Teḛ-Raga 21
21
Godndu gə́ wɔji dɔ ɓərje gə́ to Ǝbrəje
1Aa ooje, godnduje gə́ seḭ a kundaje no̰ dee’g ɓa to nee#TtG 15.12-18: 2Ɓó lé seḭ ndogoje ɓər gə́ to Ǝbrə ndá yeḛ a ra kula ləbee misa̰, nɛ ləb gə́ njekɔm’g siri lé ndá ta ɓər a kɔr dəa’g karee teḛ aw lal kuga ɓaŋgee ya#Ləb 25.39-46. 3Ɓó lé yeḛ nja gə́ karee ba ree kəi ɓər’g lə sí ndá yeḛ nja gə karee ba ta ɓər a kɔr dəa’g karee tel aw tɔ, ɓó lé yeḛ ree gə dené ləa na̰’d ndá deḛ gə dené ləa ta ɓər a kɔr dɔ dee’g kar dee teḛ na̰’d d’aw ya tɔ. 4Ɓó lé to ɓéeje ɓa taa dené aree, aree oji ne ŋganje gə́ diŋgam gə njé gə́ dené ndá dené ləa gə ŋganeeje d’a to ka̰ ɓéeje ya nɛ yeḛ lé ta ɓər a kɔr dəa’g karee aw gə karee ba ya. 5Ɓó lé ɓər neelé pana: Neḛ ndigi ɓée neḛje gə dené lə neḛ gə ŋgan neḛje, neḛ ndigi teḛ kaw gə karneḛ ba el 6ndá ɓéeje a teḛ səa no̰ Ala’g lé, a karee rəm pər gə́ tarəwkəi’g əsé kaar kag rəw-kəi-kɔg’d lé ndá ɓéeje a mbudu mbia gə némé, bèe ɓa ɓər lé a ra kula ɓər karee saar kwəi ne tɔ.
7Ɓó lé dəw wa ŋgonee gə́ dené ndogee aree tel to gə́ ɓər ndá ta ɓər a kɔr dəa’g to gə́ ka̰ ɓərje gə́ diŋgam lé el. 8Ɓó lé ɓéeje un ndia gə mba təa gə́ dené ləa nɛ gée gə́ gogo yeḛ taa kəmee el ndá yeḛ a kya̰ loo kar njé’g ləa d’uga dəa, nɛ ndogo ɓa yeḛ a kaskəm kar dəw gə́ raŋg ndogee səa el mbata kuba gə́ yeḛ nja uba ndukun ləa ya̰ lé. 9Ɓó lé yeḛ ndogee gə mba kar ŋgonee gə́ diŋgam ɓa təa gə́ dené ndá yeḛ a ra səa gə goo nduru kunda ŋgama̰dje kəi ŋgaw’g lé ya. 10Ɓó lé yeḛ taa dené gə́ raŋg ndá dené jia lé yeḛ a kɔgee nésəa əsé kubu əsé lal kaw rəa’g el tɔ. 11Nɛ ɓó lé yeḛ ra néje gə́ munda nee mbata ləa el ndá yeḛ a kaskəm teḛ kəi ɓər’g kaw lal kuga ləm, lal karee lar ləm tɔ.
Néraje gə́ lée’g el gə́ as yoo
12Yeḛ gə́ unda dəw tɔlee lé kəm tɔlee ya tɔ#Ləb 24.17. 13Ɓó lé yeḛ umee kédé el nɛ Ala ɓa aree oso meḛ jia’g ndá m’a gɔl loo gə́ yeḛ a kaskəm kaḭ kaw kula dəa keneŋ#BI 35.10-34, TtG 19.1-13, Juj 20.1-9. 14Nɛ ɓó lé dəw wɔji mée’g mba ra gosɔyèr tɔl ne maree ndá lé gə́ loo-nékinjaməs’g ləm ya kara i a kɔree keneŋ mba tɔlee ya.
15Dəw gə́ unda bɔbeeje əsé kea̰je ndá debee neelé kəm tɔlee gə́ tɔl ya.
16Dəw gə́ ɓogo dəw maree mba kaw ndogee əsé mba ŋgəm jia’g kara debee neelé kəm tɔlee gə́ tɔl tɔ#TtG 24.7.
17Dəw gə́ ɔr gə bɔbeeje əsé kea̰je ndá debee neelé d’a tɔlee gə́ tɔl ya#Ləb 20.9, Mat 15.4, Mar 7.10.
Kunda dəw ləm gə karee doo ləm tɔ
18Ɓó lé diŋgamje joo kɔl na̰ ɓa yeḛ gə́ kára unda maree gə kɔr mbal əsé udu jia ɓa tɔsee ne dul-dul aree wəi el nɛ aree to rɔko̰ naŋg kəi 19ɓa ɓó lé debee neelé iŋga loo mba kḭta njaa raga gə kag-tɔs ləa ndá debee gə́ njekṵdá neelé d’a ra səa né el. Nɛ né gə́ yeḛ a ra səa ɓa to nee: Yeḛ a karee lar tor kula gə́ yeḛ gaŋgee ta’g ləm, yeḛ a kaa dəa saar mba karee aji kəbərə ləm tɔ.
