Jeremi 33
33
Ndukun gə́ sigi gə́ wɔji dɔ Jerusalem
1Njesigənea̰ ula Jeremi ta njekɔm’g gɔl joo gə rɔtaje nee, loo gə́ yeḛ nai ne mee gad kəi-daŋgai’g ɓəi lé pana: 2Njesigənea̰ gə́ ra néje neelé ləm, Njesigənea̰ gə́ wɔji néje nee aree aw lée’g béréré ləma, yeḛ gə́ ria lə Njesigənea̰ ləm tɔ lé pa togə́bè pana: 3Ɓarm ndá m’a kilai keneŋ ndá m’a kulai boo-néje gə néje gə́ to loo-kiya’d gə́ i gər el lé. 4Mbata Njesigənea̰, Ala lə Israɛlje pata togə́bè dɔ kəije gə́ mee ɓee-boo’g neelé ləm, gə dɔ kəije’g lə mbaije gə́ Juda gə́ təd dee ləm, gə dɔndalje’g ləm, gə kiambas’g ləm tɔ, 5loo gə́ d’a kaw rɔ gə Kaldeje kar nin dəwje gə́ m’a tɔl dee dan oŋg’d gə meekḭ jugugu’g ləm lé to mee kəije’g neelé rib-rib ləm, gə goo meeyèr lə dee gə́ am m’iya ne sə dee kəm ləm tɔ pana:
6Aa ooje, m’a tel gɔlee gogo ləm, m’a kajee ləma, m’a karee si lɔm gə si dan maji’g bèdèg ləm tɔ. 7M’a tel gə Judaje gə Israɛlje gə́ d’wa dee ɓər lé ree sə dee ɓée, ree kunda dee kar dee d’isi to gə́ kédé lé ya. 8M’a kɔr won néra kori-korije lə dee gə́ deḛ ra d’ɔsm ne rəw lé ndɔs-ndɔs ləm, m’a kar məəm oso lemsé dɔ néra kori-korije gə́ deḛ ra d’ar meḛ dee ɔs ne səm gel ləm, d’ɔs ne ta ləm rəw ləm tɔ. 9Ɓee-boo neelé a to nérɔlel, gə népidi, gə nékula rɔnduba mbata ləm mbuna ginkoji dəwje gə raŋg lai dɔ naŋg nee gə́ d’a koo sor meemajije lai gə́ m’ra sə dee lé. Kaar dee a kwa dee paḭ kar dee d’unda bala mbata meemajije lai ləm, gə teḛ gə́ m’ar dee teḛkɔr ləm tɔ.
10Njesigənea̰ pa togə́bè pana: Lée neelé gə́ seḭ paje ta dɔ’g pajena: To dɔdilaloo gə́ dəwje gə daje godo keneŋ lé d’a koo mee ɓee-booje gə́ Juda ləm, gə mba̰-rəwje gə́ Jerusalem gə́ tuji pugudu ar dəwje gə daje godo keneŋ ləm tɔ lé 11d’a koo ndu pa rɔlel gə ndu pa kalrɔ ləm, gə ndu paje lə njedené-sigi gə njeŋgao-sigi ləm, gə ndu paje lə dee gə́ d’ɔs pana:
Pidije Njesigənea̰ gə́ njeboo-néje
Mbata Njesigənea̰ lé to njemajidum ləm,
Meekɔrjol ləa to saar gə no̰ ləm tɔ.
D’a koo ndu paje lə deḛ gə́ d’inja nékinjanéməsje gə́ ka̰ ra oiyo mee kəi’g lə Njesigənea̰ mbata m’a tel ree sə dee, ree kunda dee lée’g neelé to gə́ kédé ya. Njesigənea̰ ɓa pa bèe#1SgI 16.34, 2SgI 5.13, 7.3, Esd 3.11, Pak 100.5, 106.1, 107.1, 118.1, 136.1.
12Njesigənea̰ gə́ njeboo-néje lé pa togə́bè pana: Lée neelé gə́ to dɔdilaloo gə́ dəwje əsé daje godo keneŋ ləm, gə mee ɓee-booje ləa lai ləm tɔ lé loo-si njékulbadje a to keneŋ gə mba kar dee d’ar koso-nékulje lə dee d’wa rɔ dee keneŋ. 13Mee ɓee-booje gə́ dɔ mbal’g ləm, gə mee ɓee-booje gə́ ndag-loo’g ləm, gə mee ɓee-booje gə́ dɔkɔl ləm, gə mee ɓee’g lə Bḛjami gə looje gə́ gugu dɔ Jerusalem ləma, gə mee ɓee-booje gə́ Juda ləm tɔ lé badje d’a dəs gel ji njetura dee’g ya ɓəi. Njesigənea̰ ɓa pa bèe.
