Teḛ-Raga 22

1Ɓó lé d’iŋga njeɓogo gə́ təd takəi loondul’g mba ɓogo né ɓa d’undá tɔlee ndá ta məsee lé a kwa dɔ njetɔlee lé el,

2Nɛ ɓó lé kàr uba mba̰ ɓa ra səa ɓəi ndá ta məsee a kwa dɔ njetɔlee lé ya. Njeɓogo lé a kuga née ŋgər-ŋgər, ɓó lé nékogá godo ndá njeɓogo lé ya d’a ndogee tɔ.

3Ɓó lé né gə́ yeḛ ɓogo lé to maŋg əsé mulayḛ̀je əsé badə ɓa d’iŋgá ne jia’g kəmba ɓəi ndá njeɓogo neelé a kunda maree dɔ’g gɔl joo ɓəi.

Kuga dɔ né ndɔ lə mari gə́ tuji

4Ɓó lé dəw tuji né gə́ mee ndɔ’g əsé mee ndɔ-nduú’g lə maree ar nékulje ləa d’usɔ né keneŋ ndá yeḛ a karee kandə kó əsé kandə nduú gə́ àr yororo toree’g.

5Ɓó lé pər a kḭ koso mee kun’g ɓa o̰ loo-ndɔ əsé o̰ kó gə́ d’ɔm dɔ na̰’d əsé kó gə́ lal kinja ɓəi ndá yeḛ gə́ njekila pər lé a kuga ya. 6Ɓó lé dəw ar maree lar əsé néje gə́ raŋg mba karee ŋgəm aree ɓa njeɓogo ɓogo néje neelé mee kəi’g ləa nɛ ɓó lé d’wa njeɓogo neelé ndá yeḛ a kɔm maree dɔ’g gɔl joo kuga ne ya. 7Ɓó lé d’iŋga njeɓogo neelé el ndá njekəi lé a kaw no̰ Ala’g lé mba kɔr goo ta ləa to gə́ yeḛ lɔm dɔ né lə maree lé gə́ lɔm el.

8Ta bəg na̰ gə́ rara gə́ wɔji dɔ maŋg əsé mulayḛ̀je əsé badə əsé kubu əsé né gə́ igi ɓa ar dəw kára ḭ pa pana: Né neelé to bèe ya ndá ta lə dəwje joo bɔr neelé d’a kaw ne rɔ Ala’g lé ya: yeḛ gə́ Ala ila ta dəa’g ndá a kunda maree dɔ’g. 9Ɓó lé dəw ar maree mulayḛ̀je əsé maŋg əsé badə əsé nékul gə́ ban-ban ɓa mba karee ŋgəm aree ɓa nékul neelé wəi əsé təd barkəmrea əsé igi yɔm ar dəw kára kara oo gée el ndá, 10debee neelé a kubu rəa gə ri Njesigənea̰ a kɔr ginee njai pana: N’wa né lə mar neḛ el, njenékul lé a ndigi səa dɔ kubu rɔ’g ləa ndá maree lé a kuga née el ŋga tɔ. 11Ɓó lé nékul neelé deḛ ɓogee mee kəi’g ləa ndá yeḛ a kuga njenékul neelé gə́ kuga ya.

12Ɓó lé nékul maree wa tiee mbidi-mbidi ndá njeŋgəmee lé a ree gə yée ndá yée lé a kɔr kəm ta ləa, bèe ɓa yeḛ a kuga el mbata to nékul maree ɓa tiee mbidi-mbidi tɔ. 13Ɓó lé dəw ndima nékul lə maree ɓa nékul neelé təd barkəmrea əsé wəi nɛ njenékul lé godo lée’g ndá njḛdima nékul lé a kuga ya.

14Ɓó lé nékul gə́ d’wɔji laree gə́ d’a gə ndɔ ne ɓa né neelé teḛ dəa’g kəm béeje’g ndá lar gə́ d’wɔji neelé ya a kas.

