Njé gə́ Galati 3
3
Godndu gə meekun lé
1Ǝi Galadje, seḭ gə́ kəmkàr na meḛ sí tas lé see na̰ ɓa tel kəm sí wa. Seḭ gə́ deḛ ria sə sí dɔ ɗar gə́ deḛ ɗar Kristi kaar kag’d lé d’aree to raga kəm sí’g pai-pai ya. 2Aa ooje ma m’ndigi dəji sí ta kára ba mba koo ta sí’g. See néra sí gə́ seḭ raje gin godndu’g lé ɓa, seḭ iŋgaje ne Ndil əsé ta meekun gə́ d’ila mberee d’ar sí gə́ seḭ taaje lé see yee ɓa seḭ iŋgaje ne Ndil wa. 3See kəmkàr na meḛ sí tas gə́ na ya wa. Seḭ unje kudee gə goo Ndil Ala lé, nɛ see ɓasinè seḭ a kundaje ne ŋgaŋgee gə darɔ sí wa. 4See néurti gə́ ra sí lé ra sí gə mḭdé ba wa. Ɓó lé a gə to gə mḭdé ɓəi lé. 5Yeḛ gə́ ar sí Ndil ləm, ra ne némɔrije mbuna sí’g ləm tɔ lé see yeḛ ra togə́bè gə goo néra gə́ ka̰ godndu əsé gə goo ta meekun gə́ d’ila ne mberee wa.
6To gə́ Abrakam ɔm mée dɔ Ala’g lé yee ɓa Ala tura ne gə́ némeekarabasur ləa ya#Gn 15.6, Rɔm 4.3 7ndá maji kar sí gərje gao deḛ gə́ d’isi gə meekun lé deḛ nja to ŋgaka Abrakam gə́ gəd ya#Rɔm 4.16. 8Tɔɓəi maktub gə́ to gə kəmee lé wɔji lée kédé oo to gə́ Ala a gə kar njétareeje tel to gə́ njémeekarabasurje gə goo meekun ndá ɔr ne goo tagə́maji neelé ar Abrakam kédé pana: Ginkoji dəwje gə raŋg lai d’a kiŋga dɔkaisəgərə ginee’g ya#Gn 12.3. 9Bèe ɓa deḛ gə́ d’un meḛ dee lé dɔ dee ai səgərə gə Abrakam gə́ njemeekun lé na̰’d tɔ.
10Deḛ lai gə́ d’ula rɔ dee loo néra godndu’g lé ndɔl yoo nai dɔ dee’g ya, mbata deḛ ndaŋg taree pana: Nana ɓa gə́ aa dɔ néje lai gə́ deḛ ndaŋg mee maktub godndu’g lé kər-kər el ləm, lal ra née ləm tɔ ndá ndɔl yoo nai dəa’g ya#TtG 27.26. 11Godndu lé a kar dəw kára kara to ne njemeekarabasur no̰ Ala’g el, yee ɓa to raga pai-pai ya, mbata deḛ pa taree pana: Njemeekarabasur lé meekun ɓa yeḛ a si ne kəmba#Hab 2.4. 12Godndu lé gə meekun d’aw na̰’d el, mbata godndu lé pana: Néje neelé dəw gə́ ra née ndá a si ne kəmba#Ləb 18.5.
13Kristi uga sí ɔr ndɔl godndu dɔ sí’g mbata yeḛ tel to dəw gə́ ndɔl wa dəa mbata lə sí, mbata deḛ ndaŋg ta mee maktub’g pana: Nana ɓa gə́ deḛ ɗaree kaar kag’d lé ndá ndɔl yoo nai dəa’g ya#TtG 21.23. 14Bèe ɓa gə mba kar dɔkaisəgərə gə́ Ala un ne ndia ar Abrakam lé njépole-magəje d’iŋga gin Jeju Kristi’g lé ləm, jeḛ kara mbɔl dɔ meekun lé ɓa j’iŋga ne Ndil gə́ Ala un ne ndia mba kar sí lé ləm tɔ.
