Nehemi 1
1
Tamaji gə́ Nehemi ra mbata lə Israɛlje lé
1Taje gə́ Nehemi, ŋgolə Hakalia pa lé, pana: Mee naḭ gə́ ɓaree Kislə, gə mee ləb gə́ njekɔm’g rɔ-joo lé, loo gə́ m’isi Susə gə́ to ɓee-boo lé ndá 2ŋgokɔm gə́ kára gə́ ria lə Hanani ləm, gə dəwje gə́ na̰je gə́ d’ḭ ɓee gə́ Juda ləm tɔ lé ree rɔm’g. M’dəji dee ta gə́ wɔji dɔ Jibje gə́ nai gə́ d’wa dee ɓər el lé ləm, m’dəji dee ta gə́ wɔji dɔ Jerusalem ləm tɔ. 3Deḛ tel d’ilam keneŋ pana: Ges deḛje gə́ nai gə́ d’wa dee gə́ ɓərje el lé d’isi dəb ɓeeko̰je’g Juda dan némeekonje gə́ al dɔ loo sula ləm, gə dan boo-rɔkul’g ləm tɔ, ndògo-bɔrɔ gə́ Jerusalem təd ləm, tarəwkɔgje ləa kara pər o̰ ləm tɔ.
4Loo gə́ m’oo ta néje neelé ndá m’wa naŋg rəb, m’no̰ ləm, m’wa ndòo as ndɔje bula ləm tɔ. M’ɔg məəm ɓó ləm, m’ra tamaji ta Ala gə́ to mbai dɔ dara ləm tɔ, 5Ma m’pana: Ǝi Njesigənea̰, Ala, i gə́ to mbai dɔ dara ləm, i gə́ to Ala gə́ boo gə́ to ɓəl kədm-kədm ləm, i gə́ aa dɔ manrɔ ləi kər-kər ləma, i gə́ to njekookəmtondoo lə deḛ gə́ d’undai dan kəm dee’g d’aa ne dɔ godnduije kər-kər ləm tɔ lé 6maji kari ur mbii gèŋ ləm, gə teḛ kəmi ləm tɔ gə mba k’oo ne tamaji ləm ma, kura ləi gə́ m’ra tai’g lé. Ɓasinè, dan kàrá gə loondul’g lé, m’no̰ tai’g mbata lə kuraje ləi gə́ Israɛlje lé ya. M’teggin kaiya lə Israɛlje, kaiya lə sí gə́ jeḛ n’ra j’ɔsje ne ta ləi rəw lé. Mbata ma jeḛ gə gel-bɔje lə bɔmje lé jeḛ n’raje kaiya ya. 7Jeḛ n’raje majel j’ɔsje ne ta ləi rəw ləm, jeḛ j’aaje dɔ godnduije əsé ndukunje gə́ i ar Moyis, kura ləi pa taree lé el ləm tɔ. 8Maji kari ar məəi olé dɔ ta gə́ i ar kura ləi Moyis, pa pana: Loo gə́ jeḛ j’a raje kaiya ndá i a sané sí mbuna koso-dəwje’g#Ləb 26.33. 9Nɛ ɓó lé jeḛ n’tel reeje rɔi’g ləm, ɓó lé jeḛ j’aaje dɔ godnduije n’raje née ləm tɔ ndá lé d’a kwa sí ɓər kaw sə sí rudu dara’g kara lée gə́ neelé ɓa i a mbo̰ sí dɔ na̰’d ləm, i a tel ree sə sí loo gə́ i ɔr unda gə mba kar rii ɓar keneŋ lé ləm tɔ#TtG 30.1-5. 10Jeḛ lé n’toje kuraje ləi gə koso-dəwje ləi gə́ i uga sí gə goo boo-siŋgamoŋ ləi ləm, gə jii gə́ ɓar mèr-mèr ləm tɔ. 11Ai, Mbaidɔmbaije, maji kari ur mbii gèŋ oo ne tamaji lə kura ləi ləm, gə tamaji lə kuraje ləi gə́ ndigi ɓəl rii ləm tɔ. Ɓogənè lé, ar kura ləi teḛkɔr ləm, aree taa kəm dəw neelé rəgm ləm tɔ!
Mee ndəaje’g neelé ma m’to gə́ njekar mbai nékai ya.
Currently Selected:
Nehemi 1: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
