Nehemi 5
5
Nehemi la gə njéndooje
1Mee ndəa’g neelé diŋgamje gə denéje lə dee lé d’ḭ no̰ no̰ yoo dɔ ŋgako̰ deeje’d gə́ to Jibje lé. 2Njé gə́ na̰je pana: Jeḛ gə ŋgan síje gə́ diŋgam gə njé gə́ dené jeḛ bula yaa̰, maji kar dee d’ar sí kó gə mba kar sí j’usɔ j’isije ne kəmba sə dee. 3Njé gə́ raŋg pana: Jeḛ j’waje ndɔje lə sí, gə ndɔ-nduúje lə sí, gə kəije lə sí n’tonaje ne kó loo gə́ ɓoo-boo o̰ lé. 4Njé gə́ raŋg pana: Jeḛ n’wərje lar j’unda dɔ ndɔje’g lə sí ləm, gə dɔ ndɔ-nduúje’g lə sí ləm tɔ mba kuga ne nékoga dɔ rɔ gə́ wɔji dɔ mbai lé. 5Lé bèe ya kara darɔ sí to asəna gə darɔ ŋgako̰ síje ya ləm, ŋgan síjeḛje to d’asəna gə ŋgan dee-deḛje ya ləm tɔ, nɛ aa ooje, jeḛ j’arje ŋgan síje gə́ diŋgam gə njé gə́ dené ra kula ɓər tɔɓəi ŋgan síje gə́ dené gə́ na̰je tel to ne ɓərje mba̰ tɔ, jeḛ kara siŋga sí godo ləm, ndɔje lə sí gə ndɔ-nduúje lə sí to ka̰ njé gə́ raŋg ləm tɔ.
6Loo gə́ m’oo ta no̰ no̰ yoo lə dee gə taje neelé ndá məəm ḭ səm jugugu.
7Ma m’wɔji məəm’g mba ndaŋg dəwje gə́ boo ləm, gə njéko̰ɓeeje ləm tɔ ndá m’dəji dee m’pana: Ta ɗi ɓa togə́bè wa! Seḭ arje ŋgako̰ síje tona sí né ndá seḭ tel taaje manee dɔ’g wa. Bèe ɓa ma mbo̰ koso-dəwje dɔ na̰’d mbata ta neelé#Tr 22.24, Ləb 25.35-37, TtG 23.20-21. 8Ndá m’ula dee m’pana: Gə goo siŋga sí lé ɓa jeḛ n’telje j’ugaje ne dɔ ŋgako̰ síje gə́ to Jibje gə́ ginkoji dəwje gə́ raŋg ndogo dee lé. Nɛ seḭ lé seḭ ndogoje ŋgako̰ síje ŋga see jeḛ ya tɔɓəi j’a tel ndogo deeje wa.
Deḛ d’isi guu ɓó d’oo ta gə́ kəm tel kilam keneŋ el. 9Tɔɓəi m’pana: Né gə́ seḭ raje lé to lée’g el. See kəm kar sí ɓəlje Ala lə sí loo-kaw sí’g el wa. Bèe ɓa ginkoji dəwje gə́ to njéba̰je lə sí d’a koo loo kula ne sul dɔ sí’g el. 10Ma kara jeḛ gə ŋgakɔmje gə kuraje ləm j’ar dee tona sí lar gə kó tɔ. Ar sí j’ya̰je goo ɓaŋg lə sí gə́ to dɔ dee’g lé. 11Ɓogənè ya, maji kar sí ar deeje ndɔje lə dee gogo ləm, gə ndɔ-nduúje lə dee ləm, gə kag-koiyoje lə dee ləm, gə kəije lə dee ləma, gə né gə́ taa manee dɔ’g gə́ wɔji dɔ lar gə kó gə mán-nduú gə́ sigi gə ubu gə́ seḭ taaje ji dee’g gə siŋga sí lé ləm tɔ.
12Deḛ tel d’ilam keneŋ pana: J’a telje gə néje lé kar dee ləm, j’a dəji deeje né el ləm tɔ to gə́ i pa lé ya.
Bèe ɓa ma m’ɓar njékinjanéməsje m’ar dee manrɔ dee no̰ dee’g gə mba kar ta lə dee lé d’a ra née ya. 13Gée gə́ gogo m’sugu kubu ləm gə́ boi yul lé bugu-bugu m’pana: Dəw gə́ rara gə́ aa dɔ ta nee lé el ndá maji kar Ala sugee mee kəi’g ləa əsé dan némajije’g ləa ilá togə́bè tɔ. Bèe ɓa dəw neelé d’a sugee sugu-sugu kyá̰ kari ba tɔ.
Koso-dəwje lai pana: Bèe ya. Deḛ d’ila riɓar dɔ Njesigənea̰’g. Ndá koso-dəwje d’ila koji dɔ ta’g neelé ya.
14Un kudee mee ndəa gə́ mbai undam ne gə́ njeguburuɓee gə́ Juda lé, un kudee mee ləb gə́ njekɔm’g rɔ-joo saar teḛ mee ləb gə́ njekɔm’g rɔ-munda-giree-joo gə́ Artajerjɛs to ne mbai lé as ləb dɔg-giree-joo lé ma əsé ŋgakɔmje lé lar gə́ wɔji dɔ njeguburuɓee ɓa j’usɔ el. 15Njéguburuɓeje gə́ nɔm’g kédé lé d’unda nékodo gə́ wɔi dɔ koso-dəwje’g taa ne muru lə dee ləm, gə taa ne mán-nduú lə dee ləma, gə ŋgan larnda rɔ-sɔ-sɔ ləm tɔ. Kuraje lə dee ya kara d’ula kəm koso-dəwje ndòo tɔ. Nɛ ma m’ɓəl Ala ɓó m’ra togə́bè el. 16Né gə́ raŋg gə́ maji dum ya ɓəi: ma m’ra kula gɔl ndògo-bɔrɔ neelé tɔɓəi jeḛ ndogoje loo-ndɔ kára kara el ndá jeḛ gə kuraje ləm lai j’aarje na̰’d ta kula’g ya. 17Dəwje gə́ m’ar dee d’aw səm gə́ d’usɔ səm né ta ka-nésɔ’g ləm lé d’as tɔl-dɔ-dee-rɔ-mi (150), Jibje ləm, gə njéko̰ɓeeje ləm tɔ orè dɔ njé gə́ raŋg gə́ ree rɔ sí’d gə́ to ginkoji dəwje gə́ gugu dɔ sí lé tɔ. 18Ndɔje kára-kára lai lé m’ar dee tɔl bɔ maŋg kára ləm, gə badje gə́ mbər dee d’as misa̰ ləma, gə yel-kulje ləm tɔ d’ar dee d’usɔ, ndá gə mee ndɔ dɔg-dɔg lé m’ar dee ra mán-nduú yaa̰ d’aree as béréré ləm tɔ. Lé bèe kara m’dəji lar gə́ wɔji dɔ njeguburuɓee el mbata kula lé wɔi dɔ koso-dəwje’g ya.
19Ǝi Ala ləm, maji kari ar məəi olé dɔm’d gə́ majee ya mbata néje lai gə́ m’ra mbata lə koso-dəwje neelé.
Currently Selected:
Nehemi 5: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
