2 Corintios 5

Ri qocho k'o chila' chikaj

1Qeta'am k'ut ri qacuerpo wara che ruwachulew e jela' pacha' juna rancho na jinta ukowil oj jeqel chupa. Yey echiri' kasach uwach ri qacuerpo, kaya'taj jun qocho chila' chikaj na jinta utaqexik rukowil, ma na uq'ab' ta achi 'anayom re, e ri Dios 'anayom re. 2Y ruma la' koj-jilow wo'ora, ma lik kaqaj chik kojq'ax chupa ri qocho chila' chikaj. 3Ma echiri' kojq'ax chupa wa', lik kojch'uqutaj chi utz.#5:3 “Kojch'uqutaj chi utz”: Pa ri ch'a'tem griego kub'i'ij “na oj ta ch'analik”. 4Ruma k'u la', ri oj jeqel chupa ri “qarancho” wara che ruwachulew, koj-jilowik y kab'ison qak'u'x; ma na kaqaj taj kaqaya kan ri qacuerpo e la' xa jela'; ri kaqaj e kaqak'ul ri qacuerpo chila' chikaj y jela' kajalk'atix uwach ri na kakowin taj ruk' ri na kakam taj. 5Yey wa' e uch'ob'om chi lo ri Dios chiqe; y e Rire ya'yom ri Ruxlab'ixel chiqe, k'utub'al re kuya na janipa ri ub'i'tisim. 6Ruma k'u la', lik kub'ul qak'u'x, tob' qeta'am echiri' k'a oj jeqel pa ri qacuerpo wara che ruwachulew, wa' e ke'elawi k'amaja' koje'jeqela pa ri qocho chila' chikaj ruk' ri Qanimajawal Jesucristo. 7Ronoje k'u ri kaqa'ano e ruma ri kub'ulib'al qak'u'x ruk' Rire, na e ta ruma ri kaqil ruk' ri qawach. 8Lik kub'ul k'u qak'u'x ruk' Rire. Yey e ne lik kaqaj chik kaqaya kan wa qacuerpo cha' jela' koje'jeqela chila' ruk' ri Qanimajawal.

Chiqawach apanoq kaq'alajin janipa ri qa'anom

9Ruma k'u la', e kaqaya qib' che u'anik janipa ri karaj ri Qanimajawal, cha' jela' kaki'kot Rire quk' tob' k'a oj k'o wara che ruwachulew o echiri' oj k'o chi ruk' chila' chikaj. 10Ma kopon na ri q'ij echiri' qonoje koje'tak'ala chwach ri q'atb'al tzij re ri Cristo, pa kaq'alajin wi we ri qa'anom wara che ruwachulew k'o uchak o na jinta uchak, y kaya'taj k'u chiqe chiqajujunal ri tojb'al re ri qa'anom.

Ri Pablo keb'upixab'aj ri tikawex cha' kek'oji' chi utzil chomal chwach ri Dios

11Lik qeta'am k'ut, chirajawaxik k'o qaxi'in ib' chwach ri Qajawal; ruma k'u ri', keqapixab'aj taq ri tikawex cha' kakiya kib' puq'ab' ri Dios. Chwach ri Dios lik q'alaj sa' ri k'o pa qanima'; ek'u kaqaj ri'oj e kaq'alajin wa' chiwach ralaq. 12Na kaqab'i'ij ta wa' che alaq re yakb'al qaq'ij. Ma e kaqaj kaqato' alaq che reta'maxik sa' ri kaqa'ano cha' jela' lik kaki'kot alaq chiqe. Jek'ula' k'o kak'ulub'ej wi alaq uwach chike ri xew keb'ok il che taq ri kilitajik pero na keb'ok ta il che ri k'o pa ranima' junoq. 13Ma we pacha' chi oj ch'u'jerinaq, wa' e ruma lik qaya'om qib' che ruchak ri Dios. Yey we lik kaqach'ob' chi utz sa' ri kaqa'ano, wa' e to'b'al e alaq. 14Ri rutzil uk'u'x ri Cristo kataqan pa qanima' ma lik qeta'am echiri' xkam Rire pakik'axel konoje, e ke'eloq xekam konoje ruk'. 15Xkam k'u ri Cristo pakik'axel konoje ri tikawex cha' e janipa ri e k'as ruma rukamik Rire na kaki'an ta chi sa' ri kakaj rike, ma e kaki'an janipa ri karaj ri Jun ri pakik'axel rike xkamik y xk'astaj lo chikixo'l ri ekaminaq.

16Wo'ora ri kaqach'ob' puwi junoq, na e ta ruma ri kaqil che, pacha' ri kaki'an ri tikawex re ruwachulew. Tob' ne ojertan jela' xqach'ob' lo ri'oj puwi ri Cristo, pero wo'ora na kaqa'an ta chi wa' ma xqeta'maj uwach chi utz. 17Jek'ula' we junoq uya'om rib' puq'ab' ri Cristo, e jun k'ak' tikawex. Junwi karil ronoje, ma ri re ojertan xkanaj kanoq y ronoje u'anom k'ak' ruk'. 18Ronoje wa' ruk' ri Dios petinaq wi, ma xojuya chi utzil chomal chwach Rire ruma ri xu'an ri Cristo y xuya k'u chiqe keqato' ri tikawex cha' kek'oji' chi utzil chomal chwach. 19Wa' e ke'elawi ruma rukamik ri Cristo, ri Dios kuya chike ri tikawex kek'oji' chi utzil chomal chwach Rire ma kukuy ri kimak. Y xuya k'u chiqe ri'oj rub'i'xikil chikiwach ri tikawex wa tzij re ri utzil chomal. 20E uwari'che oj taqom lo ruma ri Cristo. Ma quma ri'oj ri Dios lik kelaj chike ri tikawex cha' keqib' ruk'. Kojelaj k'u pa rub'i' ri Cristo, jewa' kaqab'i'ij: «Yijb'a' ib' alaq chwach ri Dios cha' kak'oji' alaq chi utzil chomal chwach.» 21Tob' ri Cristo na jinta k'ana mak xu'ano, na ruk' ta k'u ri', quma ri'oj ri Dios xu'an che xreqaj ronoje ri qamak cha' jela' koju'an jusuk' chwach ri Dios ruma xa oj jun ruk' Rire.

Currently Selected:

2 Corintios 5: acrN

Highlight

Copy

Compare