Amɔs 1
1
1Taje lə Amɔs gə́ to yeḛ gə́ kára mbuna njékulbadje’d gə́ Tekoa lé. Némḭdije gə́ yeḛ oo wɔji dɔ Israɛl mee ndəa gə́ Ojias to ne mbai gə́ Juda ləm, Jeroboam, ŋgolə Joas to ne mbai gə́ Israɛl ləm tɔ lé ləb joo ɓad ɓa kar naŋg yə ɓəi lé#2Mb 15.1-7, 2SgI 26.1-23, 2Mb 14.23-29. 2Amɔs pana:
Ndu Njesigənea̰ ɓar asəna gə ndu no̰ lə toboḭ bèe mee Sio̰’g ləm,
Ndia gə́ ɓar Jerusalem kara
Yeḛ ar dee d’oo ləm tɔ.
Bèe ɓa mu ko̰ badje gə́ njékul deeje d’aar keneŋ lé
To dan nékəmndoo’g ləm,
Dɔ sém mbal gə́ Karmel kara
Tudu kurum-kurum ləm tɔ#Joɛ 4.16.
Ta gə́ Njesigənea̰ gaŋg dɔ Israɛlje’g gə dəwje gə́ d’isi gugu dɔ dee lé
(Aramje)
3Njesigənea̰ ɓa pa togə́bè pana:
Gə mbata kaiya ra Damasje gə́ aw gə́ kédé-kédé lé
Ndá n’a tel gə ndu neḛ nda̰ el,
Mbata deḛ tal Galaadje ras-ras gel kag-lar’g
To gə́ d’unda ne kó bèe#Esa 17.1-3, Jer 49.23-27, Jkr 9.1.
4N’a kula gə pər karee oso dɔ kəi’g lə Ajael
Karee roo kəi-mbaije lə Ben-Adad dula-dula ya tɔ.
5N’a təd pəgərə-larje tarəw ɓee-boo gə́ Damas ləm,
N’a tuji njéɓeeje gə́ Bikat-Aben pugudu-pugudu ləma,
Gə yeḛ gə́ wa kag-mbai jia’g mee ɓee gə́ Bet-Edḛ ləm tɔ.
D’a kwa dəwje gə́ Siri gə́ ɓərje
Kaw sə dee mee ɓee gə́ Kir,
Njesigənea̰ ɓa pa bèe.
(Pilistije)
6Njesigənea̰ pa togə́bè pana:
Gə mbata kaiya ra Gajaje gə́ aw gə́ kédé-kédé lé ndá
N’a tel gə ndu neḛ nda̰ el,
Mbata deḛ d’wa koso-dəwje bula
Gə́ ɓərje d’ɔm dee ji Edɔmje’g#Esa 14.29-31, Jer 47.1-7, Ejk 25.15-17, Joɛ 4.4-8, Sop 2.4-7, Jkr 9.5-7.
7N’a kula gə pər dɔ ndògo-bɔrɔ gə́ Gaja
Karee roo kəi-mbaije lé dula-dula.
8N’a tuji njéɓeeje gə́ Asdod pugudu-pugudu ləm,
Gə yeḛ gə́ wa kag-mbai jia’g mee ɓee gə́ Askalo̰ ləm tɔ.
N’a tel gə ji neḛ kɔs ne Ekro̰je ləm,
Pilistije gə́ nai lé kara d’a tuji ləm tɔ.
Mbaidɔmbaije gə́ Njesigənea̰ ɓa pa bèe.
(Tirje)
9Njesigənea̰ ɓa pa togə́bè pana:
Gə mbata kaiya ra Tirje gə́ aw gə́ kédé-kédé lé
Ndá n’a tel gə ndu neḛ nda̰ el,
Mbata deḛ d’ɔm koso-dəwje bula ji Edɔmje’d gə́ ɓərje
Lal kar meḛ dee olé dɔ manrɔ’g lə ŋgako̰ deeje
Gə́ deḛ man ne rɔ dee d’ar dee lé#Esa 23.1-18, Ejk 26.1–28.19, Joɛ 4.4-8, Jkr 9.1-4, Mat 11.21-22, Lug 10.13-14.
10N’a kula gə pər dɔ ndògo-bɔrɔ gə́ Tir
Karee roo kəi-mbaije dula-dula ya.
(Edɔmje)
11Njesigənea̰ ɓa pa togə́bè pana:
Gə mbata kaiya ra Edɔmje gə́ aw gə́ kédé-kédé lé
Ndá n’a tel gə ndu neḛ nda̰ el,
Mbata deḛ d’un kiambas tuba ne ŋgako̰ deeje
Ɓó d’oo kəmtondoo lə Israɛlje gə́ né el.
Mbata oŋg lə dee al dɔ dee sula gə ndɔ dee ndɔ dee ləm,
Deḛ d’ar oŋg lə dee ɔs kɔr meḛ dee’g saar gə no̰ ləm tɔ#Esa 34.5-17, Esa 63.1-6, Jer 49.7-22, Ejk 25.12-14, 35.1-15, Abd 1-14, Mal 1.2-5.
12N’a kula gə pər dɔ Temanje’g
Karee roo kəi-mbaije gə́ Bosra dula-dula ya.
(Amo̰je)
13Njesigənea̰ ɓa pa togə́bè pana:
Gə mbata kaiya ra Amo̰je gə́ aw gə́ kédé-kédé lé
Ndá n’a tel gə ndu neḛ nda̰ el,
Mbata deḛ ta̰ meḛ denéje gə́ Galaad gə́ d’aw gə kèm
Gə mba kar tad dɔ naŋg lə dee-deḛ ḭ dɔ ne maree’g ɓəi#Jer 49.1-6, Ejk 21.33-37, 25.1-7, Sop 2.8-11.
14Mee kàree gə́ lul njérɔje ɓar loo-rɔ’g ləm,
Dan lel-mal gə́ ḭ mee ndəa gən ɓir lé bèe ləm tɔ lé
N’a kula gə pər dɔ ndògo-bɔrɔ’d gə́ Raba
Karee roo kəi-mbaije dula-dula.
15Ndá d’a kwa mbai lə dee gə́ ɓər
Yeḛ gə ŋgan-mbaije ləa na̰’d tɔ,
Njesigənea̰ ɓa pa bèe.
Currently Selected:
Amɔs 1: SBA2015
Highlight
Share
Compare
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