Godndu gə ndukun
15Ŋgakɔmje, (né gə́ ka̰ dəwje ɓa ma m’un m’wɔji ne lé bèe): ndukun lə dəw gə́ yeḛ unda mee maktub’g mba karee to njaŋg lé loo gə́ yeḛ ra gə goo rəbee ndá dəw kára kara askəm tuji ta gə́ to keneŋ el ləm, əsé a kila ta gə́ raŋg keneŋ el ləm tɔ. 16Bèe ndá ndukunje lé Ala un ar Abrakam ləm, ar ŋgakeaje ləm tɔ. Ta gə́ maktub pa lé wɔji dɔ ŋgakeaje gin bula el, nɛ wɔji dɔ ŋgakeaje gə́ gin kára ba ya. Maktub pana: Ŋgokai lé yee ɓa wɔji dɔ Kristi ya#Gn 12.7. 17Aa ooje, ta gə́ ma m’pa ɓa nee: Ndukun gə́ Ala un kédé ɓa gée gə́ gogo aree to njaŋg ɓəi lé loo karee udu ɓa godo ŋga. Tɔɓəi godndu gə́ ḭ gogo as ləb tɔl-sɔ-dəa-rɔ-munda lé kara askəm kar ndukun gə́ to njaŋg kédé lé tel to né gə́ mḭdé el tɔ#Tr 12.40. 18Mbata ɓó lé d’a gə kiŋga nédɔji dee gə goo godndu lé ndá d’a kiŋga gə goo ndukun el. Nɛ ndukun gə́ Ala un ar Abrakam lé yee ɓa to noji gə́ yeḛ wa ne səa ya#Rɔm 4.14.
19Bèe ndá see godndu lé ginee to gə́ banwa. Deḛ d’unda godndu lé gogo mbata kalta lə dəwje ya d’aree to keneŋ saar ŋgoka gə́ ndukun wɔji dəa lé teḛ lé ya. Godndu lé kuraje gə́ dara ɓa d’ula ji dəw gə́ to njekaar ŋgaw dan loo’g lé. 20Nɛ njekaar ŋgaw dan loo lé yeḛ to njekaar ŋgaw dan loo mbata lə dəw kára ba el nɛ Ala lé yeḛ nja to kára ba kiao ya.
21See godndu lé to gə mba kɔs ne ndukun lə Ala rəw wa. Wah! bèe el. Ɓó lé godndu kára to gən gə́ askəm kula kəmə meḛ dəwje’g ndá dəwje lé d’a si gə́ njémeekarabasurje gin godndu’g lé ya. 22Nɛ maktub gə́ to gə kəmee lé mbo̰ néje lai gin kaiya’g mba kar deḛ gə́ d’un meḛ dee d’ar Jeju Kristi lé meekun lə dee ɓa d’a kiŋga ne né gə́ ndukun wɔji mba kar dee lé tɔ.
23Loo gə́ ta meekun teḛ el ɓəi lé jeḛ lai nai gin godndu gə́ aḭ ŋgaŋ sí’g, ŋgina ne ta meekun gə́ d’a gə riba dəa kar sí lé. 24Togə́bè ɓa godndu lé to asəna gə njekɔrno̰ sí mba teḛ sə sí rɔ Kristi’g mba kar meekun lə sí lé ɓa j’isi ne gə́ njémeekarabasurje ya. 25Loo gə́ meekun teḛ mba̰ lé j’isi gin njekɔrno̰ sí’g neelé el ŋga.
26Mbata meekun gə́ seḭ unje arje Jeju Kristi lé ɓa seḭ lai toje ne ŋgan-Alaje ya. 27Seḭ lai gə́ deḛ ra sí batɛm d’ɔm sí ne gə Jeju Kristi na̰’d lé Kristi ɓa seḭ uneeje debeeje rɔ sí’g ya. 28Bèe ndá Jib əsé Grek godo ləm, ɓər əsé ŋgonkoji godo ləma, diŋgam əsé dené kara godo ləm tɔ, mbata seḭ lai seḭ toje gə́ na̰’d kára ba kiao gin Kristi’g ya. 29Ɓó lé seḭ toje gə́ ka̰ Kristi ndá seḭ toje ŋgaka Abrakam ləm, seḭ a toje njékiŋga nédɔjije gə goo ndukun gə́ un aree lé ləm tɔ#Rɔm 4.13.
Currently Selected:
Njé gə́ Galati 3: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
