Gosota-Kəmkàrje 23
23
1Ɓó lé i si ta ka-nésɔ’g gə dəw gə́ boo ndá
Unda kəmkàr dɔ rɔi’g dɔ né gə́ to nɔḭ’g lé.
2Ɓó lé mal mbula nésɔ məəi’g rai yaa̰ ndá
Unda kia gwɔsi’g.
3Maji kari ra kəmkəḭ dɔ nésɔje’g ləa gə́ rii lé el,
To nésɔ gə́ ka̰ kərkəmloo.
4Sané siŋgai mba tel to bao el ləm,
Ǝw rɔi kḛji ta dɔ’g yaa̰ ləm tɔ.
5See i ndigi kar kəmi aiŋgwɔd goo néje gə́ d’a gə dəs’g wa.
Mbata nébaoje lé to néje gə́ gə bag dee,
Deḛ d’ḭ par d’aw gə́ mee dara’g asəna gə niŋgatə̰də bèe.
6Maji kari o̰ muru lə dəw gə́ kəmee mas mbidi-mbidi el ləm,
Maji kari ra kəmkəḭ dɔ nésɔje’g ləa gə́ rii lé el ləm tɔ.
7Mbata gə goo takə̰jije ləa gə́ mée’g lé yeḛ to dəw gə́ bèe ya.
Yeḛ a kulai pana: Sɔ gə ai ya, nɛ mée ɔm səi na̰’d el.
8I a tɔmé né gə́ lam gə́ i sɔ mba̰ lé ləm,
Taje ləi gə́ rii gə́ i pa lé d’a tel to né gə́ kari ba ləm tɔ.
9Maji kari pata mbi mbə-dəw’g el
Mbata yeḛ oo ta kəmkàr gə́ i ila mberee lé gə́ né el#GTK 9.8, Mat 7.6.
10Maji kari ŋgəs gə kag-rəw-nim gə́ ləw lé el ləm,
Aw mee ndɔ’g lə ŋganalje el ləm tɔ,
11Mbata njedalba̰ lə dee to njesiŋgamoŋ,
Yeḛ a koso gel dee’g kḭ ne səi.
12Ar məəi to yel dɔ néndoo’g ləm,
Ar mbii to tag dɔ taje gə́ ka̰ négər’g ləm tɔ.
13Ɔg rɔi dɔ kwɔji ŋgon kəmkàr’g el,
Lé i undá gə ndəi kara yeḛ a kwəi ne el.
14Loo gə́ i undá gə ndəi lé ndá
I ɔree ne mee ɓee’g lə njé gə́ d’wəi teḛ səa.
Ta kəmkàr gə́ bɔ ŋgon ula ŋgonee
15Ŋgonəm, ɓó lé kəmkàr to məəi’g ndá
Meem-ma kara rɔlel a taa pəl-pəl tɔ.
16Meem gə́ kəi a kal ne rəa
Loo gə́ ta a teḛ tai’g gə goo rəbee.
17Maji kari ra kəmkəḭ dɔ njékaiyaje’g el,
Nɛ maji kari ɓəl Njesigənea̰ ya ta-ta,
18Mbata ndɔ gə́ raŋg to gən ləm,
Nékunda-mee-yel dɔ’g ləi lé a kudu bo̰ el ləm tɔ.
19Ŋgonəm, oo ta ləm ndá i a tel to ne njekəmkàr,
Ar məəi to par gə́ dɔ rəw gə́ danasur’g.
20Maji kari si mbuna njékai mán-nduúje gə́ mḭ’g el ləm,
Gə mbuna njésɔ kɔr-da kəw elje’g el ləm tɔ.
21Mbata njḛdii mán-nduú gə́ mḭ ləm gə njembula nésɔ ləm tɔ lé tel to njéndooje ləm,
Njetoɓi lam-lam ta-ta lé ula ŋgisi kubu ɓa rəa’g ləm tɔ.
22Oo ta lə bɔbije, yeḛ gə́ ojii ləm,
Oo kɔinje gə́ né el loo gə́ yeḛ tel ɓuga lé el ləm tɔ.
23Iŋga kankəmta ndá rabee ndogee el,
Kəmkàr gə tandoo gə gosonégər kara ra sə dee bèe ya tɔ.
24Bɔ njemeekarabasur lé si dan boo-rɔkal’g ləm,
Yeḛ gə́ oji ŋgon gə́ njekəmkàr lé a kiŋga rɔlel ya ləm tɔ.
25Maji kar bɔbi gə kɔḭ d’al rɔ dee,
Maji kar yeḛ gə́ ojii lé si dan boo-rɔkal’g!
26Ŋgonəm, ya̰ məəi am ləm,
Maji kar rəw-kabm lé taa kəmi ləm tɔ.
27Mbata kaiya-dené lé to gə́ bwa gə́ uru yaa̰,
Dené lə dəw lé to bwa-mán gə́ njo̰-njo̰.
28Yeḛ um loo to gə́ gayim-dəw bèe ləm
Yeḛ ar bula lə njéndɔji-pɔdɔdɔje mbuna dəwje’g lé ḭ dɔ maree’d gə́ kédé-kédé ləm tɔ.
Néra ɓər lə kido
29Ra né hai! to mbata lə na̰ wa.
Ra né kwii! to mbata lə na̰ wa.
Maḭ ne na̰ ta gə kɔl na̰ to mbata lə na̰ wa.
No̰ yoo dɔ na̰’g to mbata lə na̰ wa.
Kiŋga doo lal gər gelee lé to mbata lə na̰ wa.
Kəm gə́ kas ŋgɔgərɔ lé to mbata lə na̰ wa.
30Mbata lə deḛ gə́ d’ur ta mán-nduú gə́ mḭ’g mbidi ləm,
Gə mbata lə deḛ gə́ to njénaa mán-nduú gə́ mḭ gə́ pélé na̰’dje ləm tɔ.
31Maji kari ai mán-nduú gə́ mḭ gə́ ḭ kas kər-kər lé el ləm,
Gə yee gə́ dəa tila kororo-kororo mee ŋgo’g el ləma,
Gə yee gə́ ḭ ruba naŋg pɔ-pɔ el ləm tɔ.
32Rudee ndá a tɔḭ to gə́ li bèe ləm,
A tugai to gə́ li-ŋgɔrŋgo̰d ləm tɔ.
33Kəmi a to gə́ dɔ denéje gə́ raŋg ləm,
Məəi a pata gə́ kori-kori ləm tɔ.
34I a to asəna gə dəw gə́ to dɔ baa-boo-kad’g ləm,
Asəna gə dəw gə́ to sém kag lel bato’g ləm tɔ.
35D’undam nɛ tom el!
Deḛ mbɔiyim naŋg ndá m’oo gə́ né el tɔ.
See kàr gə́ ra ɓa m’a ndel dɔ ɓi’g wa.
M’ndigi kai ya ɓəi!
Ngambai Bible © Alliance Biblique du Tchad 1989, 2015.