Amɔs 2
2
(Moabje)
1Njesigənea̰ ɓa pa togə́bè pana:
Gə mbata kaiya ra Moabje gə́ aw gə́ kédé-kédé lé
Ndá n’a tel gə ndu neḛ nda̰ el,
Mbata deḛ roo siŋga mbai gə́ Edɔm
Ar buée ndá to gə́ pɔrɔ bèe#Esa 15.1–16.14, 25.10-12, Jer 48.1-47, Ejk 25.8-11, Sop 2.8-11.
2N’a kula gə pər mee ɓee gə́ Moab
Karee roo kəi-mbaije gə́ to Kerijot,
Moabje lé d’a kwəi loo gə́ d’a kaw dɔ na̰’d pum-pum ləm,
Gə dan lul’g lə njérɔje ləma,
Gə dan ndu to̰to̰je gə́ ɓar lé ləm tɔ.
3N’a tuji mbai lə dee mbuna dee’g ləm,
N’a tɔl ŋgan-mbaije lə deḛ lai səa na̰’d ləm tɔ,
Njesigənea̰ ɓa pa bèe.
(Judaje)
4Njesigənea̰ ɓa pa togə́bè pana:
Gə mbata kaiya ra Judaje gə́ aw gə́ kédé-kédé lé
Ndá n’a tel gə ndu neḛ nda̰ el,
Mbata deḛ d’ə̰ji godndu Njesigənea̰ bəḭ-bəḭ ləm,
Deḛ d’aa dɔ torndiaje kər-kər el ləm tɔ,
Mbata magəje gə́ ŋgɔm ɓa ar dee ndəm ya,
To magəje gə́ bɔ deeje-je kara ndolè goo dee ya tɔ.
5N’a kula gə pər mee ɓee gə́ Juda’g
Karee roo kəi-mbaije gə́ Jerusalem dula-dula ya.
(Israɛlje)
6Njesigənea̰ ɓa pa togə́bè pana:
Gə mbata kaiya ra Israɛl gə́ aw gə́ kédé-kédé lé
Ndá n’a tel gə ndu neḛ nda̰ el,
Mbata deḛ ndogo njemeekarabasur gə lar ləm,
Deḛ ndogo njendoo gə négɔl ləm tɔ.
7Deḛ ndiŋga rɔ dee mba njaa dɔ njéndooje’g asəna gə babur bèe ləm,
Njénékəmndooje lé kara d’ɔg dee né gə́ kəm kar dee d’iŋga ləm tɔ.
Ŋgon gə́ diŋgam deḛ gə bɔbeeje d’orè na̰ dɔ ŋgoma̰də gə́ kára ba ya
D’ula ne sul dɔ ri neḛ-neḛ gə́ to gə kəmee doi lé.
8Kubuje gə́ tona dee ne néje lé
Deḛ lab naŋg to keneŋ
Mbɔr loo-nékinjanéməsje’g kára-kára lai ləm,
Mee kəi-magəje’g lə dee-deḛ ya
Deḛ d’ai mán-nduú lə deḛ gə́ deḛ gaŋgta dɔ dee’g ləm tɔ.
9Nɛ kédé lé neḛ n’tuji Amɔrje no̰ dee’g ya,
Deḛ gə́ kagrɔ dee ŋgal to gə́ kag-sɛdrə bèe ləm,
Siŋga dee kara to asəna gə kag-sɛnə bèe ləm tɔ,
Neḛ n’tuji kandə dee gə́ tar ləm
Gə ŋgira dee gə́ naŋg ləm tɔ#TtG 3.8-11.
10Nɛ neḛ lé kédé neḛ n’ar sí undaje loo mee ɓee gə́ Ejiptə teḛje ləm,
N’ɔr no̰ sí dɔdilaloo’g as ləb rɔ-sɔ
Gə mba kar sí taaje dɔ naŋg ɓee lə Amɔrje gə́ né ka̰ sí-seḭ ləm tɔ.
11Neḛ mbər ŋgan síje gə́ diŋgam gə́ na̰je
N’ar dee to Njéteggintaje ləm,
Ŋgan basaje lə sí gə́ na̰je kara
Neḛ mbər deḛ gə́ njésaŋ rɔ deeje ləm tɔ.
Israɛlje, see to togə́bè el wa.
Njesigənea̰ ɓa pa bèe#BI 6.1-8.
12Nɛ seḭ lé seḭ arje deḛ gə́ saŋg rɔ dee
D’unda rɔ dee gə kəmee lé
D’ai mán-nduú gə́ mi ləm,
Seḭ unje ndu sí arje njéteggintaje pajena:
Seḭ a tegje ginta el ləm tɔ!
13Aa ooje, n’a mbɔḭ sí naŋg mbajila-mbajila
To gə́ pusu gə́ d’odo ne dɔmaḭ-kó lé mbɔḭ ne naŋg bèe.
14Dəw gə́ njerɔkwɔilɔ lé a kaskəm kaḭ el ləm,
Dəw gə́ njesḭga lé a kaskəm ra né gə siŋgá el ləma,
Yeḛ gə́ to bao-rɔ kara a kaji rəa el ləm tɔ.
15Dəw gə́ njeturu ɓandaŋg lé a kaar gəs el ləm,
Dəw gə́ gɔlee wɔilɔ pélé-pélé lé a kaḭ teḛ ta’g el ləma,
Yeḛ gə́ njekalkṵda kara lé a kaji rəa el ləm tɔ.
16Yeḛ gə́ to kankəm bao-rɔ gə́ ur dɔ njérɔje’g lé kara
A kaḭ gə kudee dum mee ndəa’g neelé ya,
Njesigənea̰ ɓa pa bèe.
Currently Selected:
Amɔs 2: SBA2015
Highlight
Share
Compare
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
