Gosota-Kəmkàrje 15
15
1Ta kila’g gə́ kul yururu lé
Tɔl meekḭ jugugu bujuru,
Nɛ ta gə́ pa kədərə lé
Ɔs gel oŋg gə́ kɔs.
2Ndo̰ njékəmkàrje ar mal gər né ra dəwje,
Nɛ ta mbə-dəwje teḛ gə néra mbə gə́ raga-raga.
3Kəm Njesigənea̰ un loo lad-lad,
Aree oo ne njémeeyèrje gə njémeemajije gao.
4Ndo̰ gə́ kul yururu lé to kag-kəmə,
Nɛ ndo̰ gə́ pata kori-kori lé tuji mee dəw.
5Mbə-dəw oo tandoo lə bɔbee gə́ né el,
Nɛ dəw gə́ oo ta gə́ pa səa gə́ né lé
Ra né unda ne kəmkàr dɔ rəa’g.
6Mee kəi lə njemeekarabasur lé
Nébaoje taa loo keneŋ pəl-pəl,
Nɛ nékiŋga lə njemeeyèr lé
Ree gə mee-pelé wəs-wəs.
7Tapa njékəmkàrje teḛ gə négər gə́ raga-raga,
Nɛ mee mbə-dəw to wəl.
8Nékinjaməs lə njemeeyèr lé
To né gə́ mina̰ kəm Njesigənea̰’g,
Nɛ tamaji lə njéra né danaje ɓa lelee.
9Rəw-kaw njemeeyèr lé
To né gə́ mina̰ kəm Njesigənea̰’g,
Nɛ yeḛ gə́ ndolè goo néra gə́ gə dɔ najee ɓa
Yeḛ undá dan kəmee’g.
10Yeḛ gə́ uba kila-rəw gə́ dana ya̰ lé
Ndəi a kwá yaa̰
Yeḛ gə́ ə̰ji ta gə́ pa səa bəḭ-bəḭ lé
A kwəi.
11Ɓee lə njé gə́ d’wəi gə bwa-wəl gə́ suna godo lé
To raga ndəgəsə no̰ Njesigənea̰’g,
Ŋga ɓəd ɓa see meḛ dəwje ɓəi wa.
12Njebeelé lé ndigi kar dəw pa səa el ləm,
Yeḛ aw rɔ njékəmkàrje’g el ləm tɔ.
13Mee dəw gə́ lelee lé
Ar təa to gə kogo dḛ̀,
Nɛ loo gə́ mee dəw lelee el ndá
Rea wəi sululu.
14Njegosonégər lé mée saŋg négər,
Nɛ mbə-dəwje lé ta mbə ɓa lel ta dee’g.
15Ndɔje lai gə́ wɔji dɔ njénékəmndooje lé
To majel,
Nɛ meelel lə dəw lé
To asəna gə si ta muru-gad’g ta-ta bèe.
16Kiŋga né lam ba ɓəl ne Njesigənea̰
Maji unda boo-nébao si ne gə mee-pelé-wəs-wəs.
17Sɔ mbi kam kul ne rɔi loo gə́ meenoji o̰ ɓee keneŋ
Maji unda dakas maŋg gə́ to ndəb-ndəb loo gə́ kḛji loo bəḭ-bəḭ to keneŋ.
18Dəw gə́ njemeekḭ jugugu ɔs gel takɔlje,
Nɛ yeḛ gə́ ar oŋg ḭ səa kalaŋ el lé
Gɔl takɔl na̰ ya.
19Rəw-kaw njedab lé
To asəna gə ŋgalaŋ kunje,
Né kila-rəwkaw dəwje gə́ njéra nédanaje lé
To asəna rai-rai.
20Ŋgon gə́ kəmee àr lé
To nérɔlel lə bɔbeeje,
Nɛ mbə-dəw oo kea̰je gə́ né el.
21Néra mbə lé
To rɔlel lə dəw gə́ kəmkàr na mée tas,
Nɛ dəw gə́ njegosonégər lé
Njaa rəw gə́ danasur’g.
22Lal mbo̰-dɔ-na̰ kwɔji rəw né lé ɓa
Né gə́ d’wɔji-kwɔji ra lé teḛ ne kɔr el gə mbəa,
Nɛ loo gə́ njékwɔji-takəmkàrje bula ndá
Né gə́ d’wɔji-kwɔji ra lé teḛkɔr ya.
23Kila ta’g gə ndu gwɔs gə́ maji lé to rɔlel lə njea,
Ŋga ɓəd ɓa see ta gə́ lel gə́ dəw pa gə goo rəbee lé ɓəi wa.
24Kila-rəw gə́ ka̰ si kəmba lé
To par gə́ tar mbata lə njekəmkàr
Gə mba karee ya̰ ne rəw gə́ aw gə́ ɓee lə njé gə́ d’wəi gə́ gin naŋg’d.
25Njesigənea̰ tɔs kəi lə njébeeleje tila,
Nɛ yeḛ ar ŋgaŋ looje lə njekəisiŋga to njaŋg.
26Takə̰jije gə́ majel to né gə́ mina̰ kəm Njesigənea̰’g,
Nɛ taje gə́ maji lé to né gə́ àr ŋgad-ŋgad kəmee’g tɔ.
27Yeḛ gə́ ŋgur nékiŋga gə́ gə goo rəbee el rəa ŋgwɔd-ŋgwɔd lé
Ɓar tuji gə́ dɔ njémeekəije’g ləa,
Nɛ yeḛ gə́ ə̰ji né gə́ d’un gə mba ndogee ne bəḭ-bəḭ lé
A sí kəmba.
28Njemeekarabasur lé
La̰ji ta mée’g ɓa ila ta’g ɓəi,
Nɛ ta njémeeyèrje lé teḛ gə taje gə́ majel ɓa gə́ raga-raga.
29Njesigənea̰ unda rəa ɓad rɔ njémeeyèrje’g,
Nɛ yeḛ oo tamaji lə njémeekarabasurje.
30Koo loo gə meendakaḭ lé
Ar mee dəw lelee,
Tɔɓəi ta gə́ maji ar siŋga dəw ŋgəŋ ne ŋgəŋ-ŋgəŋ.
31Yeḛ gə́ ur mbia gèŋ dɔ taje gə́ pa ne səa mba kajee ne lé
Loo-siée a to dan njékəmkàrje’g.
32Yeḛ gə́ ɔs takwɔji-kəmkàr rəw lé
Oo rəa-yeḛ nja gə́ né el,
Nɛ yeḛ gə́ taa ta gə́ pa ne səa lé
Iŋga gosonégər.
33Ɓəl Njesigənea̰ ɓa ndoo dəw kəmkàr,
Tɔɓəi kula dɔ kédé ɓa rɔnduba orè gée ɓəi.
Ngambai Bible © Alliance Biblique du Tchad 1989, 2015.