Gálatas 5

Ri Cristo ojresam chi chuxe' ri taqanik ke raj judi'ab'

1E chuq'ub'ej ib' alaq che ri kolob'etajik xya'i' chiqe ruma ri Cristo echiri' xojresaj lo chuxe' ri taqanik ke raj judi'ab'; maya tanchi k'u ib' alaq chuxe' ruk'ayewal wa' wa taqanik. 2Chinta na pe alaq. Ri'in Pablo, kamb'i'ij che alaq: We kaya ib' alaq che ukojik ri retalil re circuncisión cha' kak'oji' alaq jusuk' chwach ri Dios, ri' na jinta uchak ri Cristo che alaq. 3Kuaj kamb'i'ij tanchi wa': We juna achi kukoj ri retalil re circuncisión,#5:3 Wa' e kach'a't pakiwi ri na e ta aj judi'ab', ri xkikoj ri retalil re circuncisión ma e xkich'ob'o ruk' wa' kakiriq ri kolob'etajik. ri' chirajawaxik che e ku'an ronoje ri taqanik ke raj judi'ab'. 4Ek'u ralaq, ri kach'ob' alaq e ku'an alaq jusuk' chwach ri Dios ruma ri kataqej alaq wa taqanik, ri' che ri Cristo xesaj wi ib' alaq y e xya kan alaq ri unimal rutzil uk'u'x ri Dios. 5No'j ri'oj, ruma ri Ruxlab'ixel ri Dios pa qanima', qoye'em ri q'ij echiri' ri Dios kojuk'ulu ma oj chi jusuk' chwach ruma ri kub'ulib'al qak'u'x ruk' ri Cristo. 6Yey we oj re ri Qanimajawal Jesucristo, na jinta chi ke'elawi we kaqakoj ri retalil re circuncisión o we na kaqakoj taj. Ma ri lik chirajawaxik e ri kub'ulib'al qak'u'x ruk' ri Cristo, yey wa' e kaqak'ut ruma ri rutzil qak'u'x.

7Ri b'inik silab'ik alaq ruk' ri Cristo xjeq lo alaq chi utz. ¿China xq'aten e alaq cha' na kab'in ta chi alaq chupa ri Q'ijsaq? 8Ri Dios, ri xusik'ij alaq, na e ta xuk'ut wa' che alaq. 9Masach chik'u'x alaq wa': «Echiri' ke'ek jub'iq' levadura chupa ri q'or re pam, wa' kusipowirisaj upa ronoje.» Wa' e ke'eloq: E junoq na saqil ta runa'oj, kusachisaj ri kina'oj ri jujun chik. 10Ruma k'u qaya'om qib' ralaq y ri'in puq'ab' ri Cristo, e lik kub'ul nuk'u'x na jinta juna chik na'oj alaq puwi wa' chwa ri kanch'ob' ri'in. Yey we k'o junoq kusachisaj na'oj alaq, k'o chi ri' ri q'atb'al tzij re ri Dios puwi', xa tob' chinoq.

11Ek'u ri'in hermanos, we ta e la' kamb'i'ij chirajawaxik kakoj ri retalil re circuncisión che junoq cha' kakolob'etajik, ri' raj judi'ab' na kech'o'jin ta chi wuk' y na tzel tane kakita ri tzijonik kan'an puwi rukamik ri Qanimajawal Jesucristo chwa ri cruz. No'j na je ta la' u'anom. 12Ek'u chike ri kakisachisaj na'oj alaq, ¡ta ne asu kiq'ata b'i ri kulewal!

13Ma ralaq hermanos, xsik'ix alaq cha' na kak'oji' ta alaq chuxe' ri taqanik ke raj judi'ab'; xew k'u matz'ila' ri b'inik silab'ik alaq ruk' taq ri rayib'al re ri ti'jil alaq. E nimaj ib' alaq chiwach alaq ruk' rutzil k'u'xaj. 14Ma ronoje ri taqanik re ri Moisés katz'aqat uwach ruk' wa ch'a'tem: «K'ax chana'a rawatz-achaq' jela' pacha' ri k'ax kana' awib' ri'at»#Lv. 19:18 kacha'. 15No'j we ralaq kapurij ib' alaq y katij ne ib' alaq chiwach alaq, chajij k'u ib' alaq ri' ma k'axtaj asu kasach ne wach alaq chiwach alaq.

