Pakɔsje 30
30
Njesigənea̰, i nja ɔrm ta yoo’g
1Pakɔs lə Dabid mee ndəa gə́ d’unda ne kəi-Ala gə́ boo gə kəmee lé
2Ǝi Njesigənea̰, ma m’ula rɔnduba dɔi’g
Mbata i nja unm urm tar,
I ndigi kar njéba̰je ləm d’al rɔ dee dɔm’g el.
3Njesigənea̰, Ala ləm!
Ma m’ila ndum naŋg m’no̰ ne wəl gə́ rɔi’g
Ndá i nja ajim ya.
4Njesigənea̰, i nja am m’unda loo m’teḛ dan njé gə́ d’wəi’g,
I nja am m’tel m’isi kəmba əw gə deḛ gə́ d’uru mee bwa-dɔɓar’g lé.
5Maji kar sí ɔsje pa arje Njesigənea̰,
Seḭ gə́ ṵdáje dan kəm sí’g lé
Maji kar sí ɔsje pa pidije ne meenda londoŋ ləa tɔ.
6Mbata oŋg ləa lé kuree əw waga ba,
Nɛ meenoji ləa lé to saar-saar gə no̰.
Loondul’g lé no̰ ndòo to ya,
Nɛ teḛ gə́ ndɔ rad lé boo-rɔkal teḛ tɔ.
7Loo gə́ ma m’isi gə́ majee ɓəi lé
M’pana: M’a kunda ndolé el!
8Njesigənea̰, mbɔl dɔ nojikwa ləi ɓa
I ar dɔ mbal ləm ŋgəŋ ne ŋgəŋ-ŋgəŋ ya.
I iya səm kəmi ndá
M’unda ne bala tigi-tigi ya tɔ.
9Njesigənea̰, ma lé m’ila ndum naŋg m’no̰ wəl gə́ rɔi’g!
M’ra ndòo rɔ Njesigənea̰’g ya.
10Ɓó lé i a kila məsm naŋg kam m’ur bwa-dɔɓar’g ndá
See ɗi ɓa i a kiŋga keneŋ wa.
See babur a kɔs gajii wa.
See a kɔr sor meenda londoŋ ləi wa.
11Njesigənea̰, maji kari tuga mbii oo ne ndum ndá
Oo ne kəm lootondoo’g ya!
Njesigənea̰, maji kari ree la səm ya kari.
12Ndu no̰je ləm lé
I nja tel dee gə́ ndu kalrɔ ləm,
I ɔr kubu-kwa-ndòo ləm tel ula ka̰ rɔlel rɔm’g
13Mba karm m’ɔs ne pa gə ŋgaw məəm bura
Ɓó m’isi gə tam gə́ mundu el.
Njesigənea̰, Ala ləm, m’a pidii saar-saar gə nɔm ya.
Currently Selected:
Pakɔsje 30: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
