Gálatas 3

Kaqak'ul ri Ruxlab'ixel ri Dios ruma xqakoj ri Utzilaj Tzij

1¡Toq'o' wach alaq aj Galacia! Lik ko 'anom che ri k'u'x alaq. ¿China xsokoso'n e alaq cha' na kakoj ta chi alaq ri Q'ijsaq? Ma lik xq'alajisax chiwach alaq sa' ke'elawi rukamik ri Qanimajawal Jesucristo chwa ri cruz. 2B'i'ij alaq wa' chwe: ¿Xk'ul alaq ri Ruxlab'ixel ri Dios ruma xtaqej alaq ri taqanik ke raj judi'ab' o ruma xta alaq ri Utzilaj Tzij y xkub'i' k'u'x alaq che? 3¿Su'chak lik 'anom ko che ri k'u'x alaq? Ma ri b'inik silab'ik alaq chwach ri Dios xjeq lo alaq ruma ruchuq'ab' ri Ruxlab'ixel ri Dios, yey wo'ora ¿ka'aj kami alaq ri' kak'isb'ej alaq wa' xa ruk' ri chuq'ab' ralaq? 4¿Na jinta kami utiqom ri' che alaq janipa taq ri k'ulum alaq ruma ri Ruxlab'ixel ri Dios? Na kankoj ta k'ana ri'in we wa' na jinta utiqom che alaq. 5Ma echiri' ri Dios kuya ri Ruxlab'ixel che alaq y ruk' ruchuq'ab' ku'an nimaq taq milagros chixo'l alaq, ¿su'anik ku'ano? ¿E nawi ruma taqem alaq ri taqanik ke raj judi'ab' o e ruma xta alaq ri Utzilaj Tzij y xkub'i' k'u'x alaq che?

Ri kub'ulib'al uk'u'x ri Abraham ruk' ri Dios

6Ri Abraham xkub'i' uk'u'x ruk' ri Dios#3:6 Ri Abraham xukojo ri Dios e ku'ana janipa ri xub'i'tisij che. Gn. 15:6 y ruma k'u ri' x'ani' jusuk' che. 7E uwari'che, chirajawaxik keta'maj alaq wa': E janipa ri lik kub'ul kik'u'x ruk' ri Dios, ri' e ralk'o'al kan ri Abraham. 8Ruch'a'tem ri Dios xex chi ub'i'im wi lo pakiwi ri na e ta aj Israel, we rike kakub'i' kik'u'x ruk' ri Dios, keb'u'an jusuk'. Ma jewa' ri utzilaj tzij xb'i'x lo ojertan che ri Abraham:

Awuma ri'at, ri Dios keb'u'an bendecir konoje taq ri tinamit che ruwachulew. Gn. 12:3

9Jek'uri'la', konoje ri kakub'i' kik'u'x ruk' ri Dios kakik'ul na ri utz kape ruk' Rire, jela' pacha' ri xuk'ul ri Abraham ruma xkub'i' uk'u'x ruk'.

10Konoje ri kikub'am kik'u'x kekolob'etaj xa ruma kakitaqej u'anik ri tzij pixab', ri' e k'o chi chuxe' ri q'atb'al tzij re ri Dios, ma jewa' tz'ib'italik:

China k'u ri na ku'an ta janipa ri taqanik

tz'ib'ital kan chupa ri Tzij Pixab',

ri' k'o chi chuxe' ri q'atb'al tzij re ri Dios Dt. 27:26

kacha'. 11Kaq'alajin k'u ri', na jinta junoq ku'an jusuk' che rib' chwach ri Dios ruma kutaqej ri Tzij Pixab', ma jewa' tz'ib'italik:

Ri e jusuk' chwach ri Dios,

k'o kik'aslemal ruma ri kub'ulib'al kik'u'x ruk' Rire Hab. 2:4

kacha'.

12E junoq kuch'ob' raqan kakolob'etaj ruma kutaqej ronoje ri Tzij Pixab', ri' na kub'ul ta uk'u'x kakolob'etaj ruma ri kub'ulib'al uk'u'x ruk' ri Cristo. Yey jenewa' kub'i'ij Ruch'a'tem ri Dios:

China ri ka'anaw re ronoje ri kub'i'ij ri Tzij Pixab',#3:12 Xew ri Qanimajawal Jesucristo xch'ijow u'anikil ronoje Rutzij Upixab' ri Dios.

ri' k'o uk'aslemal chwach ri Dios ruma ku'an wa' Lv. 18:5

kacha'.

13Ri Cristo xojresaj chuxe' ri q'atb'al tzij k'o paqawi' ruma xqapalajij Rutzij Upixab' ri Dios; xu'an k'u wa' echiri' xuya rib' paqak'axel ri oj aj mak, ma jewa' ri tz'ib'ital kan pa Ruch'a'tem ri Dios:

Chwach ri Dios, itzel uwach junoq katzayab'ax chwa juna che'.#3:13 Wa' e x'an ojertan echiri' kaq'at tzij puwi juna aj mak, kakamisaxik y katzayab'ax chwa juna che'. Dt. 21:23

14E xu'an wa' ri Qanimajawal Jesucristo cha' ri rutzil uk'u'x ri Dios, ri xb'i'tisix che ri Abraham, kaya'taj na pakiwi ri na e ta aj Israel ruma ri Cristo; y jek'ula' ruma ri kub'ulib'al qak'u'x, qonoje kaqak'ul ri Ruxlab'ixel ri Dios b'i'tisim chi uloq.