Taq ri rayib'al na utz ta uwach ke ri tikawex

16Kamb'i'ij k'u wa' che alaq: E taqej alaq janipa ri karaj ri Ruxlab'ixel ri Dios che alaq cha' jela' na kaya ta ib' alaq che taq ri rayib'al re ri ti'jil alaq. 17Ma e rurayib'al ri ti'jil alaq na kuk'ulaj ta rib' ruk' ri karaj ri Ruxlab'ixel ri Dios, yey e ri Ruxlab'ixel ri Dios na kuk'ulaj ta rib' ruk' rurayib'al ri ti'jil alaq. Kikab'ichal k'u ri' kech'o'jin chikiwach; ruma k'u la', ri ti'jil alaq kuq'atej ri utz ka'aj alaq ka'an alaq. 18No'j we e ri Ruxlab'ixel ri Dios ri kak'amaw wach alaq, ri' na jinta alaq chuxe' ri taqanik re ri Tzij Pixab'.#5:18 Wa' na e ta ke'elawi utz kojmakunik. E ke'elawi ri Ruxlab'ixel ri Dios kojuto'o cha' kaqa'an ronoje ri karaj ri Dios. Ro. 6:15

19Lik kaq'alajin uwach taq ri na utz taj kaki'an ri winaq ri kakitaqej taq ri rayib'al re ri kiti'jil. Rike e kemakun chirij ri k'ulanikil, kaketz'ab'ej uwa kiq'ij kuk' jujun chik na kik'ulel taj, kaki'an ri ch'ulilaj mak y kakimaj uwach taq ri rayib'al re ri kiti'jil, 20kakiloq'nimaj uq'ij tiox, kaki'an itz, tzel kekil jujun chik, e aj ch'a'oj, k'ax kik'u'x chikij jujun chik; e aj oyowal, e aj chapanel che ch'a'oj, e aj jachal kipa jujun chik, e aj k'utunel re taq na'oj na utz taj#5:20 “E aj k'utunel re taq na'oj na utz taj”: Pa ri ch'a'tem griego wa' también ke'elawi “ri xew kakimol kib' kuk' ri junam kina'oj kuk' rike”. 21tzel kakil jun chik ruma kakirayij ri k'o ruk', e kamisanel, e q'ab'a'relab', kakimol kib' re kaki'an ch'ulilaj mak y kaki'an jujun chik mak pacha' taq wa'. Kamb'i'ij k'u jumul chik che alaq: Konoje wa' na jinta ke kuk' ri ya'tal chike keb'ok pa rutaqanik ri Dios.

Ri kib'inik kisilab'ik ri kitaqem janipa ri karaj ri Ruxlab'ixel ri Dios

22No'j rujiq'ob'alil ri Ruxlab'ixel ri Dios ruk' junoq e wa': pa ranima' k'o rutzil k'u'xaj, k'o ki'kotemal y k'o utzil chomal; k'o unimal uk'u'x, utz uk'u'x, k'o relej uk'u'x; ri jujun chik kakub'i' kik'u'x ruk', ma janipa ri kub'i'ij, e ku'ana'; 23na ku'an ta nim che rib' y kuch'ij uchuq'ab' taq ri rayib'al re ruti'jil. We jek'uri'la' u'anom junoq, na kajawax tane ri' k'o junoq kapixab'an re cha' ku'an ri utz. 24Janipa ri e re ri Qanimajawal Jesucristo, na kakitaqej ta chi#5:24 “Na kakitaqej ta chi”: Pa ri ch'a'tem griego kub'i'ij “kikamisam chwa cruz”. ri rayib'al re ri kiti'jil. 25We ri Ruxlab'ixel ri Dios uya'om ri k'ak' qak'aslemal, qaya'a k'u ri qab'inik qasilab'ik puq'ab' Rire. 26Maqatzukuj ri yakb'al qaq'ij, maqapetisaj qoyowal chiqawach y matzel meqil jujun chik ruma kaqarayij ri k'o kuk'.

Currently Selected:

Gálatas 5: acrN

Highlight

Copy

Compare