2 Sôrta Gḭka Israɛlje 10
10
Sorta lə mbaije gə́ Juda
1Mb 12.1-15
1Roboam aw Sikem mbata Israɛlje lai d’aw Sikem mba kundá gə́ mbai tɔ. 2Loo gə́ Jeroboam, ŋgolə Nebat oo taree ndá yeḛ tel ree Ejiptə gogo. Mbata mee ndɔje gə́ kédé lé yeḛ aḭ mbai Salomo̰ lé aw si Ejiptə tɔ. 3Togə́bè ɓa d’ula kula ɓaree. Ndá Jeroboam gə koso-dəwje gə́ Israɛl lai ree rɔ Roboam’g d’ulá ta togə́bè pana: 4Bɔbije unda nékodo gə́ wɔi dɔ sí’g, i ɓa yḛ̀ ɓasinè nékodo gə́ wɔi gə́ bɔbije unda dɔ sí’g ar sí n’raje ne kula ɓər lé maji kari aree wɔilɔ pélé ndá j’a raje né kari ya.
5Yeḛ ula dee pana: Awje ndá as ndɔ munda ɓa telje reeje rɔm’g ɓəi.
Togə́bè koso-dəwje d’ɔd d’aw ya tɔ. 6Mbai Roboam lé dəji dəwje gə́ tɔg gə́ d’isi mbɔr bɔbeeje’g Salomo̰ loo gə́ yeḛ si ne kəmba ɓəi lé pana: See takəmkàr gə́ ban ɓa a kwɔjimje kamje m’tel m’ula koso-dəwje neelé wa.
7Aa ooje, ta gə́ deḛ d’ulá ɓa nee: Ɓó lé m’ra maji gə koso-dəwje neelé ləm, ɓó lé m’wa dee gə́ rɔm’d gə́ majee ləm, ɓó lé m’wɔji dee ta noji ləm tɔ ndá d’a to kuraje ləm saar gə no̰ ya.
8Nɛ Roboam uba takəmkàrje gə́ dəwje gə́ tɔg d’ulá lé ya̰ ndá yeḛ tel dəji basaje gə́ deḛ sə deeje tɔg na̰’d gə́ gugu dəa sub lé ɓa ta. 9Yeḛ dəji dee pana: See takəmkàr gə́ ban ɓa seḭ ndigije kam m’tel m’ula dəwje nee gə́ dəjim ta nee lé wa. Deḛ pana: Nékodo gə́ wɔi gə́ bɔm unda dɔ neḛje’g lé ma m’aree wɔilɔ dɔ neḛje’g pélé ŋga.
10Nɛ ta gə́ basaje gə́ tɔg səa na̰’d d’ulá karee pa lé ɓa nee: I a kula koso-dəwje gə́ dəjii mba kari ar nékodo gə́ wɔi gə́ bɔbije unda dɔ dee’g wɔilɔ dɔ dee’g pélé lé i a kula dee togə́bè pana: Ŋgon jii boi ur dɔ reŋ bɔbije’g. 11Ɓasinè, bɔbije unda nékodo gə́ wɔi dɔ dee’g nɛ i lé a kila maree dɔ’g karee wɔi dee unda njé gə́ kédé, bɔbije unda dee gə ndəije nɛ i ndá a kunda dee gə mbai-yḭje ɓa.
12Jeroboam gə koso-dəwje lai ree rɔ Roboam’g mee ndɔ gə́ njekɔm’g munda lé to gə́ mbai un ne ndia ar dee lé pana: Maji kar sí reeje rɔm’g mee ndɔ gə́ njekɔm’g munda lé tɔ. 13Mbai lé tel gə ta gə́ kədərə ar koso-dəwje lé. Yeḛ uba ta kəmkàr gə́ dəwje gə́ tɔg d’ulá lé ya̰ ndá 14yeḛ ila dee keneŋ gə goo ta gə́ basaje d’ulá lé togə́bè pana: Bɔm unda nékodo gə́ wɔi dɔ sí’g nɛ ma lé m’a kila maree dɔ’g mba karee wɔi sí unda njé gə́ kédé, bɔm unda sí gə ndəije nɛ ma ndá m’a kunda sí gə mbai-yḭje ɓa.
15Togə́bè ɓa mbai oo ne ta lə dəwje el mbata Njesigənea̰ ɓa ra togə́bè mba kar ta gə́ yeḛ pa gə ndu Akija, dəw gə́ Silo aree ula Jeroboam, ŋgolə Nebat lé aw ne lée’g béréré ya.
Deḛ kai ɓeeko̰ loo joo
1Mb 12.16-25
16Loo gə́ Israɛlje lai d’oo to gə́ mbai lé oo ta lə dee el ndá koso-dəwje tel d’ila mbai’g lé pana: Ɗi lə sí to ɓa orè na̰ gə ka̰ Dabid wa. Nénduba lə sí orè na̰ gə ŋgolə Isai el! Seḭ Israɛlje, awje kəi-kubuje’g lə sí. Ɓasinè, i ŋgoka Dabid, maji kari ra né mbata gel-bɔje ləi.
Bèe ɓa Israɛlje lai tel d’aw mee kəi-kubuje’g lə dee ya tɔ#2Sam 20.1. 17Israɛlje gə́ d’isi ɓee-booje’g lə Juda ya gə kar dee ba ɓa Roboam o̰ dee. 18Yen ŋga mbai Roboam ula Hadoram, gə́ to njetaa négədɓeeko̰ rɔ dee’g. Nɛ Israɛlje lai tilá gə kɔri-ər tɔlee. Bèe ɓa mbai Roboam ɔs rəa ɓad uba pusu ləa aḭ aw Jerusalem tɔ. 19Gelee gə́ nee ɓa Israɛlje d’ɔr ne rɔ dee gin bauje’g lə Dabid saar teḛ mee ndɔ gə́ ɓogənè ya.
Currently Selected:
2 Sôrta Gḭka Israɛlje 10: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
