Ləbije 23

Naḭje lə Israɛlje gə́ ɓəd-ɓəd: Ndɔ-kwa-rɔ

1Njesigənea̰ ula Moyis 2karee ula Israɛlje pana:

Ndɔ ra naḭje lə Njesigənea̰ gə́ seḭ a kilaje mberee lé a to loo-mbo̰-dɔ-na̰ gə́ to gə kəmee gə mba kwam ne meḛ sí’g. Ndɔ ra naḭje ləm lé ɓa nee:

3D’a ra kula ndɔ dee misa̰, nɛ ndɔ gə́ njekɔm’g siri lé to ndɔ-kwa-rɔ gə́ to ndɔ kya̰ goo kula ləm tɔ loo-mbo̰-na̰ gə́ to gə kəmee mba kwam ne meḛ sí’g ləm tɔ. Seḭ a raje kula mee loo-si síje’g lai el tɔ, to ndɔ-kwa-rɔ lə Njesigənea̰ ya#Tr 20.8-10, 23.12, 31.15, 34.21, 35.2, TtG 5.12-14.

4Ndɔ ra naḭje lə Njesigənea̰ gə́ raŋg, gə́ to loo-mbo̰-dɔ-na̰je gə́ to gə kəmee mba kwam ne meḛ sí’g, gə́ seḭ a kilaje mberee mee ndɔje gə́ wɔji dɔ dee lé ɓa nee:

Naḭ Pag gə naḭ muru gə́ lal əm-tiné

5Ndɔ dɔg-giree-sɔ lə naḭ gə́ dɔtar un kudee loo gə́ kàr a kandə lé to ndɔ Pag lə Njesigənea̰ ya#Tr 12.1-13, TtG 16.1-2.

6Ndɔ dɔg-giree-mi lə naḭ gə́ neelé a to ndɔ ra naḭ gə́ ka̰ muru gə́ lal əm-tiné kwɔji ne dɔ Njesigənea̰, as ndɔ sí siri lé, seḭ a ko̰je muru gə́ lal əm-tiné ya#Tr 12.14-20, 23.15, 34.18, TtG 16.3-8. 7Mee ndəa gə́ dɔtar lé seḭ a mbo̰je dɔ na̰ kwamje meḛ sí’g: seḭ a raje kula gə́ seḭ aw raje ta-ta lé el. 8As ndɔ siri lé seḭ a kinjaje nékinjanéməsje gə́ ka̰ roo karje Njesigənea̰. Ndɔ gə́ njekɔm’g siri lé ndá seḭ a mbo̰je dɔ na̰ kwamje meḛ sí’g: Seḭ a raje kula gə́ seḭ aw raje ta-ta lé el.

Naḭ gə́ wɔji dɔ kó gə́ doŋgɔr

9Njesigənea̰ ula Moyis pana: 10Ula Israɛlje pana:

Loo gə́ seḭ a ka̰dje mee ɓee gə́ ma m’ar sí ɓa seḭ injaje kó keneŋ ndá seḭ a reeje gə dɔ kó gə́ doŋgɔr gə́ seḭ injaje lé mba karje njekinjanéməs. 11Dɔ kó neelé yeḛ ra nduree no̰ Njesigənea̰’g kunda ne gə kəmee mba karee taa kəmee, goo ndɔ gə́ njekorè goo ndɔ ndɔ-kwa-rɔ’g ya. 12Ndɔ gə́ seḭ a raje ndur dɔ kó kundaje ne gə kəmee ndá seḭ a kinjaje gwɔs ŋgon badə gə́ ra ləb kára ba ləm, gə́ rəa ya̰ maree el ləm tɔ, gə́ nékinjaməs gə́ ka̰ roo karje Njesigənea̰ ya, 13Nékar gə́ to nduji gə́ seḭ a korèje na̰’d gə nékinjaməs lé a to nduji gə́ ndá léréré as nékwɔji kwɔi-lə-né misa̰ gə́ seḭ a mbɔḭje gə ubu asəna gə nékar gə́ ka̰ roo gə́ baḭyee ə̰də lel Njesigənea̰, tɔɓəi a karje nékar gə́ ka̰ tər naŋg gə́ to mán-nduú gə́ mḭ as litər kára gə́ gesee tɔ. 14Seḭ a ko̰je muru el ləm, a sɔje dɔ kó gə́ yɔlé əsé yee gə́ ndao el ləm tɔ saar ndɔ gə́ seḭ a kunje nékarje lə sí kar Ala ɓa. Yee ɓa to godndu gə́ a to gə no̰ mbata lə ŋgaka síje mee loo gə́ rara-rara gə́ seḭ a síje keneŋ lé ya.

