Njé gə́ Galati 4
4
1Togə́bè yeḛ gə́ njekwa nénduba lé loo gə́ nai ŋgon gə́ gɔ ɓəi, lé yeḛ to ne gə́ njenéje lai kara yeḛ nai asəna gə ɓər ɓəi. 2Nɛ yeḛ ula dəa ar njékodeeje gə njékaa dɔ néje ləa lé saar ndəa gə́ bɔbeeje wɔji lé as lée’g béréré ya. 3Togə́bè ɓa jeḛ kara loo gə́ jeḛ nai ŋganje gə́ gɔ ɓəi lé j’isi gə́ ɓərje gin néje gə́ əḭ el gə́ dɔ naŋg neelé tɔ. 4Nɛ loo gə́ ndəa gə́ Ala wɔji lé aw lée’g béréré ndá yeḛ ula Ŋgonee ar dené ojee gin godndu’g, 5gə mba kuga dɔ deḛ gə́ d’isi gin godndu’g lé ləm, gə mba kar síjeḛ kara n’to ne ŋganɓaaje ləa ləm tɔ#Rɔm 8.15-17.
6Ala nja ula Ndil Ŋgonee meḛ sí’g mbata jeḛ n’to ŋganeeje, yee ɓa yeḛ pa gə ndia wəl pana: Aba! Bɔm. 7Togə́bè ɓa i to ɓər el ŋga, nɛ i to ŋgon mée ya, mbata ɓó lé i to ŋgon mée lé ndá mbɔl dɔ noji lə Ala lé i a to ne njekiŋga nékwanduba lé tɔ.
Mee Pool to kəgəgə mbata lə njé gə́ Galati
8Ləw lé loo gə́ seḭ gərje Ala el ɓəi ndá seḭ toje ɓərje lə magəje gə́ to gə́ kankəm néje el. 9Nɛ ɓasinè to gə́ seḭ gərje Ala mba̰, əsé to gə́ yeḛ nja ɓa gər sí lé ŋga see ban ɓa seḭ telje gə́ dan néje gə́ gə mḭdé ba gə́ dɔtar mba kwaje ne rɔ sí ɓərje keneŋ tɔɓəi wa. 10Seḭ tɔsje kəm sí bao-bao dɔ ndɔje’g ləm, gə dɔ naḭje’g ləm, gə dɔ ndɔ ra naḭje’g ləma, gə dɔ ləbje’g ləm tɔ. 11Ma m’ɓəl nà banelə kula gə́ m’ra mbata lə sí lé ma m’bəg rɔm keneŋ gə mḭdé ba.
12Ŋgakɔmje, ma m’ra ndòo rɔ sí’g, maji kar sí toje to gə́ ma bèe mbata ma kara m’to to gə́ seḭ lé nja tɔ. 13Seḭ raje səm majel kára kara el. Seḭ gərje gao to gə́ rɔko̰ gə́ oso dɔm’g kédé, yee ɓa gə́ gin kaw gə́ m’aw ne rɔ sí’g dɔtar m’ɔr ne goo Tagə́maji lé m’ar sí ya. 14Rɔko̰ gə́ oso dɔm’g lé ɓa gə́ né gə́ naa sí ya nɛ seḭ imje rɔ sí dɔm’g el ləm, seḭ oomje gə́ né gə́ to kḛji el ləm tɔ. Seḭ wamje gə́ rɔ sí’g asəna gə kura lə Ala gə́ dara ləm, asəna gə Jeju Kristi ləm tɔ. 15Ŋga see rɔlel lə sí lé to ra ɓəi wa. Ma m’ula sí kankəmta təsərə ya, ndəa neelé ɓó lé to né gə́ askəm ra ndá seḭ a gə kɔrje guburu kəm sí kulaje ka̰ ma’g karmje ya. 16Kankəmta gə́ ma m’ula sí lé see yee ɓa m’tel m’to ne njeba̰ lə sí wa.
17Kag sí gə́ deḛ təd lé deḛ ra gə meenda el nɛ deḛ ndigi kɔr sí rɔ síjeḛ’g mba kar sí tədje kag dee-deḛ ya. 18Tədkag loo mbata lə né gə́ maji lé to né gə́ kəm ra ta-ta ɓó to mba ra loo gə́ ma m’isi mbuna sí’g lé ba el. 19Ŋganəmje, koji gə́ ma m’oji sí lé ndée ulam ndubu gɔl kára tɔɓəi, a kulam ndubu saar Kristi a kula rəa meḛ sí’g ya. 20Ma m’ndiŋga rɔm mba si mbuna sí’g ɓasinè ɓó gə tel gə ndum lemsé mbata kaarm to kəgəgə mbata lə sí ya.
Ta gə́ wɔji dɔ Agar gə Sara
21Seḭ gə́ ndiŋgaje rɔ sí mba sije gin godndu’g lé ulamje, see seḭ gərje ginta godndu gə́ to keneŋ lé el wa. 22Mbata deḛ ndaŋg ta keneŋ pana: Abrakam si gə ŋganeeje gə́ diŋgam deḛ joo, yeḛ gə́ kára kea̰je to ɓər, yeḛ gə́ raŋg kea̰je to ŋgonkoji#Gn 16.15, 21.2. 23Ŋgolə yeḛ gə́ to gə́ ɓər lé d’ojee gin darɔ’g ɓa, yeḛ gə́ to ŋgolə ŋgonkoji lé d’ojee gin ndukun’g. 24Ta néje neelé to gə́ gosota ya, mbata denéje gə́ joo neelé to d’asəna gə manrɔje gə́ joo tɔ. Yeḛ gə́ kára wɔji dɔ mbal gə́ Sinai, yeḛ ɓa to Agar gə́ njekoji ŋganje gə́ d’a to gə́ gin ɓər’g lé. 25Mbata Agar lé to asəna gə mbal gə́ Sinai mee ɓeeko̰ gə́ Arabi, yee ɓa wɔji dɔ Jerusalem gə́ ɓasinè gə́ si gin ɓər’g gə ŋganeeje na̰’d lé. 26Nɛ Jerusalem gə́ ḭ sém loo gə́ tar lé yee ɓa gə́ ŋgonkoji gə́ to gə ko̰ síjeḛ lé. 27Mbata deḛ ndaŋg taree mee maktub’g pana:
Al rɔi, i kaw kad gə́ oji ŋgon el lé!
Ɔr ndui gə́ tar wəl, i gə́ ndòo ulai ndubu kəm kára el ɓəi lé!
Mbata dené gə́ deḛ d’ubá d’yá̰ lé
Ŋganeeje d’a bula kunda ka̰ dené gə́ njeŋgao ya#Esa 54.1.
28Seḭ ŋgakɔmje ɓa yḛ̀, seḭ toje ŋgan ndukunje asəna gə Isaak bèe tɔ. 29To gə́ kédé lé ŋgon gə́ d’ojee gin darɔ’g lé ula kəm yeḛ gə́ d’ojee gin Ndil’g lé ndòo ndá ɓasinè kara to togə́bè ya tɔ#Gn 21.9. 30Nɛ see maktub gə́ to gə kəmee lé see pa ban ɓəi wa. Yeḛ pana: Tuba ɓər lé gə ŋgonee na̰’d mbata ŋgon lə ɓər lé a kwa nénduba gə ŋgonkoji na̰’d el#Gn 21.10. 31Ŋgakɔmje, gelee gə́ nee ɓa jeḛ n’toje ne ŋganje lə ɓər el nɛ jeḛ n’to ŋganje lə dené gə́ to gə́ ŋgonkoji ya.
Currently Selected:
Njé gə́ Galati 4: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
