Pakɔsje 29
29
Ndu Njesigənea̰ ɓa ɓar
1Pakɔs lə Dabid#Pak 96.7-9
Seḭ ŋgan-Alaje lé
Maji kar sí ulaje rɔnduba dɔ Njesigənea̰’g ləm,
Ilaje riɓar dəa’g ləm tɔ!
2Ulaje rɔnduba dɔ ri Njesigənea̰’g!
Néje gə́ bə̰dərə bə̰ gə́ to gə kəmee doi lé
Reeje ne undaje ne barmba nea̰’g wáje ne meḛ sí’g.
3Ndu Njesigənea̰ ɓar dɔ manje’g pṵgum-pṵgum ləm,
Ala gə́ njedo̰gɔr-ronduba ar ndi ndaŋg paḭ-paḭ ləm tɔ,
Njesigənea̰ lé si dɔ baa-booje’g ya.
4Ndu Njesigənea̰ ɓar gə siŋgamoŋ ləm,
Ndu Njesigənea̰ ɓar gə boo-ronduba ləm tɔ.
5Ndu Njesigənea̰ lé guru kag-sɛdrəje ləm,
Kag-sɛdrəje gə́ Liba̰ kara Njesigənea̰ guru dee naŋg rug-rug ləm tɔ.
6Kagje neelé yeḛ ar dee tal jagəra-jagəra asəna gə ŋgan maŋgje bèe ləm,
Mbalje gə́ Liba̰ gə Sirio̰ kara yeḛ ar dee tal tur d’asəna gə kura dadɔgje bèe ya ləm tɔ.
7Ndu Njesigənea̰ lé ar ndo̰ pərje teḛ bilim-bilim.
8Ndu Njesigənea̰ lé ar dɔdilaloo yə ləm,
Njesigənea̰ ar dɔdilaloo gə́ Kades kara yə ya ləm tɔ.
9Ndu Njesigənea̰ lé ar arkasje d’oji ŋganje ləm,
Ndia jagla mee kuuje jagla-jagla ləm tɔ.
Néje lai gə́ to mee kəi-mbai’g ləa lé
D’ila ndu dee naŋg wəl pana:
Maji kula rɔnduba dəa’g ya.
10Njesigənea̰ lé si dɔ kalimbai’g ləa
Mee ndəa gə́ mán bélm taa ne loo lé ləm
Njesigənea̰ si gə́ mbai dɔ kalimbai’g ləa
O̰ ne ɓee saar-saar gə no̰ ya ləm tɔ.
11Njesigənea̰ lé ar dəwje ləa siŋga dee ləm,
Njesigənea̰ lé tɔr ndia dɔ dəwje’g ləa
Ar dee d’isi ne dan rɔlel’g ləm tɔ.
Currently Selected:
Pakɔsje 29: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
