Njé gə́ Rɔmə 15
15
Laje gə njémeembɔréje lé
1Jeḛ gə́ siŋga sí to kɔgərɔ ɓəi lé maji kar sí n’laje gə njémeembɔréje loo rəm’g lə dee ɓó n’saŋgje rɔlel gə́ wɔji dɔ sí gə kar sí el. 2Maji kar nana kara mbuna sí’g saŋg néra gə́ a kar mee maree nda ne kaḭ gə mba rodee ne. 3Mbata Kristi kara saŋg rɔlel gə́ wɔji dəa gə karee el nɛ to gə goo ta gə́ ndaŋg mee maktub’g pana: Deḛ gə́ d’ula sul dɔi’g lé ta ndɔlje lə dee lé kara oso dɔm’g ya ləm tɔ . 4Mbata taje lai gə́ deḛ ndaŋg mee maktub’g kédé lé deḛ ndaŋg gə mba ndoo sí ne mba kar mbɔl dɔ meekila gə ta gɔl mee gə́ maktub gə́ to gə kəmee ar sí lé jeḛ j’unda ne meḛ sí yel ya. 5Maji kar Ala gə́ njemeekila ləm, gə njégɔl meḛ dəwje ləm tɔ lé ar takə̰ji lə sí aw na̰’d kára ba gin Jeju Kristi’g 6mba kar sí lai lé a kundaje ne ndu sí na̰’d kára ba mba kula ne rɔnduba dɔ Ala lé gə́ to Bɔ Mbaidɔmbaije lə sí Jeju Kristi lé.
7Togə́bè ɓa maji kar sí waje na̰ gə́ rɔ na̰’g to gə́ Kristi kara wa sí ne gə́ rəa’g ula ne rɔnduba dɔ Ala’g lé tɔ. 8Tɔgərɔ ya, ma m’ula sí m’pana: Jeju Kristi lé to kura lə njékḭja tamɔd deeje mba kar kankəmta lə Ala to ne raga pai-pai loo gə́ yeḛ ar ndukun gə́ yeḛ un ar ka síje lé aw ne lée’g béréré. 9Nɛ njépole-magəje d’ula rɔnduba dɔ Ala’g gə mba meekɔrjol ləa gə goo ta gə́ ndaŋg mee maktub’g pana:
Gelee gə́ nee ɓa m’a pidii mbuna ginkoji dəwje gə raŋg’g ləm,
M’a kɔs pa kula ne rɔnduba rɔ rii’g ləm tɔ .
10Ta gə́ raŋg ɓəi pana:
Seḭ ginkoji dəwje gə raŋg lé alje rɔ sí gə koso-dəwje ləa na̰’d .
11Ta gə́ raŋg ya tɔɓəi pana:
Seḭ ginkoji dəwje gə raŋg lai lé pidije Mbaidɔmbaije lé ya ləm,
Maji kar dəwje lai kara d’ila riɓar dəa’g ya ləm tɔ .
12Esai kara pa togə́bè tɔ pana:
Barkəmrɔ Isai a kḭ
Ndá yeḛ a kḭ mba ko̰ɓee dɔ ginkoji dəwje gə raŋg ya.
Bèe ɓa ginkoji dəwje gə raŋg lé d’a kunda meḛ dee yel gə́ dəa’g .
13Maji kar Ala gə́ njemeekṵdayel lé ar nérɔlel’g gə ria-ria ləm, gə némeelɔm’g gə ria-ria ləm tɔ lé taa meḛ sí pəl-pəl gə goo meekun’g lə sí, gə mba kar mbɔl dɔ siŋgamoŋ lə Ndilmeenda ɓa meekundayel lə sí a kɔs ne dɔ maree’g gə́ kédé-kédé.
