Ləbije 22

Loo sɔ da nékinjanéməsje gə́ d’inja d’ar Ala

1Njesigənea̰ ula Moyis pana: 2Maji kari ula Aaro̰ gə ŋganeeje mba kar dee d’ɔg rɔ dee dɔ néje gə́ to gə kəmee’d gə́ Israɛlje d’ɔr dee d’unda dee gə kəmee d’am lé ləm, gə mba kar dee d’ila ndɔl dɔ rim’d gə́ to gə kəmee lé el ləm tɔ. Ma m’to Njesigənea̰.

3Ula dee pana: Nana ɓa mbuna ŋgaka síje gə́ d’a gə korè goo na̰ lé gə́ a ree gə néje gə́ to gə kəmee gə́ Israɛlje d’ar Njesigənea̰ ɓa yeḛ ar né gə́ mina̰ gə́ ban-ban to rəa’g ndá, debee neelé d’a kɔree nɔm’g gogo. Ma m’to Njesigənea̰.

4Dəw gə́ rara gə́ to ŋgoka Aaro̰ gə́ ba̰ji rəa əsé iŋga rɔko̰ mɔdee’g ar mán aḭ keneŋ yao-yao ndá yeḛ a sɔ néje gə́ to gə kəmee lé el saar rəa a kàr ɓa. A to togə́bè mbata lə yeḛ gə́ ɔrɔ rɔ maree gə́ mina̰ mbata lə nin dəw gə́ yeḛ ɔrɔ ləm, gə mbata lə yeḛ gə́ ni ar mán-mɔdee ree rəa’g ləm, 5mbata lə yeḛ gə́ ɔrɔ rɔ né gə́ ag naŋg gə ta mée ar rəa mina̰ ne ləma, əsé dəw gə́ né gə́ mina̰ gə́ ban-ban to rəa’g aree mina̰ ne ləm tɔ. 6Yeḛ gə́ ɔrɔ rɔ néje neelé ndá a mina̰ saar kàr a kandə, yeḛ a sɔ néje gə́ to gə kəmee lé el, nɛ yeḛ a ndogo mán ɓa, 7loo gə́ kàr andə mba̰ ndá yeḛ a kàr ɓa, gée gə́ gogo yeḛ a sɔ néje gə́ to gə kəmee lé mbata to nésəa ya. 8Yeḛ a sɔ da gə́ wəi gə́ kwəi el ləm, əsé yee gə́ da maree wa tɔlee el ləm tɔ gə mba kar rəa mina̰ ne gə mbəa el. Ma m’to Njesigənea̰.

9D’a kaa dɔ godndumje kər-kər nà banelə ta kaiya lə dee a kwa dɔ dee kar dee d’wəi ne mbata kila gə́ d’ila ndɔl dɔ deḛ gə́ to gə kəmee’g lé.

10Dəw gə́ to ginkoji’g lə njekinjanéməs el lé a sɔ néje gə́ to gə kəmee lé el, gə́ si mee kəi’g lə njekinjanéməs əsé kura gə́ ra kula mba kiŋga ne lar kara deḛ neelé d’a sɔ néje gə́ to gə kəmee lé el tɔ. 11Nɛ ɓər gə́ njekinjanéməs ndogee gə lar a kaskəm sɔ né neelé ləm gə yeḛ gə́ d’ojee mee kəi’g ləa tɔ, d’a sɔ nésɔ ləa-yeḛ ya. 12Njekinjanéməs lé ɓó lé ŋgonee gə́ dené taa yeḛ gə́ ginkojee to njekinjanéməs el ndá yeḛ a sɔ néje gə́ to gə kəmee lé el. 13Nɛ njekinjanéməs gə́ ŋgonee gə́ dené to njekəisiŋga əsé ŋgabeeje tubá gə́ lal ŋganje ɓa tel aw mee kəi’g lə bɔbeeje to gə́ yeḛ nai ne ma̰də ɓəi lé ndá yeḛ a kaskəm sɔ nésɔ lə bɔbeeje ya. Dəw gə́ rara gə́ to gə́ ginkoji’g lə njekinjanéməs el lé a sɔ né neelé el tɔ.

14Dəw gə́ ɓó lé sɔ né gə́ to gə kəmee lal gər gelee ndá yeḛ a kar njekinjanéməs lar nésɔ gə́ to gə kəmee lé tɔɓəi a kila maree dɔ’g as laree gə́ kaiyee loo mi ɓa d’un təa loo kára d’ar lé.

15Néje gə́ to gə kəmee gə́ Israɛlje d’un d’ula gə́ tar d’ar Njesigənea̰ lé njékinjanéməsje d’a tel kila ndɔl dɔ’g el, 16néje gə́ to gə kəmee gə́ d’usɔ togə́bè d’ar ta wa ne dɔ dee lé d’a kɔm ne ta kaiya dɔ dee’g ya tɔ, mbata ma m’to Njesigənea̰ gə́ m’ɔr dee m’unda dee gə kəmee lé.

