoq aj chak pa ja; ri jun chik uk'ajol xalax ruk' ri rixoqil.#Gn. 16:15; 21:1-3 23E ruk'ajol xalax ruk' rixoq aj chak pa ja, xalaxik xa ruma kino'jib'al rike; no'j ruk'ajol xalax ruk' ri rixoqil, e ub'i'tisim ri' ri Dios che ri Abraham. 24Ek'u wa' e jun k'amb'al na'oj. Ri keb' ixoqib' e ke'elawi keb' tzij; jun e ri petinaq che ri juyub' Sinaí pa xuya wi ri Dios ri taqanik re ri Tzij Pixab'. Wa' wi'xoq e Agar, yey ri e ralk'o'al rire e ri kakiya kib' chuxe' ri taqanik ke raj judi'ab'. 25Ek'u ri Agar e kajunimax ruk' ri juyub' Sinaí k'o chila' pa ri luwar re Arabia; yey waq'ij ora wa' e ri e aj Jerusalem, ma wa' wa tinamit e k'o chuxe' taq ri taqanik ke raj judi'ab'. 26No'j ri “Jerusalem” re chila' chikaj elinaq chi chuxe' ri taqanik ke raj judi'ab' yey ri'oj oj ralk'o'al wa' wa tinamit. 27Ma jewa' tz'ib'ital kan pa Ruch'a'tem ri Dios:

¡Chatki'kot ri'at ixoq ri na katalan taj, ri na jinta awalk'o'al!

¡Chatsik'in ruma raki'kotemal, ri'at ri na at ik'owinaq ta pa ri k'ax re juna ixoq echiri' kutzir uwach!

Ma ri e ralk'o'al rixoq xoq'otax kanoq, más kek'iyar chikiwach ri e ralk'o'al rixoq k'o rachijil Is. 54:1

kacha'.

28Hermanos, ri'oj oj jela' pacha' ri Isaac, ma oj saqil ralk'o'al ri Dios ruma ri b'i'tisinik xu'an Rire. 29Yey pacha' ri xu'an rojertan, ri xalax xa ruma rurayib'al rachi e xuternab'ej ruk' k'ax ri xalax e chirij ri xraj ri Ruxlab'ixel ri Dios; jek'ula' u'anom wo'ora. 30Pero ¿sa' ri kub'i'ij Ruch'a'tem ri Dios tz'ib'ital kanoq? Jewa' kub'i'ij:

E chesaj b'i la rixoq aj chak pa ja junam ruk' ri ralab'. Ma che ri ralab' wi'xoq na kaya'i' ta ri taqal che kuk'ul ri ralab' ri rixoqil ri rajaw ja Gn. 21:10

kacha'. 31E uwari'che hermanos, ri'oj na oj ta ralk'o'al rixoq aj chak pa ja, ma oj ralk'o'al ri rixoqil ri rajaw ja.

Currently Selected:

Gálatas 4: acrN

Highlight

Copy

Compare