20Ɓó lé dəw unda ɓər ləa gə́ diŋgam əsé yeḛ gə́ dené gə kag ɓa ɓər neelé wəi jia’g ndá ɓéeje neelé d’a kar bo̰ nérea ɔs təa’g ya. 21Nɛ ɓó lé ɓər lé si kəmba as ndɔ kára əsé ndɔ joo ndá d’a kar bo̰ néra ɓéeje ɔs təa’g el, mbata yeḛ to né lar ləa.
22Ɓó lé diŋgamje kɔl na̰ ɓa d’unda dené gə́ aw gə kèm mée’g d’aree ɔr kèm ɓa tuji gə́ raŋg orè gée el ndá ŋgaw denéje neelé a gaŋg lar dɔ dee’g kar dee d’uga no̰ njégaŋ-rəwtareeje’g ya. 23Nɛ ɓó lé tuji teḛ keneŋ ndá i a kar kəmə tor kəmə’g ləm, 24kəm ndá tor kəm’g ləm, ŋgaŋ ndá tor ŋgaŋ’d ləm, ji ndá tor ji’g ləm, gɔl ndá tor gɔl’g ləm#Ləb 24.19-20, TtG 19.21, Mat 5.38, 25doo pər tor doo pər’d ləm, doo tor doo’g ləma, gə doo gə́ dɔ mundu tor doo gə́ dɔ mundu’g ləm tɔ.
26Ɓó lé diŋgam unda kəm ɓər ləa gə́ diŋgam əsé yeḛ gə́ dené ɓa ar kəmee tuji ndá kilá tar ɓa a to lar kəmee. 27Ɓó lé yeḛ ar ŋgaŋ ɓər ləa gə́ diŋgam əsé yeḛ gə́ dené ɔr kara kilá tar ɓa a to gə́ lar ŋgaŋgee tɔ.
28Ɓó lé maŋg a kwa diŋgam əsé dené gə gajee karee wəi ndá d’a tilá gə kɔri-ər tɔlee ndá dəw a sɔ dakasee el ləm, njemaŋg lé kara ta a kwa dəa ləm tɔ. 29Nɛ ɓó lé maŋg neelé to njerɔ gə gajee kédé kédé ar dee d’wɔji njemaŋg lé mba̰ nɛ yeḛ ŋgəm maŋg ləa lé el, ɓa ar maŋg neelé wa diŋgam əsé dené ndá d’a tila maŋg neelé gə kɔri-ər tɔlee ləm, njemaŋg lé kara kəm tɔlee gə́ tɔl ləm tɔ. 30Ɓó lé d’a gaŋg lar dɔ ɓéeje’g karee uga dɔ rəa ndá yeḛ a kuga gə goo laree gə́ gaŋg dəa’g lé ŋgər-ŋgər ya. 31Ɓó lé maŋg a kwa ŋgon gə́ diŋgam əsé yeḛ gə́ dené ndá d’a gaŋg taree gə goo godndu neelé nja tɔ, 32nɛ ɓó lé maŋg neelé wa ɓər gə́ diŋgam əsé yeḛ gə́ dené ndá d’a kuga ɓée ɓərje neelé gə larnda rɔ-munda ləm, d’a tila maŋg lé gə kɔri-ər tɔlee ləm tɔ.
33Ɓó lé dəw ɔr ta bwa əsé yeḛ uru bwa nɛ yeḛ udu təa el ɓa ar maŋg əsé mulayḛ̀je oso keneŋ 34ndá njekuru bwa neelé a kuga njenékul lé lar nékul nja ndá yoo nékul neelé a to ka̰ njekuru bwa tɔ.
35Ɓó lé bɔ maŋg lə dəw kára ɔs maŋg lə maree tɔlee ndá d’a ndogo maŋg gə́ kəmə lé kya̰ laree kai na̰ ləm, maŋg gə́ wəi lé kara d’a kai na̰ dakasee ləm tɔ. 36Nɛ ɓó lé deḛ gər to gə́ bɔ maŋg neelé to njerɔ gə gajee kédé ɓa njea lé ŋgəm el ndá njebau maŋg neelé a kar bɔ maŋg gə́ kəmə tor bɔ maŋg gə́ wəi’g lé nɛ d’a karee yoo maŋg lé tɔ.
Ɓogo nékulje
37Ɓó lé dəw ɓogo bɔ maŋg əsé ŋgon badə ɓa inja gwɔbee əsé ndogee ndá yeḛ a kuga bɔ maŋg lé gə bɔ maŋgje mi, badə lé kara a kuga gə badje sɔ tɔ.
Currently Selected:
Teḛ-Raga 21: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
