2 Corintios 6
6
1E uwari'che ri'oj, ri oj aj chak re ri Dios, lik kaqapixab'aj alaq: Ma'an alaq ri pacha' na il ta uwach ri unimal rutzil uk'u'x ri Dios uk'utum chiwach alaq. 2Ma jewa' ub'i'im kan ri Dios pa Ruch'a'tem:
Chupa ruq'ijol echiri' xajawax to'b'al awe, xatinto'o;
Chupa ri q'ij re kolob'etajik, xatinkolob'ej Is. 49:8
kacha ri Dios.
Kamb'i'ij k'u che alaq: E uq'ijol wa' echiri' ri Dios kub'i'tisij ruto'b'al; wo'ora e q'ij re kolob'etajik chike ri tikawex.
Ri qab'inik qasilab'ik ri oj aj chak re ri Dios
3Kaqachajij k'u qib' chi utz che ri kaqa'ano cha' na oj ta latz'anel chike jujun chik y jela' na jinta junoq kak'aqaw b'i uq'ij ruchak ri Dios kaqa'ano. 4Ruk' ronoje ri kaqa'ano e kaqak'utu oj aj chak re ri Dios. Kaqakuy k'u ronoje ruk' unimal qak'u'x, tob' oj k'o pa k'ax, pa nib'a'il o pa b'is; 5tob' kab'alak'ux qapa o kojk'am b'i pa cárcel, tob' kakiyak kib' ruk'iyal winaq chiqij; tob' kaqatij k'axlaj chak, kaqakuy waram o kaqatij numik.
6Yey kaqak'utu oj aj chak re ri Dios ma chom ri qab'inik, k'o runa'oj ri Dios quk', k'o unimal qak'u'x y k'axna'b'al qak'u'x, k'o ri Santowilaj Ruxlab'ixel ri Dios quk' y k'ax keqana' konoje ruk' ronoje qak'u'x.
7Kaq'alajinik oj aj chak re ri Dios ma kaqatzijoj ri saqil k'utunik, k'o ruchuq'ab' ri Dios quk' y kaqa'an ri lik usuk' y jek'ula' kaqach'ij kichuq'ab' konoje ri keyaktaj chiqij.#Ef. 6:16-17
8Qak'ulum yakb'al qaq'ij y k'aqib'al b'i qaq'ij; e k'o ri chom kech'a't chiqij y e k'o ri tzel kech'a't chiqij. Kab'i'x chiqe oj aj raq'ul, tob' na jinta raq'ub'al kaqa'ano. 9Tob' e k'i keta'am oj aj chak re ri Dios; na ruk' ta k'u ri', e k'o jujun kaki'an pacha' na keta'am ta wa'. Xtewun ne ri kamik paqawi'; na ruk' ta k'u ri', k'a oj k'aslik. Tob' lik xojya' pa k'ax, pero na oj kaminaq taj. 10K'o q'ij oj ya'om pa b'is; na ruk' ta k'u ri', xaqi kojki'kotik. Na oj ta b'eyom; na ruk' ta k'u ri', qaya'om rub'eyomalil ri Dios chike uk'iyal tikawex. Wara che ruwachulew na jinta k'o quk'; na ruk' ta k'u ri', e ri Dios uya'om ronoje ri kajawax chiqe.
11Alaq qa hermanos aj Corinto, ronoje xqaq'alajisaj lo chiwach alaq, na jinta k'ana xqewaj chiwach alaq. Lik qak'utum che alaq ri k'axna'b'al qak'u'x k'o pa qanima'. 12Eta'am alaq ri'oj lik qak'utum ri rutzil qak'u'x che alaq, no'j ralaq na je ta la' ka'an alaq chiqe ri'oj. 13Ek'u wo'ora kinch'a't uk' alaq pacha' alaq walk'o'al: Jela' pacha' ri'oj lik qak'utum ri rutzil qak'u'x che ralaq, jek'ula' 'ana alaq chiqe ri'oj.
Qa'ana chom che ri qab'inik qasilab'ik ma oj rocho ri Dios
14Hermanos, mak'ulaj ib' alaq kuk' ri na kikojom ta rub'i' ri Cristo, ma ri jusuk' na kuk'ulaj ta rib' ruk' ri na jusuk' taj y ri q'ijsaq na kuk'ulaj ta rib' ruk' ri q'equ'm. 15¿Yey ri Cristo ruk' ri Belial#6:15 “Belial”: Wa' e jun ub'i' ritzel winaq. k'o nawi utzil chikiwach? ¿O sa' ri utz kuriq junoq ukojom rub'i' ri Cristo che junoq na ukojom taj? 16Ri rocho ri Dios na kuk'ulaj ta rib' ruk' taq ri tiox. Jek'uri'la' ralaq na jinta chi e alaq kuk' ri tiox, ma ralaq alaq rocho ri Dios k'aslik. E pacha' rub'i'im Rire:
Kinjeqi' kuk' y chikixo'lib'al rike kimb'in wi.
In k'u Ri'in ki Dios y rike e nutinamit#1 Co. 3:16; 6:19 Lv. 26:12; Ez. 37:27
xcha'.
17E uwari'che ri Dios jewa' kub'i'ij pa Ruch'a'tem:
Chixel chikixo'lib'al ri e aj mak y chiwesaj iwib' kuk'.
Mich'ulaj iwib' ruk' ri na chom taj chwach ri Dios,
y jela' Ri'in kixink'ul chi utz. Is. 52:11; Ez. 20:41
18Kinu'an k'u Iqaw ri',
yey ri'ix kixu'an ix walk'o'al 2 S. 7:14
kacha ri Qajawxel, ri k'o ronoje unimal chuq'ab' puq'ab'.
Currently Selected:
2 Corintios 6: acrN
Highlight
Copy
Compare
Share
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
