2 Corintios 4

Ri Pablo kuq'alajisaj ri chomilaj Q'ijsaq re ri Dios

1Ruma k'u wa' na kapax ta qak'u'x che u'anik wa chak, ma wa' ya'tal chiqe ruma ri rutzil uk'u'x ri Dios. 2Ri'oj na jinta k'o kaqa'an xa xe'laq'ay y k'ixb'al uwach, na keqasok tane ri tikawex yey na kaqakoj tane uwi' ri kub'i'ij Rutzij ri Dios. Ma e kaqak'ut pa saqil wi ri Q'ijsaq cha' jela' konoje ri ketaw re, kaketa'maj lik jusuk' ri kaqa'ano. 3Yey we k'o kakich'ob'o na q'alaj ta ri Utzilaj Tzij, wa' e chike ri katajin usachik kiwach. 4Rike na kakikoj ta ri Utzilaj Tzij ma sachisam ri kina'oj ruma ri jun kataqan che ruwachulew; wa' e ritzel winaq, ri xu'an pacha' potz' chike cha' na kakil ta ri chomilaj Q'ijsaq re ri Cristo, ri kuk'utub'ej uwach ri Dios. 5Na e ta k'u kaqatzijoj qib' ri'oj; ri kaqatzijoj e ri Jesucristo e Taqanel pakiwi konoje yey ri'oj xa oj nimanel e alaq, ma e karaj ri' ri Jesús chiqe.#Lc. 22:27 6Ma ri Dios ri xtaqan che xwon ri q'ijsaq chupa ri q'equ'm,#Gn. 1:2-3 e Rire ri xwon chupa ri qanima' cha' ruk' la' kaqeta'maj runimal uchomalil Rire, ri kaq'alajin ruma ri Cristo.#4:6 “Kaq'alajin ruma ri Cristo”: Pa ri ch'a'tem griego kub'i'ij “che rupalaj ri Jesús”. Mt. 17:2; Jn. 8:12

Mapax qak'u'x tob' kojik'ow pa k'axk'ob'ik

7Ri Q'ijsaq re ri Dios e jun nimalaj b'eyomalil, yey uq'alajisam wa' chiqe tob' ri'oj xa oj ulew poqlaj. Jela' xu'ano cha' kaq'alajin wa': Ri unimal chuq'ab' k'o quk', na qe ta ri'oj, ma ruk' ri Dios kape wi. 8Tob' kape k'u uk'iyal uwach k'axk'ob'ik paqawi', kojel na chupa. Tob' k'o ub'is qak'u'x, na kapax ta qak'u'x che. 9Tob' kojternab'ex ruk' k'ax, ri Dios na oj roq'otam taj. Tob' ne kojmach'ax pulew, na kakisach ta qawach. 10Pa taq koj'ek wi, ri qacuerpo xaqi chwach ri kamik k'o wi, jela' pacha' ri xuk'ulumaj ri Jesús; yey kojik'ow chupa wa' cha' ruk' ri qab'inik qasilab'ik kaq'alajin ruk'aslemal ri Jesús.#4:10 Echiri' kaqach'ij uchuq'ab' taq ri k'axk'ob'ik, kaq'alajinik e ruma ruchuq'ab' y ruto'b'al ri Jesús quk'. 11Wa oj k'o wara che ruwachulew, xaqi katewun ri kamik paqawi' ruma oj aj chak re ri Jesús; yey kojik'ow chupa wa' cha' kilitaj ruk'aslemal ri Jesús che ri qacuerpo, tob' ri qacuerpo na jinta ukowil ma xa kakamik. 12Jela' k'u ri' ri kamik k'o paqawi' ri'oj; yey ruma wa', ralaq riqom alaq ri chomilaj k'aslemal re ri Dios.

13Ek'u Rutzij Upixab' ri Dios kub'i'ij:

Xkub'i' nuk'u'x ruk' ri Dios,

e uwari'che xinq'alajisaj Rutzij Rire. Sal. 116:10

Jek'ula' ri'oj kub'ul qak'u'x ruk' ri Dios; e uwari'che kaqatzijoj rub'i'. 14Qeta'am k'ut e ri xk'astajisan lo re ri Qanimajawal Jesús chikixo'l ri ekaminaq, jela' ku'an chiqe ri'oj; kojuk'astajisaj y junam uk' alaq kojuk'am b'i ruk' Rire. 15Ronoje k'u wa qik'owib'em e uma ralaq, cha' jela' kak'iyar kiwach ri kek'uluw re ri unimal rutzil uk'u'x ri Dios. Yey wa' e re yakb'al uq'ij ri Dios, ma jela' lik e k'i ri kakitioxij ri unimal rutzil uk'u'x ri Dios pakiwi'.

16E uwari'che na kapax ta qak'u'x, tob' ne wa qacuerpo katajin uri'job'ik; no'j ruk'u'xib'al ri qak'aslemal na je ta la' u'anom, ma jalan kak'oji' ne más qachuq'ab' ri jujun q'ij. 17Janipa taq wa k'ax kaqatij che ruwachulew xa kik'owik, yey wa' lik k'o kutiqoj che ri qab'inik qasilab'ik y che ri chomilaj qak'aslemal chila' chikaj, ri na jinta utaqexik y na jinta k'ana kajunimax wi. 18Ek'u ri'oj na kaqaya ta qak'u'x che ri kilitaj wara che ruwachulew, e kaqaya qak'u'x che ri na kilitaj taj; ma ronoje ri kilitaj uwach xa kak'isik, no'j ri na kilitaj ta uwach na jinta utaqexik rukowil.

Currently Selected:

2 Corintios 4: acrN

Highlight

Copy

Compare