Jujé 13

Kai gə́ deḛ kai na̰ ɓee gə́ Kana̰ lé

Ges ɓeeje gə́ nai gə mba taa ɓəi lé

1Juje lé ləbee bula yaa̰ aree ɓuga jogee-jogee ŋga. Togə́bè Njesigənea̰ ulá pana: I lé ləbi bula yaa̰ ari ɓuga mba̰ tɔɓəi ges ɓeeje gə́ kəm kari taa lé kara nai yaa̰ ɓəi tɔ. 2Ges ɓeeje gə́ nai lé ɓa nee: Dəb ɓeeko̰je lə Pilistije lai ləm, gə dɔ naŋg ɓee lə Gesurje ləm tɔ, 3un kudee baa gə́ sihor gə́ tel kəmee ar ɓee gə́ Ejiptə saar teḛ ne rəw-nim-ɓee gə́ Ekro̰ par gə́ dɔgel, dɔ naŋg gə́ kəm tura gə ka̰ Kana̰je na̰’d ar mbaije gə́ boo lə Pilistije mi d’isi keneŋ lé. Mbai gə́ si Gaja ləm, yeḛ gə́ Asdod ləm, yeḛ gə́ Askalo̰ ləm, yeḛ gə́ Gat ləma, gə yeḛ gə́ Ekro̰ ləm tɔ, tɔɓəi Abije kara d’isi keneŋ tɔ, 4un kudee dɔkɔl lé ɓee lə Kana̰je lai ləm, gə Meara gə́ to ka̰ Sido̰je saar teḛ ne Apek, saar teḛ ne rəw-nim-ɓee’g lə Amɔrje ləm tɔ, 5ɓee lə Giblije ləm, gə ɓee gə́ Liba̰ bura, par gə́ loo kuba’g lə kàr, un kudee Baal-Gad gə́ to mbɔr mbal gə́ Hermo̰ saar teḛ ne tarəw ɓee gə́ Amat ləm tɔ, 6dəwje lai gə́ d’isi kaar mbal’g, un kudee Liba̰ saar teḛ ne Misrepot-Mayim ləm, gə Sido̰je lai ləm tɔ. M’a tuba dee no̰ Israɛlje’g. Nɛ i lé maji kari kai Israɛlje ɓee neelé gə goo nékwɔji lée gə́ to asəna gə téḛ bèe karee tel to ka̰ dee-deḛ to gə́ m’un ne ndum m’ari lé#BI 33.54.

7Ɓasinè i a kai ɓee neelé dana kar ginkojije gə́ jinaikara ləm, gə ges ginkoji lə Manasə gə́ nénduba lə dee ləm tɔ.

8Ginkoji Rubḛje gə Gadje gə ges ginkoji Manasə gə́ nai lé d’iŋga dɔ naŋg gə́ né ka̰ dee-deḛ to gə́ Moyis gə́ to kura lə Njesigənea̰ ar dee ne kel tura baa gə́ Jurdɛ̰’g nu par gə́ bər kédé mba̰ lé#BI 32.33, TtG 3.12: 9un kudee Aroer gə́ to ta baa gə́ Arno̰ ləm, un kudee ɓee-boo gə́ to mee wəl-loo’g dana bab ləma, ndag-looje lə Médeba lai saar teḛ ne Dibo̰ ləm tɔ. 10Ɓee-booje lə Siho̰ mbai lə Amɔrje gə́ si Esbon saar teḛ rəw-nim-ɓee’g lə Amo̰je, 11tɔɓəi Galaad, dɔ naŋg ɓee lə Gesurje gə Maakatje ləm, dɔ mbal’d gə́ Hermo̰ lai ləma, gə Basan lai saar teḛ ne Salka ləm tɔ, 12ɓeeko̰ gə́ Basan lai gə́ to ka̰ Ɔg gə́ si Astarot gə Edrei ləm, yeḛ gə́ nai gə́ karee ba mbuna Repayimje’g ləm tɔ. Mbata Moyis ɓa dum dɔ mbaije neelé tuba dee ɔm dee gə́ raga kédé. 13Nɛ Israɛlje lé tuba Gesurje gə Maakatje el, ar dee d’isi mbuna Israɛlje’g saar teḛ ne mee ndɔ gə́ ɓogənè.

14Ginkoji Ləbije ya gə karee ba ɓa Moyis ar dee dɔ naŋg gə́ né ka̰ dee-deḛ el, nɛ nékinjanéməsje gə́ roo no̰ Njesigənea̰, Ala lə Israɛlje’g lé yee ɓa to né ka̰ dee-deḛ to gə́ yeḛ ula dee ne taree kédé lé tɔ#TtG 18.1.