15Hermanos, ri u'anom ri Dios kanjunimaj ruk' ri kaki'an ri tikawex cha' kamaj alaq usuk': Echiri' keb' achijab' kaki'an juna tzij chikiwach y kakijikib'a' uwach, lik na utz ta k'u ri' we jun chike kutzelej uch'a'tem che ri ub'i'im chik o kukoj uwi' ri kijikib'am chik. 16Ek'u ri Dios xuya rub'i'tisinik che ri Abraham y che kan ri Jun ralk'o'al. Rutzij Upixab' ri Dios na jetawa' kub'i'ij «chike kan rawalk'o'al», pacha' e uk'iyal tikawex, ma jewa' kub'i'ij «che kan ri Jun awalk'o'al»; wa' ke'elawi e ri Cristo.#Gn. 12:7 17Wa kintajin che ub'i'xik e wa': Ri Dios xu'an jun tzij ruk' ri Abraham. Xik'ow na k'u cuatrocientos treinta junab' k'a echiri' ri Moisés xutz'ib'aj kan ri taqanik re ri Tzij Pixab'. Ek'u wa taqanik na utz taj kuyoj wa nab'e tzij y na kuyoj tane ri xub'i'tisij lo ri Dios. 18Ma we ta kaqak'ul rub'i'tisim ri Dios ruma kaqataqej ri Tzij Pixab', ri' na e ta ruma ri b'i'tisinik xu'an ri Dios; no'j ri xusipaj ri Dios che ri Abraham e ruma ri b'i'tisinik u'anom chi che.

Ruchak ri Tzij Pixab' tz'ib'ital kan ruma ri Moisés

19¿Sa' k'u ruchak ri' ri Tzij Pixab' tz'ib'ital kan ruma ri Moisés? E cha' kuq'alajisaj chike ri tikawex sa' taq ri kimak chwach ri Dios. Y jela' u'anom loq k'a che ruk'unib'al ri Jun Alk'o'al b'i'tisim loq, wa' e ri Cristo; ma che Rire x'an wi wa' wa b'i'tisinik. Ri Tzij Pixab' xtzijox kuma ri ángeles che ri Moisés cha' rire kuq'atisaj chikiwach ri tinamit; 20no'j ri Dios echiri' xu'an rub'i'tisinik che ri Abraham, na jinta junoq xq'atisan ri tzij chikiwach, ma e Rire xuq'atisaj rutzij che ri Abraham y na xajawax ta k'u junoq chik. 21E uwari'che, echiri' ri Dios xuya Rutzij Upixab' che ri Moisés, ¿e nawi xujalk'atij ri b'i'tisinik u'anom chi che ri Abraham? Na e taj. Ma we ta e ri', e ri Tzij Pixab' kaya'w ri qak'aslemal chwach ri Dios, y koju'an k'u jusuk' ri' ruma ri kaqataqej ri tz'ib'ital kanoq. No'j na e ta u'anom ri'. 22Ma chupa ri Tzij Pixab' tz'ib'ital kanoq, kaq'alajinik qonoje ri oj tikawex oj k'o puq'ab' ri mak; e uwari'che lik kajawax ri b'i'tisinik u'anom lo ri Dios chike ri kakub'i' kik'u'x ruk' ri Qanimajawal Jesucristo.

23Echiri' k'amaja' kak'un ri Jun kakub'i' qak'u'x ruk', e ri Tzij Pixab' xojuchajij y xuk'am lo qawach cha' kakub'i' qak'u'x ruk' ri Cristo echiri' kopon ruq'ijol kaq'alajisax ri Utzilaj Tzij chiqawach. 24Ek'u ke'elawi, ri Tzij Pixab' tz'ib'ital kan ruma ri Moisés xojuchajij y xuk'ut chiqe ri kajawaxik kaqamajo, pacha' chi oj ak'alab'; xuq'alajisaj k'u pan ruk'unib'al ri Cristo cha' ruma ri kub'ulib'al qak'u'x ruk' Rire, ri Dios ku'an jusuk' chiqe. 25Ek'u wo'ora kub'ul chi qak'u'x ruk' ri Cristo, jek'ula' na oj jinta chi chuxe' ri Tzij Pixab' ri xuk'am lo qawach ojertan. 26Ma onoje ralaq alaq chi ralk'o'al ri Dios ruma ri kub'ulib'al k'u'x alaq ruk' ri Qanimajawal Jesucristo. 27Onoje k'u ralaq ri xk'ul alaq ri bautismo chupa rub'i' ri Jesús, wo'ora alaq chi re ri Cristo y kak'ut k'u alaq wa' ruk' ri b'inik silab'ik alaq. 28Xa jun 'anom alaq chwach ri Dios, tob' jujun che alaq e kuk'il raj judi'ab' o na e ta kuk'il, tob' ne jujun che alaq e aj chakib' eloq'otalik#3:28 “E aj chakib' eloq'otalik”: Kil “esclavo” pa vocabulario. yey jujun chik kechakun pa ke rike, tob' achi o ixoq; ma onoje ralaq, xa jun 'anom alaq ruma alaq k'o puq'ab' ri Qanimajawal Jesucristo. 29Yey we alaq re ri Cristo, ri' alaq ralk'o'al ri Abraham yey kak'ul k'u alaq ri sipanik ub'i'tisim lo ri Dios.

Currently Selected:

Gálatas 3: acrN

Highlight

Copy

Compare