Habakuk 1
1
1Ndərta gə́ Njesigənea̰ riba dəa ar Habakuk, njetegginta oo lé.
Habakuk no̰ mbata dəwje gə́ d’ɔr kəm ta gə goo rəbee el lé
2Ǝi Njesigənea̰, see ndɔ gə́ ra ɓa a koo ta ləm wa.
M’ra ne wəl gə́ rɔi’g
Nɛ i oo ta ləm el.
M’ra né wəl mbata néraje gə́ kərm-kərm gə́ m’isi danee’g
Nɛ i la səm el.
3See gelee ban ɓa i am m’oo néra kori-kori ləm,
I kara aa né gə́ gə dɔ najee el lé gə́ kaa ya bèe wa.
See gelee ban ɓa kula kəm loo ndòo
Gə néra gə́ kərm-kərm ɓa to nɔm’g bèe wa.
Ta kɔl na̰ gə ta tḭ-na̰ ɓa to keneŋ.
4Bèe ɓa godndu lé siŋgá godo ne ləm,
Rəwta-gaŋg kara kul ne kwɔji-kwɔji ləm tɔ,
Mbata njemeeyèr lé dum dɔ njera nédana ləm,
Njégaŋ-rəwtaje gaŋg ne ta gə goo rəbee el ləm tɔ.
Ta kila’g lə Njesigənea̰
5Maji kar sí ilaje kəm sí dɔ ginkoji dəwje gə raŋg’g oo deeje,
Arje kaar sí wa sí paḭ ləm, arje ɓəl unda sí badə gaŋg sí ləm tɔ!
Mbata mee ndɔje gə́ sije kəmba’g lé né gə́ to ɓəl a dəs ya.
Ɓó lé dəw ɔr gée ar sí kara seḭ a kɔmje meḛ sí dɔ’g el .
6Aa ooje, n’a gə kɔs Kaldeje ɓɔḭ-ɓɔḭ
Deḛ lé to koso-dəwje gə́ to njéo̰gje gə njémeekḭ juguguje ləm,
Deḛ d’unda tad ɓee gə dɔ naŋg dana gaŋg
Gə mba kaw taa loo-sije gə́ to ka̰ dee-deḛ el lé ləm tɔ .
7Deḛ to ɓəl kədm-kədm ar dəwje ɓəl dee ne ləm,
Deḛ ti rɔ dee d’wɔji ne dɔ né gə́ kəm kar dee ra ləma,
D’wɔji ne loo-boo lə dee ləm tɔ.
8Kundaje lə dee d’aiŋgwɔd kalaŋ d’unda daje gə́ tana gə da-kàgje bèe ləm,
Deḛ d’ila riŋga d’unda jagmjərje gə́ kàrkemetag bèe ləma,
Njérɔ gə kundaje lə dee ti rɔ dee
D’aw ne kəm dee gə́ kédé-kédé ləm tɔ.
Njérɔ gə kundaje lə dee lé d’ḭ əw ɓa ree ləm,
Deḛ d’aw gə tɔg dee to gə́ niŋgatə̰də
Gə́ nar gə bagee dəb dɔ nékwa’g ləa bèe ləm tɔ.
9Bao-rɔje neelé ree mba kula rɔ dee mbiriri loo kodo nébanrɔ’g,
Kəm dee ɔs loo pal-pal gə́ kédé ləm,
Deḛ d’wa ɓərje bula
Mbo̰ dee dɔ na̰’d to gə́ nagəra bèe ləm tɔ.
10Deḛ d’ula sul dɔ mbaije’g ləm,
D’oo dəwje gə́ boo lé gə́ nékogo ləm tɔ,
Deḛ kogo dɔ kəi-kaar-kɔgərɔje’g lai lé
D’oo gə́ né el ləm,
Deḛ d’uba dɔndalje taa dee ne ləm tɔ,
11Deḛ dəs kalaŋ to gə́ lel-mal bèe ləm,
Deḛ njaa kəm dee gə́ kédé d’ar ta wa dɔ dee ləm tɔ.
Deḛ d’oo Siŋgamoŋ lə dee-deḛ nja ɓa gə́ magə lə dee ya.
Habakuk no̰ rɔ Njesigənea̰’g ya ɓəi
12Njesigənea̰, Ala ləm, i njerɔkunda ləm,
See i ɓa sí keneŋ kédé par-par lé el wa.
Jeḛ j’a kwəi el!
Ǝi Njesigənea̰, i ɓa unda koso-dəwje neelé
Mba kar dee to njégaŋ-rəwtaje ləi,
Ǝi i kɔr mbal ləm lé, i ɔs kudu dee
Mba kar d’ar bo̰ néra dəwje ɔs ta dee’g.
13Kəmi àr ŋgad-ŋgad kəm kila dɔ né gə́ majel’g el ləm,
I un kəmi rəw dɔ néra gə́ kori-kori’g lé ləm tɔ.
See gelee ban ɓa i aa njéndɔji pɔdɔdɔje gərərə
Ndá ila tai maree’g ndag
Loo gə́ njemeeyèr aar busu yeḛ gə́ nérea to gə dɔ najee undá-yeḛ lé ɓəi wa.
14See dəw lé i a ra səa to gə́ ka̰jije gə́ dan baa-boo-kad’g ləm,
Gə ŋgan néje gə́ d’ag naŋg gə ta meḛ dee gə́ ɓée deeje godo bèe ləm tɔ wa.
15Kaldeje lé d’wa dəwje lai gə kii teḛ sə dee raga ləm,
Deḛ ndɔr dee ɓul bura’g lə dee teḛ sə dee ləma,
Deḛ kiri dee gə bura-masaŋ lə dee ləm tɔ,
Yee ɓa deḛ d’isi ne dan rɔlel’g d’al ne rɔ dee.
16Gelee gə́ nee ɓa deḛ d’inja ne nékinjaməs d’ar buraje lə dee ləm,
Deḛ roo ne néje gə́ ə̰də sululu d’ar bura-masaŋ lə dee ləm tɔ.
Mbata mbɔl dɔ dee ɓa kɔr naḭ ubu lə dee to ne keneŋ ləm,
Nésɔ lə dee gə́ lel ta’g lé
Taa ne rɔ dee pəl-pəl ləm tɔ.
17See d’a tɔr néje mee bura’g lə dee gə́ kédé-kédé wa.
See d’a tḭja gwɔs ginkoji dəwje gə raŋg gə́ kédé-kédé lal koo ne kəmtondoo lə dee wa.
Currently Selected:
Habakuk 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.