Nahum 3
3
Tuji-boo a koso dɔ ɓee-boo gə́ Ninibə’g
1Meeko̰ a koso dɔ ɓee-boo gə́ njékila məsje d’isi keneŋ ləm,
Gə njétaŋgɔmje gə njéra né kərm-kərmje taa loo keneŋ pəl-pəl ləma,
Gə deḛ gə́ d’ya̰ goo gayim lə dee el ləm tɔ.
2Aa ooje, kaa ndəi gə kaa gɔl pusu-rɔje gə kaa gɔl kundaje
Ɓar keneŋ ləm,
Kaa pusu-rɔje gə́ nduburu lé kara ɓar keneŋ ləm tɔ.
3Njérɔ gə kundaje d’aw kalaŋ ləm,
Kiambasje lə dee kel pəji-pəji ləma,
Niŋga-ndəije lə dee ndɔḭ pəl-pəl ləm tɔ.
Koso-njérɔje gə́ bula digi-digi d’iŋga doo ləm,
Nin dee to naŋg rib-rib ləm,
D’wəi gə́ kédé-kédé ləma,
Deḛ toso dɔ yoo na̰’g ləm tɔ.
Rɔkul dəb dɔ Ninibə’g
4To mbata boo-néraje lə Ninibəje
Gə́ to asəna gə néra kaiya-denéje
Gə́ ra rɔ dee ma̰də ləm, ra goso su ne kəm loo ləm,
Gə́ ndogo ne ginkoji dəwje gə raŋg gə nérakaiyaje lə dee ləma,
Ndogo koso-dəwje gə nésukəmlooje lə dee ləm tɔ.
5Njesigənea̰ gə́ njeboo-néje lé pana:
Aa ooje, neḛ n’aw sə sí gə ta.
N’a tusu kubuje lə sí rɔ sí’g saar teḛ ne kəm sí gə́ tar ləm,
N’a kar ginkoji dəwje gə raŋg d’oo meembaa sí ləma,
N’a kar ɓeeko̰je d’oo rɔkul lə sí ləm tɔ.
6N’a kɔm néje gə́ mina̰ dɔ sí’g
Mba kar sí tel toje ne né gə́ to kḛji ləm,
N’a kar sí tel toje némbo̰ kəm sɔmɔmo̰ dɔ’g ləm tɔ.
7Deḛ lai gə́ d’a koo sí lé
D’a kaḭ kunda rɔ dee ŋgərəŋ pana:
Ninibə lé tuji pugudu mba̰!
See na̰ ɓa a no̰ nea̰ wa.
See loo gə́ ra ɓa n’a saŋg njégɔl meḛ síje keneŋ wa.
Né gə́ teḛ dɔ ɓee gə́ No-Amo̰ lé a teḛ dɔ ɓee gə́ Ninibə’g tɔ
8I ɓee gə́ Ninibə lé see i to maji ur dɔ ɓee gə́ No-Amo̰
Gə́ to mbuna baa-booje’g dana bab ləm,
Ar manje d’aḭ dəa sub ləma,
Ar baa-boo-kad ɓa gə́ loo-kɔn-rɔ ləa gə ndògo ləa ləm tɔ lé wa.
9Etiopije gə Ejiptəje gə́ bula digi-digi ɓa to gə́ gin siŋgá ləm,
Putje gə Libije to gə́ njéla səaje ləm tɔ.
10Lée togə́bè kara dəw-mee-ɓeeje gə́ keneŋ d’aw sə dee ɓee-ɓər’g ləm,
Ŋganeeje kara kunda dee vaga-vaga tɔl dee tɔ-rəwje’g lai ləm,
Deḛ ra né asəna gə téḛ dɔ dəwje gə́ boo’d ge keneŋ ləma,
Mbaije lə dee kara deḛ tɔ dee gə kúla larje ləm tɔ.
11Seḭ gə́ Ninibə ya kara némeeko̰ a ra sí to gə́ kido bèe
Kar sí iyaje ne rɔ sí ləm,
Seḭ ya kara a saŋgje njo̰loo kula dɔ sí keneŋ
Taaje ne rɔ sí ji njéba̰je’g lə sí ləm tɔ.
Ninibəje d’askəm kaar gəs el
12Kəi-kaar-kɔgərɔje lə sí lai
To d’asəna gə kag-kodéje gə́ kandə dee gə́ dɔtar kas bèe,
Loo gə́ yə dee ndá
Kandə dee gəḭ wududu ta dəw gə́ ndigi sɔ dee’g.
13Aa ooje, koso-dəwje lə sí to d’asəna gə denéje gə́ mee ɓee’g lə sí ləm,
Tarəwkɔgje lə ɓee lə sí teḛ to tag bə̰dəŋ no̰ njéba̰je’g lə sí ləma,
Pər roo pəgərə tarəwje lə sí ləm tɔ.
14Seḭ Ninibəje lé maji kar sí toje mán mbata d’a gə gugu dɔ sí sub gə rɔ!
Waje dɔ gɔl kəi-kaar-kɔgərɔje lə sí ləm,
Urje bɔrɔ, mbɔḭje a̰ji ləma,
Nṵgaje dərŋgelje ləm tɔ!
15Nɛ lé neelé ɓa pər a roo sí keneŋ ləm,
Kiambas a tuji sí pugudu ləma,
A tuji sí to gə́ beedéje bèe ləm tɔ.
Maji kar sí toje dɔ na̰’d rib-rib to gə́ ndirikɔrje bèe ləm,
Toje dɔ na̰’d rib-rib to gə́ beedéje bèe ləm tɔ!
16Njérab-néndogoje lə sí bula d’unda kéréméje bèe ləm,
Deḛ to d’asəna gə beedéje gə́ nar bag d’ḭ d’aw bèe ləm tɔ.
17Dəwje lə sí gə́ boo to d’asəna gə beedéje bèe ləm,
Mbaije lə sí kara to d’asəna gə beedéje gə́ bula digi-digi
Gə́ to dɔ ŋgalaŋje’g loo gə́ kul o̰ bèe ləm tɔ.
Loo gə́ kàr teḛ ndá deḛ d’ḭ d’aw
Nɛ dəw oo loo gə́ d’ḭ d’aw gə́ keneŋ el.
Tuji-boo gə́ loo gɔlee godo
18I mbai gə́ Asiri, njékul dəwje ləi lé toɓi,
Bao-rɔje ləi d’wa rɔ dee,
Koso-dəwje ləi sané na̰ dɔ mbalje’g
Ndá dəw kára kara gə́ njembo̰ dee dɔ na̰’d godo.
19Kuma̰ gə́ a kar ta doo ləi ər kəmsə lé godo,
Doo ləi to doo gə́ as yoo.
Deḛ lai gə́ d’a koo ta ləi
D’a kunda ji dee rag-rag dɔi’g,
Mbata see na̰ ɓa némeeyèr ləi lal kɔrɔ rəa wa.
Currently Selected:
Nahum 3: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.