2 Sôrta Gḭka Israɛlje 15
15
Ŋgur tuji magə-poleje ra Asa ŋgwɔd-ŋgwɔd ya
1Mb 15.12-15
1Ndil Ala dəb dɔ Ajaria, ŋgolə Obed’g 2ndá Ajaria aw aar no̰ Asa’g ulá pana: Ooje ta ləm maji, Asa seḭ gə Judaje gə Bḛjamije lai! Njesigənea̰ nai sə sí loo gə́ seḭ naije səa, ɓó lé seḭ sa̰geeje ndá seḭ a kḭgáje, nɛ ɓó lé seḭ ubáje yá̰je ndá yeḛ kara a kuba sí kya̰ sí tɔ. 3As ləbje bula Israɛlje d’isi lal kwa Ala gə́ gəd meḛ dee’g ləm, njekinjanéməs gə́ njendoo dee ta godo ləma, godndu kara godo ləm tɔ. 4Nɛ dan nékəmndoo’g lə dee lé deḛ d’ɔs badm tel ree rɔ Njesigənea̰, Ala’g lé lə dee ləm, deḛ saŋgee ndá yeḛ ar dee d’iŋgá ləm tɔ. 5Mee ndəaje’g neelé meekulɔm godo mbata lə deḛ gə́ d’aw raga gə tel kəi mbata néɓəlje gə́ to mbuna dəw-mee-ɓeeje’g lai lé, 6ginkoji dəwje gə raŋg tuji na̰ ləm, njé gə́ ɓee-boo gə́ kára tuji njé gə́ ɓee-boo gə́ raŋg ləm tɔ mbata Ala ar néurtije ɓəd-ɓəd jɔg dee. 7Nɛ seḭ lé ɓasinè maji kar sí waje diŋgam meḛ sí’g ləm, arje ji sí unda ndolè el ləm tɔ mbata kula ra sí lé seḭ a kiŋgaje nédɔji sí keneŋ ya.
8Loo gə́ deḛ d’oo taje lə Obed, njetegginta lé ndá Asa wa diŋgam mée’g ar deḛ tuji néje gə́ mina̰ lai gə́ mee ɓee gə́ Juda gə Bḛjami gə ɓee-booje lai gə́ yeḛ taa dee dɔ mbal’g lə Eprayim, tɔɓəi yeḛ tel gɔl loo-nékinjaməs lə Njesigənea̰ gə́ to no̰ kəi-jala’g lə Njesigənea̰ lé tɔ. 9Tɔɓəi yeḛ mbo̰ dəwje lai gə́ Juda gə Bḛjami, gə Eprayimje, gə Manasəje, gə Simeo̰je gə́ d’isi mbuna dee’g dɔ na̰’g mbata Israɛlje bula ya d’ɔm səa na̰’d loo gə́ d’oo to gə́ Njesigənea̰ Ala nai səa lé. 10Deḛ mbo̰ dɔ na̰ Jerusalem mee naḭ gə́ njekɔm’g munda gə́ mee ləb ko̰ɓee’g lə Asa gə́ njekɔm’g dɔg-giree-mi lé. 11Mee ndəaje’g neelé d’inja nékinjanéməsje d’ar Njesigənea̰, to néje gə́ mbuna nébanrɔje gə́ deḛ ree nee, bɔ maŋgje tɔl-siri (700) ləm, gə badje tɔl-dɔg-loo-siri (7.000) ləm tɔ. 12Deḛ manrɔ dee gə mba ndolè goo Njesigənea̰ Ala lə bɔ deeje gə ŋgaw meḛ dee ləm gə rɔ dee bura ləm tɔ, 13nana kara gə́ nai gɔ əsé dəw gə́ tɔg, diŋgam əsé dené, gə́ ndolè goo Njesigənea̰, Ala lə Israɛlje el ndá d’a tɔlee gə́ tɔl ya. 14Deḛ manrɔ dee gə ndu dee gə́ ɓar wəl ləm, gə ndu rɔlel ləm, gə ndu to̰to̰je gə́ ɓar ləma, gə ta̰rən ləm tɔ gə mba kila ne ŋgonkoji dɔ Njesigənea̰’g. 15Dəwje lai gə́ Juda d’al rɔ dee dɔ ndu manrɔ’g lə dee mbata deḛ d’un ndu dee gə ŋgaw meḛ dee bura ləm, deḛ ndolè goo Njesigənea̰ gə rɔ dee bura ləm tɔ ndá Njesigənea̰ ar dee d’iŋgá ləm, yeḛ ar dee d’isi lɔm gə mee looje lai gə́ gugu dɔ dee sub ləm tɔ.
16Mbai Asa lé ɔr rɔnduba gə́ wɔji dɔ mbai gə́ dené dɔ kea̰je Maaka’g mbata ra gə́ yeḛ ra magəpole Astarte lé. Asa tɔs magəpole ləa tila aree təd njigi-njigi ləm, yeḛ aw roo gajeeje lé mbɔr kəm rəw-mán’d gə́ Sedro̰ ləm tɔ. 17Nɛ lé yeḛ tuji dɔ looje gə́ ndəw ar dee godo mbuna Israɛlje’g el kara Asa ɔm mée jəb-jəb dɔ Njesigənea̰’g mee ləbje lai gə́ yeḛ si ne kəmba lé. 18Larnda gə larlɔr gə joje gə́ bɔbeeje unda dee gə kəmee ləm, yeḛ nja kara unda dee gə kəmee ləm tɔ lé yeḛ ree ne mee kəi-Ala’g:
19Rɔ godo saar as ləb rɔ-munda-giree-mi gə́ Asa o̰ ne ɓee lé ya.
Currently Selected:
2 Sôrta Gḭka Israɛlje 15: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
