1 Njé gə́ Kɔrḭtə 1
1
Lapia gə́ ra dee
1Ma Pool, njekaḭkula lə Jeju Kristi gə́ Ala ɔree kəmee’g to gə́ mée wɔji lé jeḛ gə ŋgoko̰ sí Sostɛnə lé 2jeḛ ndaŋg maktub nee j’ar Eglisə lə Ala gə́ to Kɔrḭtə, deḛ gə́ Jeju Kristi ɔr dee unda dee gə kəmee mba kar dee to njémeendaje lé deḛ gə́ gə loo lai ɓar ri Mbaidɔmbaije lə sí Jeju Kristi, yeḛ gə́ to Mbaidɔmbaije lə dee ləm, gə ka̰ síjeḛ ləm tɔ lé keneŋ . 3Maji kar noji gə meelɔm lə Ala lé Bɔ síje ləm, gə ka̰ Mbaidɔmbaije lə sí Jeju Kristi ləm tɔ lé nai sə sí.
4M’ra Ala ləm oiyo ta-ta gə mbata lə sí mbata seḭ ɔmje na̰’d gə Jeju Kristi síje ne dan noji’g lə Ala. 5Yeḛ nja ɓa wa sə sí noji gə nébaoje gə́ ɔs dɔ maree-maree, noji gə́ wɔji dɔ tapa sí ləm, gə gosonégər ləm tɔ. 6Yee ɓa, ginta lə Kristi gə́ m’ɔr m’ar sí lé to ne njaŋg mbuna sí’g. 7Togə́bè ɓa, loo gə́ seḭ sije pèrèrè ŋginaje ndɔ rɔnduba lə Mbaidɔmbaije lə sí Jeju Kristi lé ndá nénoji gə́ wɔji dɔ sí kára kara lal sí el. 8Yeḛ nja a gɔl sí kar sí ŋgəŋje ne, saar ndɔ gə́ rudee a kun ɗiao, mba kar ndɔ ree lə Mbaidɔmbaije lə sí Jeju Kristi lé ta kára kara a kwa dɔ sí nda̰ el. 9Ala to njemeenda londoŋ ya, yeḛ nja ɓa ɓar sí ɔm sí na̰’d sad gə Jeju Kristi Ŋgonee gə́ to Mbaidɔmbaije lə síjeḛ ya.
10Ŋgakɔmje, ma m’ndəji sí gə ri Mbaidɔmbaije lə sí Jeju Kristi mba kar tapa sí aw na̰’d kára ba ɓó kar ta tḭ-na̰ oso mbuna sí’g el. Maji kar sí ndaje meḛ sí kaḭ gə na̰ mba kar takə̰ji lə sí aw na̰’d kára ba ya. 11Tɔgərɔ, ŋgakɔmje, deḛ gə́ d’isi kəi lə Kloe lé d’ulam pana: Ta tḭ-na̰ oso mbuna sí’g. 12Ma nja m’a gə tegginee kar sí, seḭ ulaje na̰ pajena: Neḛ n’to ka̰ Pool ɓòo əsé neḛ n’to ka̰ Apolɔs ɓòo əsé neḛ n’to ka̰ Képas ɓòo əsé neḛ n’to ka̰ Kristi ɓòo . 13See Kristi lé kai rəa dana wa. See dee ɗar Pool kaar kag’d gə mbata lə sí əsé deḛ ra sí batɛm gə ri Pool wa.
14Ma m’ra Ala oiyo mbata ma m’ra dəw batɛm kára kara mbuna sí’g el nɛ Krispus gə Gayus ɓa . 15Nà banelə dəw gə́ na̰ a pana: Deḛ ra sí batɛm gə rim-ma. 16Njénojije lə Stepanas kara ma m’ra dee batɛm tɔ ɓó m’oo dəw gə́ raŋg gə́ ma m’rəa batɛm el ɓəi . 17Kula gə́ Kristi ulam mba ra lé to mba karm m’ra dəw batɛm el, nɛ kila mber tagə́maji lé ɓa, yeḛ ulam gə mbəa, m’a gə kila mberee gə ta gə́ rii ta’g el nà banelə kag-dəs lə Kristi a tel to né gə́ gə mḭdé ba.