14Ŋgakɔmje, ta gə́ wɔji dɔ sí-seḭ lé ma m’gər gao, meemaji taa meḛ sí yal-yal ləm, gosonégər lə sí ɔr dɔ njal ləma, seḭ asjekəm ndooje ne na̰ ya ləm tɔ. 15Ɓó lé m’ndaŋg maktub m’ar sí ɓa m’pata keneŋ nuŋga so ndá ma m’ra mba kolé ne meḛ sí dɔ noji gə́ Ala wa səm 16ɔrm ne am m’to ne kura lə Jeju Kristi mbuna njépole-magəje’g. Kula gə́ wɔji dɔ Tagə́maji lə Ala lé m’ra gə mba kun ne njépole-magəje gə́ Ndilmeenda ɔr dee unda dee gə kəmee mba kar dee to nékar Ala gə́ a taa kəmee rəgm. 17Kula gə́ ma m’ra gə mbata lə Ala lé yee ɓa m’oo ne loo ti ne rɔm gin Jeju Kristi’g ya. 18Tapam gə néram gə́ Kristi ɓa am siŋgam mba kam m’ra gə mba kɔr ne njépole-magəje kar dee d’ila ŋgonkoji dɔ Ala’g lé yee ɓa ma m’pa ɓó né gə́ raŋg el. 19Yeḛ nja ɓa am siŋgamoŋ mba ra ne némɔrije gə né gə́ dum ra ləm, yeḛ ar siŋgamoŋ lə Ndil Ala nai səm ləm tɔ. Yee ɓa m’ila ne mber tagə́maji lə Kristi m’aree taa ne loo pəl-pəl un kudee Jerusalem saar teḛ Ilyri. 20Loo gə́ ri Kristi ɓar keneŋ el ɓəi lé yee ɓa ma m’wɔji məəm’g mba kaw kila mber tagə́maji keneŋ ɓó gə mba rɔd ne kəi dɔ gin kəi gə́ dəw gə́ raŋg tum lé el, to gə goo ta gə́ ndaŋg mee maktub’g pana:
21Deḛ gə́ mbər taree oso mbi dee’g el ɓəi lé d’a kée ləm,
Deḛ gə́ d’oo nea̰ el ɓəi lé kara d’a gəree ləm tɔ .
Pool ndiŋga rəa gə mba kaw Rɔm
22Yee ɓa gə́ né gə́ ɔgm loo kaw koo sí gɔl bula . 23Nɛ ɓasinè lé né kára kara tɔm gaa-gaa loo gə́ nee el ləm, mal kaw gə́ par gə́ rɔ sí’g ram yaa̰ ləbm bula ləm tɔ. 24Yee ɓa ma m’wɔji məəm’g gə mba koo sí loo gə́ m’a gə dəs tar kaw Espagnə lé mba kar loo gə́ m’iŋga rɔlel mbata teḛ gə́ m’teḛ ɓee lə sí mba̰ lé ndá seḭ a danmje gə mba karm m’aw keneŋ ya tɔ. 25Ɓasínè-ɓasínè lé m’isi m’aw gə́ Jerusalem gə mba ra né kar deḛ gə́ to gə kəmee lé . 26Mbata njé gə́ Masedoinə gə njé gə́ Akai lé deḛ d’ḭ gə meḛ dee mbo̰ ta néje lə dee na̰’d mba kar njéndooje mbuna deḛ gə́ to gə kəmee gə́ d’isi Jerusalem lé. 27Deḛ d’ḭ gə meḛ dee ndá d’a ra bèe ya nɛ to né gə́ kəm ra ya tɔ, mbata ɓó lé njépole-magəje d’orè sə dee na̰ dɔ né gə́ wɔji dɔ ndil dee ndá to kəm kar dee-deḛ kara d’orè sə dee na̰ dɔ né gə́ wɔji dɔ darɔ dee’g tɔ . 28Togə́bè ɓa, loo gə́ m’tɔl ta kula nee bém ɓa m’ɔm nénojikwaje neelé ji dee’g ɓəi ndá m’a kḭ kaw rɔ sí’g mba dəs kaw Espagnə. 29Ma m’gər gao loo gə́ m’a kaw ɓee lə sí ndá Kristi a tɔr ndia dɔm’g korè səm rəw na̰’d més karm m’teḛ ne ɓee lə sí gə́ majee.
30Ŋgakɔmje, ma m’ra ndòo rɔ sí’g gə ri Mbaidɔmbaije lə sí Jeju Kristi ləm, gə goo Ndil gə́ yel kó meenoji neelé meḛ sí’g ləm tɔ lé mba kar sí orəmje ne més loo-rɔ’g ləm, raje ne tamaji ta Ala’g mbata ləm 31gə mba karee ɔrm ji njémeetɔ kujitaelje’g gə́ d’isi Jude ləm, gə mba kar nénojikwaje gə́ m’ɔd m’aw ne Jerusalem lé a taa kəm deḛ gə́ to gə kəmee rəgm ləm tɔ. 32Bèe ɓa ɓó lé mee Ala ndigi ndá m’a teḛ rɔ sí’g gə rɔlel ləm, m’wa ne rɔm mbuna sí’g lam ləm tɔ. 33Maji kar Ala gə́ njeyelko meelɔm lé nai sə sí kára-kára lai tɔ. Amen!
Currently Selected:
Njé gə́ Rɔmə 15: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.