Naḭ kinja koje

15Seḭ a turaje ndɔ siri-siri gɔl siri un kudee mee ndɔ gə́ njekorè goo ndɔ-kwa-rɔ’g, loo gə́ seḭ unje dɔ kó gə́ ka̰ ra nduree kunda ne gə kəmee lé#Tr 23.16, 34.22, TtG 16.9-12. 16Seḭ a turaje ndɔ rɔ-mi saar ndɔ gə́ njekorè goo ndɔ-kwa-rɔ gə́ njekɔm’g siri ndá seḭ a reeje gə nékar gə́ sigi, karje Njesigənea̰. 17Seḭ a kḭje mee kəije’g lə sí gə pil muru joo-joo kawje ne mba kar dee ra nduree gə mba kundá ne gə kəmee, d’a to pil muru gə́ ra dee gə nduji gə́ ndá léréré ləm, gə koro gə əm-tiné ləm tɔ: to gə́ dɔ kó gə́ doŋgɔr gə́ d’un d’ar Njesigənea̰ ya. 18Né gə́ seḭ a korèje dɔ muru’g neelé a to ŋgan badje siri gə́ ra ləb dee kára-kára gə́ rɔ dee ya̰ maree el ləm, gə bɔ maŋg kára ləma, gə bàl badje joo ləm tɔ gə́ nékinjaməs gə́ ka̰ roo kar Njesigənea̰, nékar gə́ to nduji gə nékar gə́ ka̰ tər naŋg ta-ta lé seḭ a korèje na̰’d gə néje neelé mba karee to nékar gə́ ka̰ roo gə́ baḭyee ə̰də lel Njesigənea̰ tɔ. 19Seḭ a kinjaje gwɔs bàl bya̰ kára gə́ nékinjaməs gə́ ka̰ kuga dɔ kaiya ləm, gə ŋgan badje joo gə́ ra ləb dee kára-kára gə́ nékinjaməs gə́ ka̰ kɔm na̰’d ləm tɔ. 20Njekinjanéməs a ra da nékinjanéməsje neelé no̰ Njesigənea̰’g mba kunda gə kəmee na̰’d gə muru dɔ kó gə́ doŋgɔr ləm, gə ŋgan badje gə́ joo lé ləm tɔ, d’a kunda dee gə kəmee mbata lə Njesigənea̰ ləm, d’a to ka̰ njekinjanéməs ləm tɔ. 21Mee ndəa gən lé ya, seḭ a kilaje mbər naḭ neelé ndá seḭ a mbo̰je dɔ na̰ kwamje meḛ sí’g: seḭ a raje kula gə́ seḭ aw raje ta-ta lé el. Yee ɓa to godndu gə́ to gə no̰ mbata lə ŋgaka síje mee looje lai gə́ seḭ a síje keneŋ lé.

22Loo gə́ seḭ a kinjaje dɔ kó mee ɓee’g lə sí ndá seḭ a kya̰je kil ndɔje lə sí lal kinja kó keneŋ ləm, yee gə́ nai gə́ kəm kwa ɓuru lé seḭ a kwaje ləm-ləm el ləm tɔ. Seḭ a kya̰je néje neelé karje njendoo əsé dəw-dɔ-ɓee. Ma m’to Njesigənea̰, Ala lə sí#Ləb 19.9-10, TtG 24.19-22.

Naḭ ɓar Njesigənea̰ wəl

23Njesigənea̰ ula Moyis 24pana: Ula Israɛlje pana:

Ndɔ gə́ dɔtar lə naḭ gə́ njekɔm’g siri lé a to ndɔ-kwa-rɔ sí gə́ seḭ a ɓarje ne Njesigənea̰ wəl-wəl ləm, seḭ a mbo̰je ne dɔ na̰ kwamje ne meḛ sí’g ləm tɔ. 25Seḭ a raje kula gə́ seḭ aw raje ta-ta lé el, nɛ seḭ a kinjaje nékinjanéməsje gə́ ka̰ roo karje Njesigənea̰ ɓa.

Naḭ gə́ wɔji dɔ kiŋga meekoso lemsé dɔ kaiya’g

26Njesigənea̰ ula Moyis pana#Ləb 16.29-34:

27Ndɔ gə́ dɔg lə naḭ gə́ siri neelé a to ndɔ gə́ wɔji dɔ kiŋga meekoso lemsé dɔ kaiya’g: seḭ a mbo̰je dɔ na̰ kwamje meḛ sí’g ləm, seḭ a kwaje ndòo ləma, seḭ a kinjaje nékinjanéməsje gə́ ka̰ roo karje Njesigənea̰ ləm tɔ. 28Seḭ a raje kula kára kara mee ndəa’g neelé el mbata to ndɔ gə́ wɔji dɔ kiŋga meekoso lemsé dɔ kaiya gə́ ka̰ kuga ne dɔ kaiyaje lə sí no̰ Njesigənea̰’g tɔ. 29Dəw gə́ rara ɓa gə́ wa ndòo rəa mee ndəa’g neelé el ndá d’a kɔree mbuna dəwje’g ləa. 30Dəw gə́ rara ɓa gə́ ra kula gə́ ban-ban kara mee ndəa’g neelé ndá m’a tujee dan koso-dəwje’g ləa. 31Seḭ a raje kula kára kara keneŋ el. Yee ɓa to godndu gə́ to gə no̰ mbata lə ŋgaka síje mee ləbje lai-lai gə́ seḭ a síje keneŋ lé. 32Yee ɓa a to ndɔ-kwa-rɔ mbata lə sí ləm, gə ndɔ kya̰ goo kula lə sí ləma, seḭ a kwaje ndòo rɔ sí ləm tɔ, un kudee kàrkemetag lə ndɔ gə́ jinaikara lə naḭ saar bélè kàrkemetag lé, seḭ a kwaje rɔ sí ndɔ-kwa-rɔ’g lə sí.

