Jeremi 34

Ta gə́ wɔji dɔ Sedesias

1Ta gə́ Njesigənea̰ ula Jeremi gə rɔtaje nee loo gə́ Nebukadnesar, mbai gə́ Babilɔn gə njérɔje ləa lai ləm, gə ɓeeko̰je lai gə́ mee ɓeeje gə́ yeḛ o̰ ləma, gə koso-dəwje lai ləm tɔ d’aw rɔ gə njé gə́ Jerusalem gə ɓee-booje lai gə́ wɔji dəa lé ɓa nee#2Mb 25.1-11, 2SgI 36.17-21: 2Njesigənea̰ Ala lə Israɛlje pa togə́bè pana:

Maji kam m’aw m’ula Sedesias, mbai gə́ Juda pana: Njesigənea̰ pa togə́bè pana: Aa oo, m’a gə kuba ɓee-boo neelé kya̰ ji mbai gə́ Babilɔn’g karee roo. 3Ndá i lé i a teḛ jia’g el, nɛ i a koso jia’g karee wai ləm, i a koo kəm mbai gə́ Babilɔn ləma, i a kulá ta gə tai ja̰-ja̰ ləm tɔ ya ɓa i a kaw Babilɔn ɓəi. 4Nɛ i Sedesias, mbai gə́ Juda, maji kari oo ta lə Njesigənea̰! Njesigənea̰ pata togə́bè wɔji ne dɔi pana: I a kwəi yoo-kiambas el. 5I a kwəi gə meekulɔm, To gə́ roo ne néje gə́ ə̰də sululu mbata lə bɔbije-je gə́ to mbaije gə́ ləw gə́ kédé nɔḭ’g lé d’a ra togə́bè mbata ləi-i tɔ, d’a nɔḭ pana: Ai mbai! Mbata ma nja m’pata neelé. Njesigənea̰ ɓa pa bèe.

6Jeremi, njetegginta ula Sedesias, mbai gə́ Juda taje nee lai mee ɓee gə́ Jerusalem. 7Mee ndəa’g neelé njérɔje lə mbai gə́ Babilɔn rɔ gə Jerusalem gə ɓee-booje gə́ Juda gə́ raŋg lai ləm, gə Lakis gə Ajeka ləm tɔ mbata deḛje nee ɓa to ɓee-booje gə́ siŋga dee to yaa̰ gə́ nai mbuna ɓee-booje gə́ Juda lé.

Ɓərje gə́ d’ɔm dee tar ɓa tel ra kula ɓər gogo ɓəi

8Njesigənea̰ ula Jeremi ta loo gə́ mbai Sedesias man rəa ar koso-dəwje gə́ Jerusalem lai gə mba kila mber kɔm ɓərje tar 9gə mba kar nana kara ya̰ ɓər ləa gə́ diŋgam əsé gə́ dené gə́ to Ǝbrəje ar dee d’aw mba kar dəw kára kara wa ŋgokea̰ gə́ to Jip naŋg gaa-gaa loo kula-ɓər’g el. 10Ŋgan-mbaije lai ləm, gə koso-dəwje lai ləm tɔ gə́ d’ɔm na̰’d yəg dɔ manrɔ’g neelé d’un ndu dee mba kar dee d’aw ɓó mba kwa dee naŋg gaa-gaa loo kula-ɓər’g el ŋga. Deḛ d’ila koji dɔ ndukun’g neelé ndá d’ya̰ dee d’ar dee d’aw tɔ. 11Nɛ gée’g gogo ndá takə̰ji lə dee tel to ɓəd ar deḛ tel gə ndu dee ndá deḛ tel d’wa ɓərje gə́ diŋgam gə njé gə́ dené gə́ d’ɔm dee tar kédé d’ar dee d’aw lé gə siŋgamoŋ d’ar dee tel to ɓərje gə́ diŋgam gə njé gə́ dené gogo ɓəi.