Njesigənea̰ to njepəlta dɔ ndukun’g ləa el
14Njesigənea̰ pana: Aa ooje, ndɔje gə́ d’a gə ree lé ta gə́ maji gə́ ma m’pa dɔ gel-bɔje’g lə Israɛl gə dɔ gel-bɔje’g lə Juda lé m’a karee aw lée’g béréré#Jer 23.5-6. 15Mee ndɔje’g neelé gə mee kàree’g neelé m’a kar barkəm Dabid gə́ to njemeekarabasur lé nduba rəa. Yeḛ a gaŋg rəwta gə dɔ najee ləm, a ra né gə goo rəbee ləm tɔ mee ɓee’g. 16Mee ndəaje’g neelé ɓeeko̰ lə Juda a kaji ləm, njé gə́ Jerusalem d’a si gə meekulɔm loo-si dee’g ləm tɔ. Aa ooje, d’a ɓaree Njesigənea̰ gə́ to njegin meekarabasur lə sí ya.
17Mbata Njesigənea̰ pa togə́bè pana: Dabid a lal dəw gə́ njetaa toree mba si dɔ kalimbai’g mee kəi’g lə Israɛlje nda̰ el#2Sam 7.12-16, 1Mb 2.4, 1SgI 17.11-14. 18Njékinjanéməsje gə Ləbije d’a lal njétaa tor deeje nɔm’g el mba kar dee d’inja nékinjanéməsje gə́ ka̰ roo ləm, gə mba tuu nékarje na̰’d gə nékinjanéməsje ləma, gə mba kinja nékinjanéməsje gə ndɔje kára-kára lai ləm tɔ#BI 3.5-10.
19Njesigənea̰ ula Jeremi ta gə rɔtaje nee pana: 20Njesigənea̰ pa togə́bè pana: Ɓó lé seḭ asjekəm tuji manrɔ ləm gə́ ma man m’ar lookàr ləm, gə manrɔ ləm gə́ ma man m’ar loondul ləm tɔ gə mba kar lookàr gə loondul taa tor na̰ to gə́ kédé lé el ndá 21manrɔ ləm gə́ ma man m’ar Dabid, kura ləm lé kara a tuji togə́bè to mba kar ŋgonee gə́ a taa toree mba si dɔ kalimbai’g ləa ko̰ ne ɓee lé a godo ləm, manrɔ ləm gə́ ma man m’ar Ləbije gə njékinjanéməsje gə́ d’isi loo-kula’g ləm lé a tuji ləm tɔ. 22To gə́ dəw askəm tura boo-néje gə́ dara el ləm, gə askəm kwɔji nagəra gə́ ta baa-boo-kad’g el ləm tɔ lé togə́bè ɓa m’a kar ŋgaka kura ləm Dabid ləm, gə Ləbije gə́ d’aw ra kula ləm ləm tɔ lé d’ḭ dɔ maree’d gə́ kédé-kédé bèe tɔ.
23Njesigənea̰ ula Jeremi ta gə rɔtaje nee pana: 24Ta gə́ dəwje nee pa pana: Gel-bɔje gə́ joo gə́ Njesigənea̰ mbər dee ɓa yeḛ tel uba dee ya̰ dee ɓəi lé see i oo el wa. Togə́bè ɓa deḛ d’ə̰ji koso-dəwje ləm bəḭ-bəḭ ɓó d’oo dee ne gə́ ginkoji dəwje el. 25Njesigənea̰ pa togə́bè pana: Ɓó lé ma man rɔm m’wɔji ne dɔ lookàr gə loondul el ləm, ɓó lé ma m’unda godnduje gə́ wɔji dɔ dara gə naŋg nee el ləm tɔ ndá 26ma m’a kuba ŋgaka Jakob, gə ŋgaka kura ləm Dabid kya̰ dee togə́bè ləm, mbuna ŋgakeaje’g lé m’a kɔr deḛ gə́ d’a gə ko̰ dɔ ŋgaka Abrakam, gə ka̰ Isaak, gə ka̰ Jakob el ŋga ləm tɔ. Mbata m’a kar njé’g lə dee gə́ d’aw ɓee-ɓər’g tel ree ɓée ləm, m’a koo kəmtondoo lə dee ləm tɔ.
Currently Selected:
Jeremi 33: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