Kəmkàr gə́ dɔ naŋg nee gə kəmkàr gə́ ka̰ Ala lé
18Mbata kila mber ta kag-dəs lé njétujije d’oo gə́ ta mbə nɛ jeḛ gə́ j’iŋga ne kaji lé jeḛ nja j’oo gə́ siŋgamoŋ lə Ala lé. 19 To gə́ ndaŋg mee maktub’g pana:
N’a tuji kəmkàr lə njékəmkàrje ləm,
N’a sané gosonégər lə njégosonégərje ləm tɔ.
20See njekəmkàr ɓa ra wa. See njendaji-maktub ɓa ra wa. See gɔŋgé-maḭta gə́ dɔ naŋg nee ɓasinè lé ɓa ra wa. See kəmkàr gə́ dɔ naŋg neelé Ala telee gə́ némbə el ɓəi wa .
21Mbata to gə́ njé gə́ dɔ naŋg neelé kəmkàr lə dee lé d’askəm gər ne Ala el ləm, əsé gə kəmkàr ləa el ləm tɔ ndá Ala lé nja ə̰ji mée’g gə mba kaji deḛ gə́ d’ɔm meḛ dee dɔ ta kila mber’g lə sí gə́ dee nja d’oo gə́ ta mbə lé. 22Jibje dəji némɔrije ləm, Grekje saŋg gosɔkəmkàr ləm tɔ. 23Nɛ jeḛ lé jeḛ j’ila mber ta lə Kristi gə́ deḛ ɗaree kaar kag’d ɓa. Yee ɓa gə́ né gə́ tuga gɔl Jibje ɓigidi-ɓigidi ləm, to gə́ némbə kəm njépole-magəje’g ləm tɔ. 24Nɛ deḛ gə́ Ala lé ɓar dee lé Jibje əsé Grekje kara ta lə Kristi gə́ deḛ ɗaree kaar kag’d lé deḛ d’oo gə́ siŋgamoŋ lə Ala lé ləm, gə kəmkàr ləa ləm tɔ. 25Mbata mbə lə Ala lé to kəmkàr gə́ ur dɔ kəmkàr lə dəwje ləm, rəm lə Ala lé kara to siŋgamoŋ gə́ ur dɔ siŋgamoŋ lə dəwje ləm tɔ.
26Ŋgakɔmje, tenje ooje, mbuna sí-seḭ gə́ yeḛ ɓar sí neelé njékəmkàrje gə́ wɔji dɔ kəmkàr lə dəwje lé el ləm, njésiŋgamoŋje kara bula el ləma, dəwje gə́ boo-boo kara bula el ləm tɔ. 27Ala mbər néje gə́ gə mḭdé ba gə́ dɔ naŋg nee mba yə ne njékəmkàrje ləm, Ala mbər néje gə́ d’unda ndolè dɔ naŋg nee mba yə ne njésiŋgamoŋje ləm tɔ. 28Ala mbər néje gə́ sḭ gə́ dəwje d’oo gə́ né el mba roo ne néje gə́ deḛ d’oo gə́ né tɔ 29mba kar dəw kára kara ti ne rəa no̰ Ala’g lé el. 30Togə́bè ɓa Ala nja ɔm sí na̰’d gə Jeju Kristi, yeḛ gə́ Ala nja undá gə́ kəmkàr lə sí ləm, gə njekɔr ta dɔ sí no̰ Ala’g lé ləm, gə nékunda sí gə kəmee lə sí ləma, gə nékoga dɔ sí ləm tɔ, 31ɓó gə mba kar ta gə́ ndaŋg mee maktub’g lé to ne lée’g béréré pana: Nana ɓa gə́ ti rəa ndá maji karee ti rəa gə ri Mbaidɔmbaije ɓa .
Currently Selected:
1 Njé gə́ Kɔrḭtə 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.