Jujé 15

Dɔ naŋg gə́ ginkoji Judaje d’iŋga

1Dɔ naŋg gə́ ginkoji Judaje d’iŋga gə goo nékwɔji lée ləm gə goo gel-bɔje lə dee lə dee ləm tɔ lé aw par gə́ rəw-nim-ɓee gə́ Edɔm saar teḛ ne dɔdilaloo gə́ Sin gə́ to dɔkɔl, gə́ to ŋgaŋ loo gə́ dɔkɔl tɔ. 2Togə́bè ɓa rəw-nim-ɓee lə deḛ gə́ dɔkɔl lé un kudee ta baa-boo-kad gə́ ria lə Baa-Kad par gə́ kəmkai gə́ wɔji dɔ loo gə́ dɔkɔl njoroŋ. 3Rəw-nimee lé aw par gə́ dɔkɔl lə dɔdərloo gə́ Akrabim ləm, dəs aw dɔdilaloo gə́ Sin ləma, ḭ par gə́ dɔkɔl lə Kades-Barnea ləm tɔ dəs aw par gə́ Hesron ɓa aw Adar ndá yee tel aw Karkaa ɓəi, 4gée gə́ gogo yee dəs par gə́ Asmo̰ ɓa aw saar teḛ baa gə́ Ejiptə mba kunda ŋgaŋgee ta baa-boo-kad’g tɔ. Yee ɓa a to rəw-nim-ɓee lə sí gə́ par gə́ dɔkɔl ya.

5Rəw-nim-ɓee gə́ bər lé to baa-boo-kad gə́ ria lə Baa-Kad saar loo gə́ baa gə́ Jurdɛ̰ ula ɔm keneŋ.

Rəw-nim-ɓee gə́ dɔgel lé un kudee kəmkai’g lə baa-boo-kad, loo gə́ baa gə́ Jurdɛ̰ ula ɔm keneŋ lé. 6Yee aw par gə́ Bet-Ogla, dəs loo gə́ dɔgel lə Bet-Araba, ḭ keneŋ aw njal teḛkɔr mbal’g lə Bohan, ŋgolə Rubḛ. 7Tɔɓəi yee aw Dəbir gə́ to gə kuree ɗegəse gə wəl-loo gə́ Akɔr, tɔɓəi aw par gə́ dɔgel gə́ mbɔr Gilgal’d gə́ wɔji dɔ dɔdərloo gə́ Adumim njoroŋ par gə́ dɔkɔl lə baa lé. Yee dəs mbɔr kəm-rəw-manje gə́ En-Semes, aw njal teḛ kəm-rəw-mán gə́ En-Rogel tɔ. 8Rəw-nimee neelé ḭ keneŋ aw par gə́ wəl-loo gə́ Ben-Hinom, par gə́ dɔkɔl lə Yebus gə́ to Jerusalem ɓa ḭ keneŋ aw njal teḛ sém mbal gə́ no̰ wəl-loo gə́ Hinɔm par gə́ dɔ-gó ləm, aw njal teḛ wəl-loo’g lə Repayimje par gə́ dɔgel ləm tɔ. 9Rəw-nimee lé ḭ sém mbal’g aw njal teḛ kəm-rəw-manje’g lə Neptoah, aw kəmee gə́ kédé teḛ ɓee-booje gə́ kaar mbal’d gə́ Epro̰ ndá ḭ keneŋ aw njal teḛ Baala gə́ to Kirjat-Yearim. 10Yee ḭ Baala tel təa par gə́ dɔ-gó, par gə́ mbal gə́ Seir ləm, dəs dəb loo gə́ dɔgel lə mbal gə́ Jarim aw Kesalo̰ ləm, rəm aw Bet-Semes ləma, dəs ɓee gə́ Timna ləm tɔ. 11Yee aw kəmee gə́ kédé par gə́ dəb loo gə́ dɔgel lə Ekro̰ ləm, aw par gə́ Sikaro̰ ləm, dəs kaar mbal gə́ Baala ləma, aw njal teḛ Jabneel gə mba kunda ŋgaŋgee baa-boo-kad’g ləm tɔ.

12Rəw-nim-ɓee gə́ par gə́ dɔ-gó lé to baa-boo-kad gə́ boi. Yee neelé ɓa to ŋgaŋ rəw-nim-ɓeeje lai gə́ wɔji dɔ Judaje gə goo gel-bɔje lə dee lə dee ya.

13Deḛ d’ar Kaleb, ŋgolə Jepune loo gə́ wɔji dəa mbuna Judaje’g to gə́ Njesigənea̰ un ne ndia ar Josué lé, deḛ d’aree Kirjat-Arba gə́ to Ebro̰: Arba lé to bɔ Anakje tɔ#NR 1.20. 14Lée neelé Kaleb tuba ŋgalə Anak gə́ munda gə́ d’isi keneŋ gə́ ri dee lə Sesai, gə Ahiman, gə Talmai lé tɔ. 15Yeḛ ḭ keneŋ aw rɔ gə dəwje gə́ Dəbir: Dəbir lé kédé ria lə Kirjat-Seper. 16Kaleb pana: Nana ɓa gə́ a rɔ gə Kirjat-Seper dum dəa təa loo ndá m’a karee ŋgonəm Aksa gə́ dené ləa. 17Otniel, ŋgolə Kenaj, gə́ to ŋgoko̰ Kaleb lé taa ɓee neelé ndá Kaleb aree ŋgonee gə́ dené ləa tɔ. 18Loo gə́ Aksa ree kəi lə Otniel mba̰ ndá yeḛ ɔsee ɓɔḭ-ɓɔḭ mba karee dəji bɔbeeje loo-ndɔ. Loo gə́ yeḛ ḭ dɔ mulayḛ̀je’g ləa ur naŋg ndá Kaleb dəjee pana: See ɗi ɓa i ndigi wa. 19Aksa ilá keneŋ pana: Am né gə́ raŋg ya ɓəi mbata i am dɔ naŋg gə́ par gə́ dɔkɔl gə́ to dɔdilaloo’g lé ya, nɛ am kəm-rəw-manje m’orè dɔ’g tɔ. Togə́bè ɓa yeḛ aree kəm-rəw-manje gə́ d’ḭ dɔ looje’d gə́ tar ləm, gə kəm-rəw-manje gə́ d’ḭ naŋg ləm tɔ.

