Gosota-Kəmkàrje 16
16
Maji kari oo Njesigənea̰ loo nérai’g gə ndɔi-ndɔi
1Kwɔji né gə mba ra lé ḭ mee dəw’g,
Nɛ ra née lé ḭ rɔ Njesigənea̰’g.
2Rəwje lai gə́ dəw aw keneŋ lé
Ar ŋgad-ŋgad kəmee’g,
Nɛ yeḛ gə́ wɔji kwɔi lə takə̰jije lé
To gə́ Njesigənea̰ ya.
3Ɔm kula raije ji Njesigənea̰’g ndá
Néje gə́ i wɔji-kwɔji ra lé a teḛkɔr.
4Njesigənea̰ ra néje lai gə goo rəbee gə́ yeḛ wɔji,
Njemeeyèr kara yeḛ wɔji ne dɔ ndɔ némeeko̰ tɔ.
5Nana ɓa gə́ to njebeelé lé
Yeḛ to né gə́ mina̰ kəm Njesigənea̰’g,
Tɔgərɔ, njea neelé a si lal kar bo̰ nérea ɔs təa’g el.
6Mbɔl dɔ meemaji gə ŋgonkoji ɓa
D’ɔr ne ta néra gə́ majel dɔ dəw’g ləm,
Mbɔl dɔ ɓəl gə́ dəw ɓəl Njesigənea̰ lé ɓa
Yeḛ ya̰ ne goo majel ləm tɔ.
7Loo gə́ rəw-kaw dəw taa kəm Njesigənea̰ rəgm ndá
Njesigənea̰ ar njéba̰je ləa kara d’ɔm səa na̰’d tɔ.
8Kiŋga né gə́ lam ba gə goo rəbee
Maji unda boo-nékiŋga gə́ lal najee.
9Mee dəw wɔji rəw-kabee,
Nɛ Njesigənea̰ ɓa wɔji loo tila gɔlee keneŋ.
Ta gə́ wɔji dɔ mbai
10Ndərta gə́ teḛ ta mbai’g lé to njaŋg,
Maji karee ndəm dɔ rəwta-gaŋg’d lé el.
11Kwɔi lə né gə nékwɔji-né gə́ gə goo rəbee to ka̰ Njesigənea̰,
Kwɔi lə néje lai gə́ mee ɓɔl’g lé to né gə́ yeḛ nja ra.
12Mbaije d’oo to gə́ ra némajel to né gə́ to kḛji
Mbata mbɔl dɔ néra gə́ gə dɔ najee ɓa
Kalimbai to ne njaŋg,
13Dəw gə́ pata gə goo rəbee lé
Taa kəm mbaije rəgm,
Yeḛ gə́ pata gə́ danasur lé
D’undá dan kəm dee’g tɔ.
14Meekḭ jugugu lə mbai lé
To njekaḭkula lə yoo,
Nɛ njekəmkàr lé aree wəi bèm.
15Ŋgaŋ-kogo lə mbai to kaji lə dəw ləm,
Meemaji ləa to asəna gə ndi dɔ naḭ bèe ləm tɔ.
Néra gə́ jeḛ n’ra mbuna na̰’d
16Kiŋga kəmkàr lé maji yaa̰ unda larlɔr!
Kiŋga gosonégər lé maji unda larnda to!
17Rəw-kaw dəwje gə́ danasur lé
To kya̰ goo majel,
Yeḛ gə́ tɔs kəmee bao-bao dɔ rəa’g lé
Aa ne dɔ rəw-kabee kər-kər.
18Kesta ɓa ɔr no̰ tuji ləm,
Beelé ɓa ar dəw oso ləm tɔ.
19Koso kul na̰’d gə njékula dɔ deeje lé
Maji unda kai gə njébeeleje nébanrɔ.
20Dəw gə́ ə̰ji ta maji dɔ né’g ɓa ra ndá
Iŋga majee ləm,
Yeḛ gə́ ɔm mée jəb-jəb dɔ Njesigənea̰’g ndá
Rea lelee ləm tɔ.
21Dəw gə́ kəmkàr to mée’g lé
Ɓaree njegosonégər ləm,
Ta gə́ kul yururu lé
Ar négər ḭ dɔ maree’d gə́ kédé-kédé ləm tɔ.
22Kəmkàr to ŋgira mán kəmə mbata dəwje gə́ d’iŋgá,
Bo̰ néra mbəje gə́ ɔs ta dee’g lé
To néra mbə lə dee ya.
23Kəmkàr gə́ to mee dəw’g lé
Aree pa ne ta gə goo rəbee.
Négər ləa gə́ ḭ dɔ maree’d gə́ kédé-kédé lé
Oji na̰ təa’g tɔ.
24Taje gə́ lel lé to asəna gə mba̰ tə̰ji,
Lel mee dəw’g ləm, ar darəa maji ne ləm tɔ.
25Rəw gə́ na̰je dəw oo gə́ rəw gə́ maji,
Nɛ loo kɔs ko̰ ləa to yoo#GTK 14.12.
26Rəw nésɔ ɓa ɔs dəw aree ra kula
Mbata ɓó ɔs gelee keneŋ.
27Dəw gə́ mḭdé ba lé
Wa dɔ gɔl némeeko̰ ləm,
Ta gə́ təa’g to asəna gə pər gə́ roo loo dula-dula ləm tɔ.
28Dəw gə́ njera né kori-kori lé ɔs gel takɔl,
Njekunda nani lé kara ar baokuraje lə na̰ tḭ na̰.
29Dəw gə́ njera né kərm-kərm lé
Er njeboatakəi ləa aree un rəw gə́ majel.
30Yeḛ gə́ libi kəmee jib-jib gə mba kya̰ rəa dan takə̰jije’d gə́ kori-kori ləm,
Gə sɔ təa mɔr-mɔr ləm tɔ lé ndá
Yeḛ ra majel gə mée jəgm mba̰.
31Yiŋga dɔ gə́ pudu ndá kələw-kələw lé
To dɔgugu rɔnduba lə njeaje-je,
Rəw néra gə́ gə dɔ najee ɓa d’iŋgá ne.
32Yeḛ gə́ ar oŋg ḭ səa kalaŋ el lé
Maji unda bao-rɔ ləm,
Yeḛ gə́ to dəw dɔ rəa lé ɓa
Maji unda yeḛ gə́ njetaa ɓee-booje ləm tɔ.
33D’ɔm néje ta kubu gə́ ŋgal yududu’g
D’ɔs ne na̰ mbarè mba gər ne nékəmra,
Nɛ kwɔji rəw ra né njaŋg lé
Ḭ rɔ Njesigənea̰’g.
Ngambai Bible © Alliance Biblique du Tchad 1989, 2015.