Rəw kɔr kəm daje gə́ ka̰ kinja gə́ məs

17Njesigənea̰ ula Moyis pana: 18Maji kari ula Aaro̰ gə ŋganeeje gə́ diŋgam gə Israɛlje ta, togə́bè pana: Dəw gə́ rara ɓa mbuna Israɛlje’g əsé mbuna dəw-dɔ-ɓeeje’d gə́ d’isi mee ɓee Israɛl’g, gə́ a kinja nékinjaməs gə́ ka̰ roo kar Njesigənea̰ gə́ wɔji dɔ tɔl ta ndukun ləa əsé nékarnoji gə́ wɔji dɔ kḭ gə mée mba ra lé ləm tɔ ndá 19yeḛ a kwa bɔ maŋg əsé bàl badə əsé bàl bya̰ gə́ rəa ya̰ maree el mba kar da nékinjaməs neelé taa kəm Njesigənea̰. 20Seḭ a kinjaje yee gə́ rəa ya̰ maree kára kara el mbata a taa kəm Njesigənea̰ el tɔ#TtG 17.1. 21Ɓó lé dəw kára inja da-kul gə́ boi əsé yee gə́ lam gə́ nékinjaməs gə́ ka̰ kɔm na̰’d gə Njesigənea̰ əsé gə mba tɔl ne ta ndukun ləa əsé gə́ nékar gə́ wɔji dɔ kḭ gə mée ra lé ndá da nékinjaməs neelé rəa a kya̰ maree el gə mba karee taa kəm Njesigənea̰, né gə́ majel kára kara a teḛ rəa’g el. 22Da gə́ kəmee tɔ əsé siŋga rəa təd əsé barkəmrea gaŋg əsé bairaŋ səa əsé ŋgaŋguna ndəa̰ əsé né tila rəa lé seḭ a kinja deeje bèe el, seḭ a kinja deeje bèe gə́ nékinjaməs gə́ ka̰ roo dɔ loo-nékinjaməs’g no̰ Njesigənea̰’g el. 23Maŋg əsé badə gə́ barkəmrea ŋgal unda maree əsé gwɔji as maree el lé seḭ a kasjekəm kinjaje gə́ nékinjaməs gə́ wɔji dɔ né gə́ kḭ gə mée ra ya, nɛ yee gə́ bèe lé a taa kəm Njesigənea̰ gə́ nékinjaməs gə́ wɔji dɔ tɔl ta ndukun lə sí el. 24Da gə́ tɔ kɔrgəmee əsé d’ɔr gə́ kɔr əsé d’ḭjá gə́ kinja lé seḭ a kḭjáje karje Njesigənea̰ el, seḭ a kinjaje da gə́ togə́bè gə́ nékinjaməs mee ɓee’g lə sí el. 25Seḭ a ndogoje daje gə́ togə́bè ji dəw-dɔ-ɓee’g kinja gə́ məs gə́ nésɔ lə Ala lə sí el, mbata barkəmrɔ dee gaŋg ləm, rɔ dee ya̰ maree ləm tɔ: d’a taa kəm Njesigənea̰ el tɔ.

26Njesigənea̰ ula Moyis pana:

27Ŋgon maŋg əsé ŋgon badə əsé ŋgon bya̰, loo gə́ d’ojee ndá a nai gel kea̰’g as ndɔ siri, un kudee mee ndɔ’g jinaijoo ləa saar gə́ kédé lé yee a kaskəm to nékinjaməs gə́ ka̰ roo kar Njesigənea̰ karee taa kəmee rəgm ya. 28Ko̰ maŋg əsé ko̰ badə lé seḭ a kinjaje gwɔb dee gə ŋgon dee na̰’d mee ndɔ’g kára ba el.

29Loo gə́ seḭ a kinjaje nékinjaməs gə́ wɔji dɔ ra Njesigənea̰ oiyo ndá seḭ a raje gə goo rəbee gə́ a taa kəmee ɓa. 30Da nékinjaməs lé seḭ a sɔje mee ndəa gən ya ɓó seḭ a kyá̰je kar loo àr dɔ’g el. Ma m’to Njesigənea̰.

31Seḭ a kaaje dɔ godndumje kər-kər ləm, seḭ a raje née ləm tɔ. Ma m’to Njesigənea̰. 32Rim gə́ to gə kəmee lé seḭ a kilaje ndɔl dɔ’g el mba karm ma m’to ne gə kəmee doi mbuna Israɛlje’g. Ma m’to Njesigənea̰ gə́ m’ɔr sí m’unda sí gə kəmee ləm, 33gə m’ar sí undaje loo mee ɓee gə́ Ejiptə teḛje ləm tɔ, mba to ne Ala lə sí. Ma m’to Njesigənea̰.

Currently Selected:

Ləbije 22: SBA2015

Highlight

Copy