12Yen ŋga Njesigənea̰ ula Jeremi ta gə rɔtaje nee pana: 13Njesigənea̰, Ala lə Israɛlje pa togə́bè pana: Ma man rɔm m’ar bɔ síje-je mee ndɔ gə́ m’ar dee d’unda ne loo mee ɓee gə́ Ejiptə mee kəi-kula-ɓər’g teḛ lé ma m’ula dee m’pana: 14Loo gə́ rudu ləbje gə́ siri-siri lé as ndá nana kara mbuna sí’g a kya̰ ŋgokea̰ gə́ to Ǝbrə gə́ ya̰ rəa ar sí ndogeeje kaareeje aw ya. Yeḛ a ra kula kar sí ləb misa̰ ndá seḭ a kaareeje teḛ mee kəi’g lə sí aw. Nɛ bɔ síje-je d’un mbi dee rəw dɔ ta’g ləm ɓó deḛ tuga mbi dee d’oo ne ta ləm el#Tr 21.2, TtG 15.12. 15Ɓogənè seḭ lé seḭ telje gə ndu sí ləm, seḭ telje raje né gə́ danasur kəm’g arje nana kara ila mber kila maree tar ləm, seḭ manje rɔ sí no̰m’g mee kəi gə́ rim ɓar dɔ’g ləm tɔ. 16Nɛ seḭ telje gogo ulaje sul dɔm’g. Ɓərje gə́ diŋgam gə njé gə́ dené gə́ seḭ ɔm deeje tar ar deeje d’aw gə́ dəw dɔ rɔ dee lé nana kara tel wa dee gogo. Tɔɓəi seḭ wa deeje gə siŋgamoŋ ar deeje tel to ɓərje lə sí gə́ diŋgam gə njé gə́ dené gogo ya ɓəi. 17Gelee gə́ nee ɓa Njesigənea̰ pa ne togə́bè pana: Kila gə́ nana kara ila mber kila ŋgokea̰ əsé maree tar lé seḭ ilaje ne ŋgonkoji dɔm’g el. Njesigənea̰ pana: Aa ooje, ma m’ila mber ta kila kiambas, gə yoo-koso, gə ɓoo-boo tar dɔ sí’g tɔɓəi m’a kar sí toje néɓəl mbata ɓeeko̰je lai dɔ naŋg nee tɔ.

18Dəwje gə́ d’alta dɔ manrɔ’g ləm ləm, deḛ gə́ gaŋg maŋg dana loo-joo njaa mbuna’g d’uba ne ta manrɔ gə́ deḛ man ne rɔ dee no̰m’g d’ya̰ lé ləm lé 19gə mbaije gə́ Juda ləm, gə mbaije gə́ Jerusalem ləm, gə njéko̰ɓeeje ləm, gə njékinjanéməsje ləma, gə koso-dəwje lai gə́ mee ɓee’g nee gə́ njaa mbuna dakas ŋgon maŋg gə́ gaŋgee dana ləm tɔ lé 20m’a gə kuba dee kya̰ dee meḛ ji njéba̰je’g lə dee ləm, gə ji deḛ gə́ ndigi kar dee d’wəi ləm tɔ ndá nin dee a to nésɔ lə yelje gə daje. 21M’a kya̰ Sedesias, mbai gə́ Juda, gə ŋgan-mbaije ləa ji njéba̰je’g lə dee ləm, gə meḛ ji deḛ gə́ ndigi kar dee d’wəi ləma, gə meḛ ji njérɔje’g lə mbai gə́ Babilɔn gə́ ɔr rəa rɔ sí’g aw əw lé ləm tɔ. 22Aa ooje, m’a kun ndum kar dee tel ree mee ɓee-boo’g neelé, deḛ d’a rɔ gə ɓee-booje neelé ləm, d’a taa ləma, d’a roo pər ləm tɔ. Tɔɓəi m’a kar ɓee-booje gə́ Juda tel to gə́ dɔdilaloo gə́ dəw godo keneŋ ya.

Currently Selected:

Jeremi 34: SBA2015

Highlight

Copy

Compare