Nehemi 4

1Nɛ Sanbalat gə Tobija gə́ to Arabə ləm, gə deḛ gə́ to Amo̰je ləma, gə njé gə́ Asdod ləm tɔ lé loo gə́ deḛ d’oo to gə́ kula gɔl ndògo-bɔrɔ lé aw kəmee gə́ kédé-kédé ləm, j’unje kudu k’udu kəm looje gə́ ta̰ lé ləm tɔ ndá meḛ dee ḭ sə dee pu. 2Ndá deḛ lai d’ɔm na̰’d gə mba ree rɔ gə Jerusalem mba tuji ne meḛ dəwje gə́ ra kula neelé. 3Yen ŋga jeḛ n’raje tamaji ta Ala’g lə sí ləm, jeḛ j’undaje njéŋgəmlooje dan kàrá gə loondul’g mba kar dee d’aḭ bada dɔ sí’g d’oma̰ ne sə dee ləm tɔ. 4Nɛ lé bèe kara njé gə́ Juda pana:

Deḛ gə́ d’odo néje lé siŋga dee as el

Ar kɔri mbalje gə ŋgwɔi néje to dɔ na̰’d rib-rib,

Ndá jeḛ j’a kaskəm kunda ndògo-bɔrɔ lé el ŋga.

5Njéba̰je lə sí kara pana: J’a gərje taree el ləm, j’a kooje el ləm tɔ saar loo gə́ n’a reeje dan sí’g ndá n’a tɔl síje. N’a raje togə́bè mba kɔg sí ne loo ra kula lé.

Deḛ gə́ d’aar ra kula lé nana kara aar gə nérɔ ləa-ləa

6Nɛ Jibje gə́ d’isi mbɔr dee’g dəb lé ree ndəji sí kɔr as gɔl dɔg dɔ looje gə́ njéba̰je lə sí d’a gə kḭ keneŋ ree rɔ sí’g lé. 7Gelee gə́ nee ɓa m’unda njérɔje gə goo gel-bɔje lə dee lə dee mee looje gə́ oso naŋg gir ndògo-bɔrɔ’g ləm, gə dɔ naŋg gə́ tudu kurum-kurum’g ləm tɔ ndá deḛ lai d’wa kiambasje əsé niŋga-ndəije əsé ɓandaŋgje lə dee ji dee’g ji dee’g. 8M’aa loo gərərə ndá m’ḭ tar m’ula dəwje gə́ boo ləm, gə njéko̰ɓeeje ləma, gə ges koso-dəwje gə́ nai ləm tɔ m’pana: Ɓəl deeje el! Arje meḛ sí olé dɔ Mbaidɔmbaije’g, yeḛ gə́ to gə́ boo ləm, to ɓəl kədm-kədm ləm tɔ. Rɔje mbata lə ŋgako̰ síje ləm, gə mbata lə ŋgan síje gə́ diŋgam gə njé gə́ dené ləm, gə mbata lə denéje lə sí ləma, gə mbata lə kəije lə sí ləm tɔ.

9Loo gə́ njéba̰je lə sí d’oo to gə́ d’ula sí ta lə dee ndá Ala ar néje gə́ d’wɔji meḛ dee’g mba ra lé tuji pugudu tɔɓəi jeḛ lai n’tel n’reeje ta kula gɔl ndògo-bɔrɔ’g lé ar nana kara aar loo-kula’g ləa-ləa ya. 10Un kudee mee ndəa’g neelé ges kuraje ləm ɓa ra kula ndá ges deeje gə́ raŋg lé d’aar gə niŋga-ndəije ləm, gə dərje ləm, gə ɓandaŋgje ji dee’g ji dee’g ləma, gə kubu-rɔje ləm tɔ. Deḛ gə́ to ŋgan-mbaije lé d’ɔm na̰’d sad gə gel-bɔje lə Judaje lai ya. 11Deḛ gə́ d’unda ndògo-bɔrɔ lé ləm, gə deḛ gə́ d’odo néje gə́ wɔi-wɔi ləm tɔ lé ra kula gə ji dee gə́ kára ləm, ji dee gə́ kára lé d’wa ne nérɔ ləm tɔ. 12Nana kara tɔ kiambas ləa ɓəree’g ɓəree’g ɓa ra ne kula. Yeḛ gə́ njekim to̰to̰ lé ɓa aar mbɔrm’g dəb. 13Ma m’ula dəwje gə́ boo ləm, gə njéko̰ɓeeje ləma, gə ges koso-dəwje gə́ nai ləm tɔ m’pana: Kula to yaa̰, to rəg-rəg ndá jeḛ n’sanéje-na̰ dɔ ndògo-bɔrɔ’g lé j’aarje əw-əw gə mar síje. 14Loo gə́ rara ɓa gə́ arje keneŋ lé ɓó lé to̰to̰ ɓar ndá mbo̰je na̰ reeje rɔ sí’g loo gə́ ooje ndu to̰to̰ keneŋ lé. Ala lə sí a rɔ mbata lə sí ya.

15Togə́bè ɓa jeḛ n’raje ne kula lé gə́ kédé-kédé ar ges sí gə́ na̰je d’aar gə niŋga-ndəije ji dee’g un kudee loo gə́ kàr uba bər ya saar-saar ar kéréméje teḛ tɔ. 16Mee ndəa gən ya m’ula koso-dəwje tɔɓəi m’pana: Maji kar nana kara gə kura ləa lé loondul ndá d’a to Jerusalem ya. Ar sí ŋgəmje loo loondul’g, nɛ dankàrá ndá ar sí n’raje kula. 17Ma əsé ŋgakɔmje əsé kuraje ləm əsé dəwje gə́ njékaa-dɔ-looje gə́ d’aw goom’g lé, dəw kára kara gə́ mbuna sí’g lé ɔr kubu ləa rəa’g el tɔ. Nana kara nérɔ gə mán ɓa wa jia’g-jia’g tɔ.

Currently Selected:

Nehemi 4: SBA2015

Highlight

Copy

Compare