Esdras 10
10
Israɛlje tuba denéje gə́ ginkoji dee raŋg lé
1Loo gə́ Esdras oso naŋg bəbərə gə mán-no̰ kəmee’g ra ne tamaji neelé teg ne gin kaiya neelé ndá koso-Israɛlje bula ree mbo̰ dɔ na̰ rəa’g, diŋgamje ləm, gə denéje ləma, gə ŋganje ləm tɔ, dəwje neelé no̰ gə mán-no̰ kəm dee’g ɓugudu-ɓugudu. 2Yen ŋga Sekania, ŋgolə Jehiel gə́ to gə́ mbuna gel-bɔje’g lə Elam lé un ta ula Esdras pana: Jeḛ n’raje kaiya j’ɔs ne Ala lə sí rəw loo gə́ jeḛ n’taaje denéje gə́ ginkoji dee raŋg gə́ mee ɓee’g neelé. Nɛ lé bèe kara ɓasinè né gə́ kəm kar Israɛlje d’unda meḛ dee yel dɔ’g lé to keneŋ ya ɓəi. 3Ɓasinè lé ar sí manje rɔ sí j’arje Ala lə sí gə mba tuba denéje neelé gə ŋgan meḛ deeje na̰’d gə goo takwɔji lə mbai ləm, gə ka̰ dee-deḛ lai gə́ d’unda bala no̰ godndu Ala lə sí ləm tɔ. Maji kar sí n’raje gə goo godndu lé ya. 4Maji kari ḭta mbata to ta gə́ wɔji dɔi-i ya. Jeḛ lé j’a kɔmje səi na̰’d tɔ. Wa diŋgam məəi’g mba ra née ya.
5Esdras ḭta ndá yeḛ ar mbai dɔ njékinjanéməsje ləm, gə Ləbije ləma, gə Israɛlje lai ləm tɔ manrɔ dee gə mba ra to gə́ pa taree lé ya. Ndá deḛ manrɔ dee togə́bè ya tɔ. 6Yen ŋga Esdras uba naŋg takəi-Ala’g ḭ aw mee kəi’g lə Jokana, ŋgolə Eliasib. Loo gə́ yeḛ andə keneŋ mba̰ ndá yeḛ o̰ muru el ləm, ai mán el ləm tɔ mbata yeḛ si wa ndòo mbata kaiya ra dee gə́ d’ḭ ɓee-ɓər’g tel ree ɓee lé.
7Deḛ d’ila mber mee ɓee gə́ Juda’g gə mee ɓee gə́ Jerusalem’g gə mba kar deḛ lai gə́ d’ḭ ɓee-ɓər’g tel ree ɓée lé d’a kwa dɔ na̰ Jerusalem, 8tɔɓəi gə goo ndukun lə ŋgan-mbaije gə ŋgatɔgje lé nana ɓa gə́ teḛ keneŋ mee ndɔ gə́ munda’g lé el ndá d’a taa néje ləa mbad ləm, yeḛ nja kara d’a kɔgee loo-siée loo-kwa-dɔ-na̰’g lə deḛ gə́ d’ḭ ɓee-ɓər’g tel ree lé ləm tɔ.
9Ndɔ munda gogo lé diŋgamje lai gə́ Juda gə Bḛjami d’wa dɔ na̰ Jerusalem. To ndɔ gə́ njekɔm’g rɔ-joo mee naḭ gə́ njekɔm’g jinaikara’g. Koso-dəwje lai d’isi ndaa-loo gə́ takəi-Ala’g, d’unda bala tigi-tigi mbata lə ta neelé ləm, gə mbata lə ndi gə́ ər yaa̰ ləm tɔ. 10Esdras, njekinjanéməs lé ḭta ula dee pana: Seḭ raje kaiya loo gə́ seḭ taaje denéje gə́ ginkoji dee raŋg arje ta wa ne dɔ Israɛlje unda nje gə́ kédé. 11Ɓasinè, maji kar sí tegje gin kaiya lə sí arje Njesigənea̰ gə́ to Ala lə bɔ síje-je ndá gə́ raje torndia. Undaje rɔ sí ɓad rɔ dəwje gə́ mee ɓee’g nee ləm, gə rɔ denéje gə́ to ginkoji gə́ raŋg’d ləm tɔ.
12Dəwje lai gə́ d’wa dɔ na̰ lé d’ɔr ndu dee gə́ tar wəl pana: J’a ra to gə́ i pa lé ya. 13Nɛ dəwje lé bula yaa̰, tɔɓəi to naḭ ndi tɔ ndá j’askəm si raga el. Tɔɓəi kula neelé to kəm ra ndɔ kára əsé ndɔ joo ba el mbata dəwje bula mbuna sí’g ra né neelé tɔ. 14Bèe ndá maji kar ŋgan-mbaije lə sí ɓa nai tor koso-dəwje’g lé. Ndá deḛ lai gə́ d’isi mee ɓee-booje’g lə sí gə́ taa denéje gə́ ginkoji dee raŋg lé d’a ree mee ndəaje’d gə́ d’a kwɔji kar dee lé, d’a ree gə ŋgatɔgje gə njégaŋ-rəwtaje gə ɓee lə dee lə dee saar kar boo-oŋg lə Ala lə sí ḭ ne dɔ sí’d gə́ raŋg mbata né neelé ɓa.