15Moyis ar ginkoji Rubḛje loo kára kára gə goo gel-bɔje lə dee lə dee. 16Deḛ d’iŋga dɔ naŋg lə dee un kudee Aroer gə́ to ta baa’d gə́ Arno̰ ləm, gə ɓee-boo gə́ to mee wəl-loo’g dana bab ləm, gə ndag-looje lai gə́ to mbɔr Médeba’g ləm, 17Esbon gə ɓee-booje ləa lai gə́ to ndag-loo’g gə́ ri dee lə Dibo̰, 18gə Bamot-Baal, gə Bet-Baal-Meo̰, gə Jahas, gə Kedemot, gə Mepaat, 19gə Kirjatayim, gə Sibma, gə Seret-Hasahar gə́ to kaar mbal’g mee wəl-loo’g ləm, 20gə Bet-Peor ləm, gə dɔdərlooje gə́ Pisga ləm, Bet-Jesimot ləm, 21gə ɓee-booje gə́ to ndag-looje’g lai ləma, gə ɓeeko̰ lə Sihon, mbai lə Amɔrje gə́ si Esbon ləm tɔ, Moyis lé dum dəa-yeḛ ləm, gə dɔ mbaije gə́ Madian gə́ ri dee lə Ebi, gə Rekem, gə Sur, gə Hur, gə Reba gə́ to mbaije gə́ njékaa dɔ dəb ɓeeko̰ gə́ Siho̰ gə́ d’isi keneŋ ləm tɔ. 22Balaam, njenékoo gə́ to ŋgolə Beɔr kara to mbuna deḛ gə́ Israɛlje tɔl dee gə kiambas ya ləm tɔ. 23Baa gə́ Jurdɛ̰ to rəw-nim dɔ naŋg ɓee’g lə Rubḛje. Yee ɓa to dɔ naŋg lə Rubḛje gə́ d’iŋga gə́ ka̰ dee-deḛ gə goo gel-bɔje lə dee lə dee, to ri ɓee-booje gə ɓee-kogoje lə dee lé ya.

24Moyis ar ginkoji Gadje gə́ to Gadje lé loo kára gə goo gel-bɔje lə dee lə dee. 25Deḛ d’iŋga dɔ naŋg gə́ Jajer ləm, gə ɓee-booje lai gə́ Galaad ləm, gə ges ɓee lə Amo̰je saar teḛ Aroer gə́ wɔji dɔ Raba njoroŋ ləm, 26un kudee Esbon saar teḛ Ramat-Mispa gə Betonim ləm, un kudee Mahanayim saar teḛ rəw-nim-ɓee gə́ Dəbir ləma, 27gə ɓeeje gə́ to mee wəl-loo gə́ ri dee lə Bet-Haram, gə Bet-Nimra, gə Sukot, gə Sapo̰ gə́ to ges ɓeeko̰ lə Siho̰, mbai gə́ Esbon ləm tɔ, ar baa gə́ Jurdɛ̰ to gə́ rəw-nim-ɓee saar teḛ ne ta baa-boo-kad gə́ Kineret gə́ to kel tura-baa gə́ Jurdɛ̰ gə́ nu par gə́ bər lé. 28Aa oo, yee ɓa to dɔ naŋg gə́ Gadje d’iŋga gə goo gel-bɔje lə dee lə dee, to ri ɓee-booje gə ɓee-kogoje lə dee lé ya.

29Moyis ar ges ginkoji Manasə gə́ to Manasə lé dɔ naŋg gə́ to ka̰ dee-deḛ gə goo gel-bɔje lə dee lə dee. 30Dɔ naŋg ɓee lə dee un kudee Mahanayim ləm, gə Basan lai ləm, gə ɓeeko̰ lə Ɔg, mbai gə́ Basan lai ləma, gə ɓee-kogoje gə́ Jayir lai gə́ wɔji dɔ Basan lé ləm tɔ, ar ɓee-booje gə́ keneŋ d’aḭ rɔ-misa̰. 31Ges ɓee gə́ Galaad, gə Astarot gə Edrei gə́ to ɓee-booje gə́ to mee ɓeeko̰’g lə Ɔg gə́ Basan lé d’ar ŋgalə Makir gə́ to ŋgolə Manasə ləm, gə d’ar ges ŋgalə Makir gə goo gel-bɔje lə dee lə dee ləm tɔ.

32Yee ɓa to dɔ naŋg gə́ Moyis kai dee gə́ né ka̰ dee-deḛ mee ndag-loo’d gə́ Moab, kel tura-baa gə́ Jurdɛ̰’d gə́ nu gə́ wɔji dɔ Jeriko njoroŋ par gə́ bər lé ya. 33Ginkoji lə Ləbi ya gə karee ba ɓa Moyis ar dee dɔ naŋg gə́ né ka̰ dee-deḛ el, Njesigənea̰, Ala lə Israɛlje lé ɓa to nédɔji lə dee to gə́ yeḛ ula dee ne kédé lé tɔ#BI 18.20, TtG 18.2.

Currently Selected:

Jujé 13: SBA2015

Highlight

Copy

Compare