Gosota-Kəmkàrje 22
22
1Kar rii ɓar gə́ majee lé maji unda boo-nébaoje ləm,
Meenoji kara maji unda larnda gə larlɔr ləm tɔ.
2Bao gə njendoo d’asəna,
Njesigənea̰ ɓa gə́ njekunda dee joo bɔr.
3Dəw gə́ njekunda kəmkàr dɔ rəa’g lé oo némajel ndá iya rəa,
Nɛ deḛ gə́ négər na meḛ dee tas lé d’aw pər gə́ keneŋ ndá bo̰ néra dee ɔs ta dee’g ya#nsGTK 27.12.
4Kandə kula-dɔ ləm gə ɓəl Njesigənea̰ ləm tɔ lé
To nébao ləm gə rɔnduba ləma gə kəmə ləm tɔ.
5Kunje gə gumje to rəw-kaw njera nékori-kori’g,
Yeḛ gə́ aa dɔ kankəmrea ndá unda rəa keneŋ ɓad.
6Ndoo ŋgon rəw gə́ kəm karee njaa keneŋ,
Bèe ɓa loo gə́ yeḛ tɔg ndá a kuba kya̰ el.
7Bao lé o̰ ɓee dɔ njéndooje’g ləm,
Yeḛ gə́ tona né lé tel to ɓər lə yeḛ gə́ njekaree toná né lé tɔ.
8Yeḛ gə́ dubu néra gə́ kori-kori ndá a kinja némeeko̰,
Siŋgamoŋ meekḭ jugugu ləa a tel to né gə́ kari ba.
9Dəw gə́ njemeemaji lé d’a tɔr ndu dee dəa’g
Mbata yeḛ un muru ləa ar njéndooje.
10Tuba njekula sul dɔ loo’g ndá gel takɔl a godo ləm,
Tamaḭ gə kɔl, gə ta boo-rɔkul lé d’a godo ləm tɔ.
11Yeḛ gə́ ndigi meekàr ŋgad-ŋgad ləm,
Ar ta noji to təa’g ləm tɔ lé a to baokura lə mbai.
12Njesigənea̰ tɔs kəmee bao-bao dɔ négər’g,
Nɛ yeḛ tuji taje lə njendɔji pɔdɔdɔ.
13Njedab ula pana: Toboḭ aar raga’n!
A kwam tɔlm mba̰-rəw’g.
14Tapa kaiya denéje lé to bwa gə́ uru yaa̰,
Yeḛ gə́ mee Njesigənea̰ ea̰ dəa’g lé a koso keneŋ.
15Mbə wa mee ŋgon,
Ndá ndəi kwɔji kəmkàr a kɔree mée’g kilá əw.
16Yeḛ gə́ buguru njendoo gə mba kar nékiŋgaje ləa-yeḛ nja ḭ ne dɔ maree’d gə́ kédé-kédé ləm,
Gə yeḛ gə́ ar bao né ləm tɔ lé deḛ joo bɔr d’a tel si dan ndòo’g.
Tandəji kɔrje ɓəd-ɓəd
17Ur mbii oo ne ta lə njékəmkàrje ləm,
Unda məəi dɔ négər’g ləm ləm tɔ.
18Mbata to rɔlel mba kari ŋgəm dee məəi’g ləm,
Gə mba kar deḛ lai to tai’g pèrèrè ləm tɔ.
19Ma m’ndigi ndooi né ɓogənè
Gə mba kari ɔm ne məəi dɔ Njesigənea̰’g lé.
20Takwɔji-kəmkàrje gə taje gə́ ka̰ la̰ji tor dee məəi’g lé
See m’ndaŋg kédé m’ari mba̰ el wa,
21Gə mba ndooi néje gə́ gəd-gəd ləm gə taje gə́ to tɔgərɔ ləm tɔ,
Gə mba kari tel gə taje gə́ tɔgərɔ ila yeḛ gə́ njekulai’g lé, see bèe el wa.
22Wa njendoo né ləa təa mbata to gə́ yeḛ to njendoo el ləm,
Buguru njekəmndoo tarəwkɔg’d el ləm tɔ.
23Mbata Njesigənea̰ a koso gel dee’g ləm,
Yeḛ a kɔr kəmə lə dee-deḛ gə́ njekwa dee néje lə dee taaje lé ləm tɔ.
24Maji kari ɔr kura gə dəw gə́ to njeoŋ el ləm,
Dəw gə́ njera né kərm-kərm kara njaa səa el ləm tɔ,
25Nà banelə i a ndaji panjaa deeje
Kar dee tel to gum kwa kankəmrɔi.
26Maji kari to gə́ mbuna deḛ gə́ d’un ndu dee d’ar na̰ dɔ né’g el ləm,
Gə mbuna deḛ gə́ d’ɔs né naŋg taa ne néɓaŋje el ləm tɔ.
27Ɓó lé iŋga né gə mba kuga ne el ndá
See gelee ban ɓa i ndigi kar dee d’ɔr tira-toi geli’g wa.
28Maji kari ŋgəs gə kag-rəw-nim gə́ ləw
Gə́ bɔbije-je d’ula lé gə́ kédé el.
29Ɓó lé i oo dəw gə́ gər gosokula ləa maji ndá
Yeḛ a kaar no̰ dəwje gə́ kari ba’g el.
Ngambai Bible © Alliance Biblique du Tchad 1989, 2015.