Jɔb 10
10
Ta kila’g lə Jɔb ɓəi
1Ma m’ə̰ji si kəmba ləm bəḭ-bəḭ!
M’a teḛ gə ta no̰-ndooje ləm gə́ raga ləm,
Ma pata gə goo mee kad mbag-mbag ləm ləm tɔ.
2M’ula Ala m’pana: Maji kari gaŋgta dɔm’g el.
Maji kari ulam am m’gər gin né gə́ i ɔsm ne rəw gə mbəa lé ɓa!
3See i oo gə́ né gə́ maji mba kula kəm ndòo ləm,
Gə kɔs kula gə́ i ra gə jii ɓa ŋgərəŋ ləma,
Gə mba kar meemaji ləi to dɔ loo-kwɔji-na̰-ta’g lə njémeeyèrje’g ləm tɔ wa.
4See i uba kəm dəw wa.
See i oo loo to gə́ dəw oo bèe wa.
5See ndɔje ləi asəna gə ka̰ dəw to wa.
Esé see ləbje ləi asəna gə ka̰ dəw bèe
6Ɓa gə mba kari saŋg ne goo néra kori-kori ləm ləm,
Mba kari ə̰də ne gin kaiya ram ləm tɔ wa.
7Mbata i gər gao to gə́ ta wa dɔm el ləm,
Dəw kára kara gə́ njekɔrm jii’g godo ləm tɔ.
8Jii ɓa i undam ne ləm, i ubam ne ləma,
I ram ne bura ləm tɔ.
Ŋga see i ndigi tujim pugudu wa.
9Maji kari ar məəi olé dɔ’g to gə́ a̰ji ɓa i ubam ne,
See i a ndigi telm gə́ nduji naŋg gogo wa.
10See i am m’aḭ to gə́ mbà gə́ aḭ bèe el wa.
See i am m’ɓi to gə́ mbà gə́ ɓi bèe el wa.
11I ar ndarəm ɔn dɔ dakasrɔm ləm,
I tɔs siŋgarɔmje ta na̰’d ləma, gə pḛdé ŋgira rɔmje dɔ’g ləm tɔ,
12I am m’isi kəmba gə goo meemaji ləi ləm,
Ŋgəm gə́ i ŋgəm’m lé ɓa i tɔs ne kəmi bao-bao dɔm’g ləm tɔ.
13Lée togə́bè kara aa oo né gə́ i iya dɔ ɓəŋgəri’g,
Aa oo ma m’gər gao, yee ɓa gə́ né gə́ i wɔji məəi’g ya.
14Ɓó lé m’ra kaiya ndá i oom gao,
I ar məəi oso lemsé dɔ néra kori-kori’g ləm el.
15Ɓó lé ta wa dɔm ndá m’a koo kea̰!
Ɓó lé ta wa dɔm el kara m’askəm kɔr dɔm tar el
Mbata rɔkul dəb dɔm’g rigim ləm, m’isi dan nékəmndoo’g ləm tɔ.
16Ɓó lé m’ndigi kɔr dɔm tar ndá i kɔrm to gə́ toboḭ bèe ləm,
I tel kundam gə nédumkooje ləm,
17I tel ɔr njékɔrgootaje gə́ raŋg ar deḛ d’ɔm ta dɔm’g ləm,
I ar meekḭ jugugu ləi ḭ dɔ maree’g dɔm’g ləma,
I ar nékəmndooje d’orè goo na̰-na̰ dɔm’g ləm tɔ.
18See gelee ban ɓa i am m’unda loo m’teḛ mee kɔm’g wa.
Ɓó lé m’wəi keneŋ ndá kəm dəw a koom el,
19M’a to asəna gə dəw gə́ godo bèe
Ndá d’a kḭ səm mee kɔm’g ya kaw səm dɔɓar’g.
20See ndɔje ləm tɔ gə́ jebəre ba el wa. Maji kari ya̰’m!
Maji kari ɔr rɔi rɔm’g mba kam m’taa kəmə
21Kédé ɓa gə mba kam m’ɔd m’aw loo gə́ m’a kḭ keneŋ tel el,
To ɓee gə́ loo ndul keneŋ kɔl-kɔl ləm,
22To ɓee gə́ loo gə́ ndul kɔl-kɔl
O̰ ɓee dɔ néra gə́ ndəl-ndəl’g ləm,
To loo gə́ lookàr to asəna gə loondul gə́ ndul njudu-njudu keneŋ ləm tɔ.
Currently Selected:
Jɔb 10: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