15Jonatan, ŋgolə Ajael, gə Jajia, ŋgolə Tikba ɓa gə kar dee ba ndigi sə dee dɔ ta’g neelé el ar Mesulam gə Sabetai gə́ to Ləbije kara d’ɔm sə dee na̰’d tɔ, 16nɛ deḛ gə́ d’ḭ ɓee-ɓər’g tel ree lé ra to gə́ deḛ pa lé ya. Deḛ d’ɔr Esdras, njekinjanéməs ləm, gə deḛ gə́ to mbai dɔ gel-bɔje gə goo kəije lə bɔ deeje-je gə goo ri dee ri deḛ lai ləm tɔ, ndá d’isi mba koo goo ta né neelé mee ndɔ gə́ dɔtar lə naḭ gə́ njekɔm’g dɔg lé. 17Ndá ndɔ gə́ dɔtar lə naḭ gə́ dɔtar’g lé deḛ tɔl ta gə́ wɔji dɔ diŋgamje gə́ taa denéje gə́ ginkoji dee raŋg lé bém.
18Mbuna njékinjanéməsje’g lé deḛ gə́ taa denéje gə́ ginkoji dee raŋg gə́ d’isi keneŋ lé ɓa nee: Deḛ gə́ to gel-bɔje lə Juje gə ŋgakea̰je gə́ to ŋgalə Josadak lé ndá Maaséja, gə Eliéjer, gə Jarib, gə Gedalia lé, 19d’un ndu dee gə ndu manrɔ mba tuba denéje lə dee ləm, gə mba kinja bàl badə gə́ nékinjaməs gə́ wɔji dɔ kal dɔ godndu ləm tɔ. 20Deḛ gə́ to gel-bɔje lə Imer ndá Hanani gə Jebadia, 21deḛ gə́ to gel-bɔje lə Harim ndá Maaséja, gə Eli, gə Semaeja, gə Jehiel, gə Ojee, 22deḛ gə́ to gel-bɔje lə Pasur ndá Eljoenai, gə Maaséja, gə Ismael, gə Netaneel, gə Jojabad, gə Eləasa.
23Deḛ gə́ to Ləbije ɓa nee: Jojabad, gə Simei, gə Kelaja əsé Kelita, gə Petaja, gə Juda, gə Eliéjer.
24Deḛ gə́ to bao-paje ɓa nee: Eliasib.
Deḛ gə́ to njéŋgəm takəije ɓa nee: Salum, gə Telem, gə Uri.
25Deḛ gə́ to Israɛlje ɓa nee: Deḛ gə́ to gel-bɔje lə Pareos ndá Ramia, gə Jijija, gə Malkija, gə Mijamḭ, gə Eləajar, gə Malkija, gə Benaja, 26deḛ gə́ to gel-bɔje lə Elam ndá Matania, gə Jakari, gə Jehiel, gə Abdi, gə Jeremot, gə Eli, 27deḛ gə́ to gel-bɔje lə Jatu ndá Eljoenai, gə Eliasib, gə Matania, gə Jeremot, gə Jabad, gə Ajija, 28deḛ gə́ to gel-bɔje lə Bebai ndá Jokana, gə Hanania, gə Jabai, gə Atlai, 29deḛ gə́ to gel-bɔje lə Bani ndá Mesulam, gə Maluk, gə Adaja, gə Jasub, gə Səal, gə Ramot, 30deḛ gə́ to gel-bɔje lə Pahat-Moab ndá Adna, gə Kelal, gə Benaja, gə Maaséja, gə Matania, gə Besalel, gə Binui, gə Manasə, 31deḛ gə́ to gel-bɔje lə Harim ndá Eliéjer, gə Jisija, gə Malkija, gə Semaeja, gə Simeo̰, 32gə Bḛjami, gə Maluk, gə Semaria, 33deḛ gə́ to gel-bɔje lə Hasum ndá Matnai, gə Matata, gə Jabad, gə Elipelet, gə Jeremai, gə Manasə, gə Simei 34deḛ gə́ to gel-bɔje lə Bani ndá Maadai, gə Amram, gə Uel, 35gə Benaja, gə Bedia, gə Keluhu, 36gə Bania, gə Meremot, gə Eliasib, 37gə Matania, gə Matnai, gə Jasai, 38gə Bani, gə Binui, gə Simei, 39gə Selemia, gə Natan, gə Adaja, 40gə Maknadbai, gə Sasai, gə Sarai, 41gə Ajareel, gə Selemia, gə Semaria, 42gə Salum, gə Amaria, gə Jisəb, 43deḛ gə́ to gel-bɔje lə Nebo ndá Jeyel, gə Matitia, gə Jabad, gə Jebina, gə Jadai, gə Joɛl, gə Benaja.
44Deḛje lai neelé taa denéje gə́ ginkoji dee raŋg ləm, njé gə́ na̰je bula mbuna dee’g d’oji ne ŋganje ləm tɔ.
Currently Selected:
Esdras 10: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