Godnduje gə́ wɔji dɔ néraje gə́ gə goo rəbee el

15Ɓó lé diŋgam ər ŋgoma̰də gə́ njemɔr ləa godo

Ɓa to səa ndá

Yeḛ a kuga laree ləm,

A təa gə́ dené ləm tɔ#TtG 22.28-29.

16Ɓó lé bɔ ŋgonje lé ɔgee taa ŋgonee ndá diŋgam neelé a kunda lar gə́ a kas mba taa ne ŋgoma̰də ya dəa’g.

17Seḭ a kya̰je loo kar dené gə́ njera némbeḛ si kəmba nda̰ el#TtG 18.10-11.

18Nana ɓa gə́ ndal da ndá d’a tɔlee gə́ tɔl ya#Ləb 18.23, 20.15-16, TtG 27.21.

19Dəw gə́ un nékinjanéməsje ar magəje ɓó ar Njesigənea̰ kára ba kiao el ndá debee neelé d’a tɔlee gə́ tɔl ya#TtG 17.2-7. 20Seḭ a kulaje kəm dəw-dɔ-ɓee ndòo el ləm, seḭ a raje səa né gə́ kədərə el ləm tɔ, mbata seḭ kara seḭ toje dəw-dɔ-ɓeeje mee ɓee gə́ Ejiptə’g kédé tɔ#Tr 23.9, Ləb 19.33-34, TtG 24.17-18, 27.19. 21Seḭ a kulaje kəm njekəisiŋga əsé ŋgonal ndòo nda̰ el. 22Ɓó lé seḭ ulaje kəm dee ndòo ɓa deḛ ree ne rɔm’g ndá m’a koo ndu no̰ lə dee ya. 23Oŋg ləm a kḭ səm jugugu ndá m’a tuji sí gə kiambas, denéje lə sí d’a tel to njékəisiŋgaje ləm, ŋgan síje kara d’a tel to ŋganalje ləm tɔ.

24Ɓó lé seḭ arje dəwje ləm gə́ to njéndooje gə́ d’isi sə sí tona sí lar ndá seḭ a raje sə dee to gə́ njeɓaŋ lə sí el ləm, seḭ a dəji deeje maree dɔ’g el ləm tɔ#Ləb 25.35-38, TtG 15.7-11, 23.19-20. 25Ɓó lé seḭ taaje kubu lə mar sí gə́ yeḛ tona ne lar ndá seḭ a telje ne kaareeje gogo ɓad ɓa kar kàr andə ɓəi#TtG 24.10-13, 26mbata kubu neelé nja kára ba to néko̰ rəa ləm, to gə́ kubu ləa gə́ yeḛ ula rəa’g ləm tɔ, nɛ see ɗi ɓa a kila dəa’g to ne wa. Ɓó lé yeḛ a no̰ gə́ rɔm’g ndá m’a koo ndia ya mbata ma m’to njekookəmtondoo ya.

27Seḭ a tajije Ala el ləm, seḭ a tajije mbai dɔ koso-dəwje lə sí el ləm tɔ#NNk 23.5.

28Seḭ a ŋginaje ɓa gə mba kamje dɔ kó lə sí gə́ doŋgɔr el ləm, gə kul nduú lə sí gə́ doŋgɔr el ləm tɔ. Seḭ a kamje ŋgandər ŋgan síje gə́ diŋgam tɔ.

29Seḭ a kamje ŋgandər maŋgje lə sí ləm, gə ka̰ badje lə sí ləm tɔ, deḛ d’a nai gel ko̰ deeje’g ya ndɔ siri, ndɔ gə́ njekɔm’g jinaijoo ndá seḭ a kam deeje ya.

30Seḭ a toje dəwje ləm gə́ toje gə kəmee doi. Seḭ a sɔje dakas da gə́ maree wa tiee mbidi-mbidi el, seḭ a kɔmje kɔrɔ karje bisije ɓa tɔ#Ləb 17.15.

Currently Selected:

Teḛ-Raga 22: SBA2015

Highlight

Copy