20Yee ɓa to dɔ naŋg gə́ Judaje d’iŋga gə goo gel-bɔje lə dee lə dee lé ya.

21Ri ɓee-booje gə́ to kel dɔkɔl rudu ɓee’g lə ginkoji Judaje par gə́ rəw-nim-ɓee gə́ Edɔm lé ɓa nee: Kabseel, gə Eder, gə Jagur, 22gə Kina, gə Dimona, gə Adada, 23gə Kedes, gə Asɔr, gə Itnan, 24gə Jip, gə Telem, gə Bealot, 25gə Asɔr-Hadata, gə Kerijot-Hesron gə́ to Asɔr, 26gə Amam, gə Sama, gə Molada, 27gə Hasar-Gada, gə Esmo̰, gə Bet-Palet, 28gə Asar-Sual, gə Beer-Seba, gə Bijotja, 29gə Baala, gə Ijim, gə Asem, 30gə Eltolad, gə Kesil, gə Ɔrma, 31gə Siklag, gə Madmana, gə Sa̰sana, 32gə Lebaot, gə Silim, gə Aḭ, gə Rimo̰. Bula lə ɓee-booje lai neelé d’as rɔ-joo-giree-jinaikara ləm, gə ɓee-kogoje lə dee ləm tɔ.

33Ri ɓee-booje gə́ to ndag-loo’g ɓa nee: Estaol, gə Sorea gə Asna, 34gə Janoa, gə En-Ganim, gə Tapua, gə Enam, 35gə Jarmut, gə Adulam, gə Soko, gə Ajeka, 36gə Saarayim, gə Aditayim, gə Gedera, gə Gederotayim, d’as ɓee-booje dɔg-giree-sɔ gə ɓee-kogoje lə dee. 37gə Senan, gə Adasa, gə Migdal-Gad, 38gə Diləan, gə Mispé, gə Jokteel, 39gə Lakis, gə Boskat, gə Eglon, 40gə Kabon, gə Lamas, gə Kitlis, 41gə Gederot, gə Bet-Dagon, gə Naaman, gə Makéda, ɓee-booje dɔg-giree-misa̰ gə ɓee-kogoje lə dee, 42gə Libna, gə Eter, gə Asan, 43gə Jibtah, gə Asna, gə Nesib, 44gə Keyila, gə Akjib, gə Maresa, ɓee-booje jinaikara gə ɓee-kogoje lə dee, 45gə Ekro̰, gə ɓee-booje gə́ to boa təa’g ləm, gə ɓee-kogoje ləa ləm tɔ, 46un kudee Ekro̰ par gə́ dɔ-gó lé ɓee-booje lai gə́ to mbɔr Asdod’g gə ɓee-kogoje lə dee tɔ, 47gə Asdod gə ɓee-booje gə́ to boa təa’g gə ɓee-kogoje ləa tɔ, gə Gaja gə ɓee-booje gə́ to boa təa’g gə ɓee-kogoje ləa ləm tɔ saar teḛ baa gə́ Ejiptə ləm gə baa-boo-kad gə́ boi gə́ to gə́ rəw-nimee lé tɔ.

48Ri ɓeeje gə́ to kaar mbal’g ɓa nee: Samir, gə Jatir, gə Soko, 49gə Dana, gə Kirjat-Sana gə́ to Dəbir, 50gə Anab, gə Estemo, gə Anim, 51gə Gosen, gə Holon, gə Gilo, ɓee-booje dɔg-giree-kára gə ɓee-kogoje lə dee. 52Arab, gə Duma, gə Esəan, 53gə Janum, gə Bet-Tapua, gə Apeka, 54gə Umta, gə Kirjat-Arba gə́ to Ebro̰ gə Siɔr, ɓee-booje jinaikara gə ɓee-kogoje lə dee. 55Maon, gə Karmel, gə Jip, gə Juta, 56gə Jisreel, gə Jokdəam, gə Janoa, 57gə Kaḭ, gə Gibea, gə Timna, ɓee-booje dɔg gə ɓee-kogoje lə dee. 58Alul, gə Bet-Sur, Gedor, 59gə Maarat, gə Bet-Anot, gə Elteko̰, ɓee-booje misa̰ gə ɓee-kogoje lə dee. 60Kirjat-Baal gə́ to Kirjat-Yearim gə Raba, ɓee-booje joo gə ɓee-kogoje lə dee.

61Ri ɓee-booje gə́ to dɔdilaloo’g ɓa nee: Bet-Araba, gə Midḭ, gə Sekaka, 62gə Nibsan, gə Ir-Hamelah, gə En-Gedi, ɓee-booje misa̰ gə ɓee-kogoje lə dee.

63Judaje lé d’askəm tuba njé gə́ Yebus gə́ d’isi Jerusalem lé el ndá d’ar njé gə́ Yebus d’isi gə Judaje Jerusalem saar teḛ ne mee ndɔ gə́ ɓogənè lé tɔ#NR 1.21, 2Sam 5.6, 1SgI 11.4.

Currently Selected:

Jujé 15: SBA2015

Highlight

Copy

Compare