Njé gə́ Rɔmə 16
16
Lapia ra lə Pool
1Ma m’ndəji sí mba kar sí tɔsje kəm sí dɔ Poebé, kɔnan sí gə́ dené gə́ to kura lə Eglisə gə́ Sa̰kre, 2mba kar sí wáje gə́ rɔ sí’g gə ri Mbaidɔmbaije lə sí lé raje né areeje wa bua ka̰ deḛ gə́ to kəmee ləm, laje səa dɔ né gə́ yeḛ aw ndée’g ləm tɔ, mbata yeḛ to njela gə dəwje bula ləm, ma nja kara yeḛ la səm-ma ya ləm tɔ.
3Raje Priska gə Akilas gə́ to njéboakulaje ləm gin Jeju Kristi’g lé lapia amje . 4Deḛ lé d’ɔs dɔ dee yoo’g gə mba kajim ne. Ma m’ra dee oiyo gə karm el nɛ Eglisəje lai gə́ to ɓee lə njépole-magəje kara ra dee oiyo ya tɔ. 5Raje Eglisə gə́ mbo̰ dɔ na̰ kəi lə dee lé lapia amje. Epayinètə gə́ m’undá dan kəm’g gə́ to njetaamee-Kristi gə́ doŋgɔr ɓeeko̰ gə́ Asi lé reaje lapia amje. 6Raje Mari gə́ ula rəa ndubu yaa̰ gə mbata lə sí lé lapia amje. 7Raje Andronikus gə Junias gə́ to njénojije ləm ləm, gə njéboada̰gaije ləm tɔ lé lapia amje. Deḛ gə́ to gə́ nɔm’g gin Kristi’g kédé ləm, njékaḭkulaje lai d’oo dee gə́ majikojije lé ləm tɔ.
8Raje Amplias gə́ m’undá dan kəm’g gin Mbaidɔmbaije’g lé lapia amje. 9Raje Urbɛn gə́ to njeboakula lə sí gin Kristi’g, gə Stakys gə́ m’undá dan kəm’g lé lapia amje tɔ. 10Raje Apelɛs gə́ unda rɔ meekun ləa gə́ gin Kristi’g kəm sí’g lai lé lapia amje. Raje kojikəije gə́ ɓee lə Aristobul lapia amje. 11Raje Herodio̰ gə́ to njenoji ləm lé lapia amje. Raje njémeekəije gə́ ɓee lə Narsisə gə́ to ka̰ Mbaidɔmbaije lé lapia amje tɔ. 12Raje Tripènə gə Triposə gə́ ra kula lə Mbaidɔmbaije lé lapia amje. Raje Persidə gə́ m’undá dan kəm’g gə́ ula rəa ndubu ra ne kula lə Mbaidɔmbaije lé lapia amje. 13Raje Rupus gə́ Mbaidɔmbaije ɔree undá gə kəmee lé lapia ləm, raje kea̰je gə́ to gə́ kɔm to lé lapia amje ləm tɔ . 14Raje Asynkritə gə Plego̰ gə Hermɛs gə Patrobas gə Hermas gə ŋgako̰ síje lai gə́ d’isi sə dee na̰’d lé lapia amje tɔ. 15Raje Pilologə gə Juli gə Nere gə kɔnanee gə́ dené gə Olimpə gə njémeendaje lai gə́ d’isi sə dee na̰’d lé lapia amje.
16Waje na̰ kaar na̰ gə́ sud tɔnje ne ɓɔl na̰ gə meenda. Eglisəje lə Kristi lai ra sí lapia.
17Ŋgakɔmje, ma m’ndəji sí bər-bər gə mba kar sí tɔsje kəm sí goo njétɔs əm dəwje na̰’d lé gə deḛ gə́ néra dee ila dəwje kag ɓó ta lə dee aw na̰’d gə ta gə́ seḭ iŋgaje mba̰ lé el. Undaje rɔ sí rɔ dee’g ɓad gə́ raŋg. 18Mbata dəwje neelé ra kula gə́ wɔji dɔ meḛ dee-deḛ ɓó deḛ ra kula gə mba kar Mbaidɔmbaije lə sí lé el. Ta gə́ rii ləm gə ta lèbè ne kəm dəwje ləm tɔ ɓa deḛ pəl ne meḛ njémeekwɔilɔje. 19Ŋgonkoji lə sí-seḭ lé dəwje lai d’oo nea̰ mba̰ am m’ra ne rɔlel tɔ. Ma m’ndigi kar sí toje njékəmkàrje dɔ néje lai gə́ maji’g nɛ saaje rɔ sí rəw dɔ néra gə́ majel’g. 20Ala gə́ njeyelko meelɔm lé waga ba ya a gə rəd Njekurai lé gel gɔl sí’g mbə̰ji-mbə̰ji tɔ.
Maji kar sí sije dan noji’g lə Mbaidɔmbaije lə sí Jeju Kristi lé tɔ. Amen.
21Timote, njeboakula ləm, deḛ gə Lusius, gə Jaso̰ gə Sosipater, njénojije ləm lé ra sí lapia .
22Ma Tertius gə́ njendaŋ maktub neelé m’ra sí lapia gə ri Mbaidɔmbaije tɔ.
23Gayus, gə́ njekwam gə́ rəa’g lé ləm, gə́ ar Eglisəje lai mbo̰ dɔ na̰ kəi-mbá’g ləa ləm tɔ lé ra sí lapia. Erastə gə́ njeŋgəm lar gə́ mee ɓee’g neelé, deḛ gə Kartus, ŋgoko̰ sí lé deḛ ra sí lapia tɔ .
24Maji kar sí-seḭ lai sije dan noji’g lə Mbaidɔmbaije lə síjeḛ Jeju Kristi . Amen!
25Yeḛ gə́ askəm ma̰a gɔl sí naŋg gə goo Tagə́maji’g ləm gə ta lə Jeju Kristi gə́ m’ila mberee lé gə́ aw na̰’d kára ba gə tandər gə́ deḛ riba dəa nɛ to loo-kiya’g kédé gə́ dɔtar saar lé 26nɛ ɓasinè ta gə́ njéteggintaje ndaŋg lé riba dəa təsərə gə goo ndukun lə Ala gə́ njesikəmba lé ləm, ar ginkoji dəwje gə raŋg lai-lai d’oo mba kar dee d’un ne meḛ dee d’ila ne ŋgonkoji dəa’g ləm tɔ lé 27yeḛ nja ɓa gə́ Ala lé gə́ njekəmkàr kára ba kiao ndá maji kula rɔnduba dəa’g gə ri Jeju Kristi gə ləbee-ləbee saar-saar gə no̰. Amen!
Currently Selected:
Njé gə́ Rɔmə 16: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.