Loo gə́ killa rea kəm Ja̰’g 22

1Yeḛ am m’oo baa gə́ ḭ gin kalimbai’g lə Ala gə ka̰ Ŋgonbad’g lé tɔ. To mán kəmə gə́ ndul konono asəna gə mán gə́ ndil ku’g bèe#Ejk 47.1, Jkr 14.8. 2Dan mee ɓee-boo gə́ dana bab ləm, gə dɔ koŋgo baa-boo’g loo joo bɔr ya ləm tɔ lé kag kəmə to keneŋ. Kag kəmə neelé andə gə ka̰dee gə lée-lée gə naḭ kára-kára naḭ dɔg-giree-joo ləm, kamee ɓa to gə́ kuma̰ kaji ginkoji dəwje gə raŋg dɔ naŋg nee ləm tɔ#Gn 2.9. 3Ndɔl yoo a godo mee ɓee’g neelé.

Kalimbai lə Ala gə ka̰ Ŋgonbad a to keneŋ ya. Kuraje ləa d’a kaar gə kula ra dee yéŋgé-yéŋgé gə mba karee ləm, d’a koo kəmee ləma#Jkr 14.11, 4tɔɓəi ria a to ŋgo no̰ dee’g ləm tɔ. 5Loondul a godo keneŋ ləm, pərndɔ əsé néndogó kára kara d’a kaw ndée keneŋ el ŋga ləm tɔ mbata Ala gə́ to gə́ Mbaidɔmbaije lé ɓa a ndogó rəw no̰ dee’g. D’a ko̰ɓee gə ləb dee ləb dee saar-saar gə no̰#Esa 60.19, LkD 7.18.

Rudu taje

6Yeḛ ulam pana: Ta neelé to kankəmta gə́ a to njaŋg gə no̰. Mbaidɔmbaije Ala gə́ njekula ta meḛ njéteggintaje’g lé yeḛ nja ɓa ula kura ləa gə́ dara gə mba kar kuraje ləa gə́ dɔ naŋg nee d’oo néje gə́ nai lam ba d’a gə teḛ ɓəi lé

7Aa oo, waga ɓa, n’a ree ɓəi, yeḛ gə́ taa ta gə́ to mee maktub’g neelé gə́ wɔji dɔ né gə́ ma gə ra lé ŋgəm dɔɓəŋgəree’g ndá rəa a lelee ne ya.

8Ma Ja̰ nja, m’oo ta neelé gə mbim, m’oo néje neelé gə kəm tɔ ndá m’oso gel gɔl kura gə́ dara gə́ am m’oo néje neelé m’oso naŋg rəb mba kwá məəm’g. 9Nɛ yeḛ ulam pana: Ra togə́bè el! Ma m’to gə́ njeboakula mari ləm, gə ka̰ ŋgakɔḭje gə́ njékɔrgootaje ləma, gə ka̰ dee-deḛ gə́ ŋgəm ta gə́ to mee maktub’g neelé dɔɓəŋgərə dee’g lé ləm tɔ. Ala ɓa maji kari wá məəi’g ya.

10Yeḛ ulam pana: Ta néje gə́ a gə ree gə́ maktub neelé tegginee lé maji kam m’rḛdə təa el. Mbata kàree nai dəb ba ŋga. 11Dəw gə́ nérea to kori-kori ndá maji kar nérea to kori-kori ɓəi. Dəw gə́ nérea to né gə́ mina̰ ndá maji kar nérea to né gə́ mina̰ ya ɓəi tɔ. Dəw gə́ njemeekarabasur lé maji kar nérea to gə dɔ najee ɓəi ləm, dəw gə́ njemeenda lé maji karee unda rəa gə kəmee ya ɓəi ləm tɔ#LkD 12.10.

12Aa ooje, waga ɓa m’a ree ɓəi ndá m’a ree gə né mba kuga ne dɔ ji dəwje kára-kára lai gə goo néra dee ra dee lé#Esa 40.10, 62.11, Pak 28.4, Jer 17.10. 13Ma m’to Alpa gə Omega ləm, ma m’to gə́ kédé gə gogo ləma, ma m’to gə́ dɔtar gə rudu ləm tɔ#LkJ 18.17, 2.8, Esa 44.6, 48.12. 14Rɔlel nai gə deḛ gə́ togo kubu lə dee mba kiŋga rəw sɔ kandə kag kəmə lé ləm, əsé mba kiŋga rəw kandə ne mee ɓee’g neelé ləm tɔ#Gn 2.9, 3.22. 15Bisije əsé gə njémbeḛje əsé gə njémɔdkaiyaje əsé njétɔl dəwje əsé njépole-magəje əsé deḛ gə́ rara gə́ ra néŋgɔm ndá maji kar dee nai raga ya.

16Ma Jeju, m’ula kura ləm gə mba karee to njekɔrgoota neelé kar Eglisəje. Ma m’to gə́ ŋgoka Dabid ləm, m’to gə́ duje lookàr ləm tɔ#Esa 11.1,10.

17Ndil lé gə njeŋgao-sigi lé pata pana: Maji kari gə́ ree.

Yeḛ gə́ oo maji ndá aree pa togə́bè tɔ pana: Maji kari gə́ ree.

Yeḛ gə́ kṵdaman tɔlee ndá maji karee ree taa mán kəmə gə́ aḭ teḛ kuji-kuji lé ai, m’a karee gə́ kar ya ɓó yeḛ a ndogo el#Esa 55.1.

18Nana ɓa gə́ oo ta gə́ a gə teḛ gə goo ta gə́ to mee maktub’g neelé ndá ma m’ulá təsərə m’pana: Ɓó lé yeḛ pa təa gə́ ɓəd ɔm ta gə́ raŋg dɔ’g ndá Ala a kundá gə oŋg-booje gə́ ndaŋg taree mee maktub’g neelé nja#TtG 4.2, 13.1. 19Ɓó lé nana ɓa tuji ta gə́ a gə teḛ gə goo ta gə́ to mee maktub’g neelé ndá Ala a kɔgee dɔ kandə kag kəmə’g neelé gə́ wɔji dəa ləm, a kɔgee loo-siée mee ɓee gə́ to gə kəmee gə́ d’ɔr goo taree mee maktub’g neelé ya ləm tɔ.

20Yeḛ gə́ ɔr goo ta nee ar sí lé pana: Oiyo, waga ɓa m’a teḛ wai ɓəi.

Amen! Mbaidɔmbaije Jeju, maji kari ree ya kɔgərɔ kari.

21Maji kar noji lə Mbaidɔmbaije Jeju nai sə sí lai ya. Amen!

Currently Selected:

Loo gə́ killa rea kəm Ja̰’g 22: SBA2015

Highlight

Copy

Compare