1 Njé gə́ Kɔrḭtə 2
2
Kila mber kwəi lə Kristi
1Ŋgakɔmje, loo gə́ m’aw ɓee lə sí lé ma m’aw m’ila mber ginta lə Ala lé gə ta gɔŋgé-négər gə kəmkàr ɓa el. 2Ta kára ba m’ə̰ji məəm’g ɓó m’ə̰ji ta gə́ raŋg el. Jeju Kristi gə́ deḛ ɗaree kaar kag-dəs’g ɓa m’pa taree mbuna sí’g. 3Ma nja m’aar no̰ sí’g kédé asəna gə yɔ-dəw ləm, gə njeɓel ləma, gə njekunda bala ləm tɔ . 4Ta gə́ m’ndoo sí lé m’goso sí ne gə́ goso el ləm, ta gə́ inja paw kara m’pa el ləm tɔ. Ta gə́ nuŋga so lé Ndil ɓa am m’pa taree gə siŋgamoŋ 5mba kar meekun lə sí lé nduna ne rəa kaar siŋgamoŋ’g lə Ala ɓó kaar kəmkàr’g lə dəwje el.
6Ta gə́ jeḛ ndoo dəwje gə́ tɔg gə́ d’as ne loo lé to gə́ ta kəmkàr ya, nɛ to kəmkàr gə́ ka̰ dəwje gə́ dɔ naŋg nee əsé ka̰ mbaije gə́ dɔ naŋg nee ɓasinè el mbata deḛje neelé d’a kudu bo̰. 7Kəmkàr lə Ala gə́ to loo-kiya’g kɔrɔg ɓa jeḛ ndoo sí. Kəmkàr neelé Ala nja wɔji kédé par-par ɓad ɓa d’un kudu tura ləb dee ɓəi gə mba kula ne rɔnduba dɔ sí’g ya. 8Kəmkàr neelé dəw kára kara mbuna mbaije gə́ dɔ naŋg nee ɓasinè lé kəmee inja dɔ’g bərəŋ el mbata ɓó lé kəm dee inja dɔ’g ndá d’a ɗar Mbaidɔmbaije gə́ njero̰duba togə́bè el. 9Nɛ to gə́ ndaŋg taree mee maktub gə́ to gə kəmee ɓəd lé pana:
To néje gə́ kəm dəw oo el ləm,
Mbi dəw oo el ləma,
Dəw la̰ji toree mée’g el ləm tɔ,
Nɛ Ala nja wa dɔ gɔl néje neelé mba kar deḛ gə́ d’undá dan kəm dee’g .
10Ndil ɓa Ala ar kəm sí inja ne dɔ néje’g neelé. Mbata Ndil neelé teg néje lai wɔgədɔ-wɔgədɔ, meekuru lə Ala gə́ suna godo nja kara yeḛ teg ləm tɔ. 11Dəw lé gər néje gə́ wɔji dɔ dəwje mbata ndil dəw gə́ to mée’g. Togə́bè ɓa dəw kára kara gər néje gə́ wɔji dɔ Ala el nɛ Ndil Ala kára ba gər ya. 12Jeḛ lé ndil gə́ ḭ rɔ dəwje gə́ dɔ naŋg nee ɓa j’iŋga el, nɛ Ndil gə́ ḭ rɔ Ala’g ɓa j’iŋga ɓó gə mba kar sí n’gər ne gin néje gə́ Ala ar sí wa ne sə sí noji lé. 13Yee ɓa jeḛ lé m’pa ne taree gə goo ta gə́ Ndil ɓa ndoo sí ɓó gə goo ta gosɔkəmkàr lə dəwje el. Ta ka̰ Ndil lé jeḛ m’pa j’ɔr ne néje gə́ wɔji dɔ ndil tɔ. 14Dəw gə́ ə̰ji néje gə́ ka̰ dakasrɔ mée’g ndá a taa néje gə́ ka̰ Ndil Ala lé el, to némbə kəmee’g. Yeḛ askəm gər el mbata dəw gə́ Ndil Ala to mée’g ɓa askəm gər gelee ɓəi. 15Nɛ dəw gə́ gər ndaa né gə́ wɔji dɔ Ndil lé yeḛ nja teggin néje wad-wad ɓó dəw kára kara askəm maḭ səa el. 16Mbata
See na̰ ɓa gər takə̰ji lə Mbaidɔmbaije
Mba ndée ne né wa. Nɛ jeḛ lé takə̰ji lə Kristi ɓa nai meḛ sí’g .
Currently Selected:
1 Njé gə́ Kɔrḭtə 2: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.