Naḭ gə́ wɔji dɔ kəi-surumje

33Njesigənea̰ ula Moyis pana#TtG 16.13-15 : 34Ula Israɛlje togə́bè pana:

Ndɔ dɔg-giree-mi lə naḭ gə́ njekɔm’g siri neelé a to ndɔ ra naḭ ka̰ kəi-kubuje gə́ wɔji dɔ Njesigənea̰ as ndɔ siri. 35Ndɔ gə́ dɔtar ndá seḭ a mbo̰je dɔ na̰ kwamje meḛ sí’g: seḭ a raje kula gə́ seḭ aw raje ta-ta lé el. 36As ndɔ siri lé, seḭ a kinjaje nékinjanéməsje gə́ ka̰ roo karje Njesigənea̰. Ndɔ gə́ njekɔm’g jinaijoo lé seḭ a mbo̰je dɔ na̰ kwamje meḛ sí’g ləm, seḭ a kinjaje nékinjaməs gə́ ka̰ roo karje Njesigənea̰ ləm tɔ, a to ndɔ kwa dɔ na̰ gə́ to gə kəmee ndá seḭ a raje kula gə́ seḭ aw raje ta-ta lé el.

37Naḭje neelé ɓa to ka̰ Njesigənea̰, loo-mbo̰-dɔ-na̰je gə́ to gə kəmee gə mba kwam meḛ sí’d gə́ seḭ a kilaje mberee mba kar dee d’inja nékinjanéməsje gə́ ka̰ roo kar Njesigənea̰ ləm, da nékinjanéməsje gə́ ka̰ roo bura ləm, nékarje gə́ to nduji-kó ləm, da nékinjanéməsje ləma, gə nékarje gə́ ka̰ tər naŋg ləm tɔ, né gə́ rara kara gə goo nduree-nduree, mee ndəa gə́ wɔji dəa-dəa ya. 38Néje gə́ seḭ a reeje ne korèje ne dɔ yee gə́ ndɔ-kwa-rɔje’g lə Njesigənea̰ ɓa nee: seḭ a karje Njesigənea̰ nékarje lə sí kəm sí gə́ kédé-kédé ləm, nékinjanéməsje lə sí lai mba tɔl ne ta ndukun lə sí ləma, gə nékarje lə sí lai gə́ seḭ ḭje ne gə meḛ sí arje ləm tɔ.

39Ndɔ dɔg-giree-mi lə naḭ gə́ njekɔm’g siri lé loo gə́ seḭ a kinjaje kandə néje gə́ mee ɓee’g lə sí lé ndá seḭ a raje naḭ kwaje ne Njesigənea̰ meḛ sí’g as ndɔ sí siri: ndɔ gə́ dɔtar a to ndɔ-kwa-rɔ ləm, yee gə́ njekɔm’g jinaijoo kara a to ndɔ-kwa-rɔ ya ləm tɔ. 40Ndɔ gə́ dɔtar lé seḭ a kodoje kandə kagje gə́ maji-maji ləm, gə barkəm kag-tumburje ləm, gə barkəm kagje gə́ kam dee ndər dɔ na̰’d tib-tib ləma, gə barkəm kag-tuŋguje gə́ ma̰-nia’g ləm tɔ ndá seḭ a kalje ne rɔ sí no̰ Njesigənea̰, Ala’g lə sí, as ndɔ sí siri. 41Seḭ a raje naḭ neelé kwaje ne Njesigənea̰ meḛ sí’g as ndɔ sí siri gə ləb sí ləb sí. Yee ɓa to godndu gə́ to gə no̰ mbata lə ŋgaka síje ya. Seḭ a reaje mee naḭ gə́ njekɔm’g siri lé ya. 42As ndɔ siri lé seḭ a síje mee kəi-kubuje’g, ŋgan kojiɓeje lə Israɛl lai d’a si mee kəi-kubuje’g ya 43mba kar ŋgaka síje gər to gə́ m’ar Israɛlje d’isi mee kəi-kubuje’g loo gə́ m’ar dee d’unda loo mee ɓee gə́ Ejiptə teḛ lé. Ma m’to Njesigənea̰, Ala lə sí.

44Yee ɓa gə́ ta gə́ Moyis ula Israɛlje wɔji ne dɔ naḭje lə Njesigənea̰ lé.

Currently Selected:

Ləbije 23: SBA2015

Highlight

Copy