Romanos 2
2
Lic jusuc' ri k'atbal tzij cu'an ri Dios
1E uwari'che, tob at chinok, na utz taj cawesaj awib chwach ri mac echiri' ri'at cak'at tzij paquiwi jujun chic ruma ri caqui'ano. Ma ri'at cak'at tzij paquiwi' yey e ne cat-tajin che u'anic ri caqui'an rique; ruc' c'u wa' atuquel caya awib chupa ri k'atbal tzij. 2Yey keta'am c'ut lic jusuc' ri k'atbal tzij cu'an ri Dios paquiwi ri quebanaw tak ri na utz taj. 3Ri'at, ri cak'at tzij paquiwi jujun chic ruma ri caqui'ano yey ca'an awe cuc', ¿cach'ob cami ri' ri'at ri Dios na cuk'at ta tzij pawi'?
4Na ruc' ta c'u ri', lic nim ri rutzil uc'u'x y runimal uc'u'x ri Dios pawi', ma caroy'ej cayijba' awib y na asu ta cusachisaj awach. ¿E cami cac'ak bi uk'ij ri' ri unimal rutzil uc'u'x ri Dios? ¿Na aweta'am ta neba ri'at wa unimal rutzil uc'u'x ri Dios e cac'amaw bi awe chupa ri tzelebal tzij chwach Rire? 5No'j ri'at lic awiboch'im awib yey na cach'aw tane ac'u'x che catzelej atzij. Ruma c'u wa' e cat-tajin che upetisaxic ri royowal ri Dios pawi' chupa ri k'ij echiri' Rire cuc'ut ri royowal y cuk'alajisaj c'u ri jusuc' k'atbal tzij cu'ano. 6Ma ri Dios cuya ri rajil uc'axel chique chiquijujunal e chirij tak ri qui'anom. 7Cuya c'aslemal na jinta utakexic chique ri quichuk'ubem quib che u'anic ri utz, ma cacha quic'u'x che uc'ulic ruchomalil ri Dios, ri yacbal k'ij cuya Rire y ri c'aslemal na jinta uq'uisic. 8No'j ri oyowal y ri k'atbal tzij re ri Dios catzak paquiwi ri queyactaj chirij Rire, wa' e ri na cacaj ta caquicoj ri K'ijsak re ri Dios, xew e caqui'an ri na jusuc' taj chwach ri Dios. 9Cape c'u c'axc'obic y bis paquiwi conoje ri ticawex caqui'an ri na utz taj, tob e aj judi'ab o na e ta aj judi'ab. 10No'j chique conoje ri quebanaw re ri utz, ri Dios cuya quichomal, yacbal quik'ij y utzil chomal, tob e aj judi'ab o na e ta aj judi'ab. 11Ma chwach ri Dios conoje ri ticawex xaki junam quiwach.
12Conoje c'u ri na jinta queta'am puwi ri Tzij Pixab re ri Dios, na cak'at ta tzij paquiwi' e chirij ri cubi'ij wa Tzij Pixab. Na ruc' ta c'u ri', we quemacunic, casach na c'u quiwach. No'j c'u ri queta'am wa Tzij Pixab, we quemacunic, ri' cak'at na tzij paquiwi' e chirij ri cubi'ij wa Tzij Pixab. 13Ma ri e jusuc' chwach ri Dios na e ta ri xa e tanel re Rutzij Upixab; ma e ri e 'anal re, e wa' ri ca'an jusuc' chique. 14No'j ri na e ta aj judi'ab, tob na quitom ta ri Tzij Pixab re ri Dios, we calax pa canima' caqui'an ri cubi'ij wa Tzij Pixab, wa' e c'utubal re c'o queta'am puwi sa' ri chirajawaxic chique. 15K'alaj c'u ri' c'o takanic tz'ibital pa canima', ma caquina' chiquic'u'x we utz o na utz ta ri quina'oj. 16C'o jun k'ij echiri' ri Dios cuya puk'ab ri Kanimajawal Jesucristo cuk'at tzij paquiwi conoje; c'a ec'u ri' cak'alajin na ronoje ri c'o pa canima' ri ticawex, jela' pacha' ri cubi'ij wa Utzilaj Tzij cantzijoj ri'in.
Ri e aj Israel y ri Tzij Pixab re ri Moisés
17Chatape c'u ri cabi'x chawe ri at cuq'uil ri e aj judi'ab, ri'at cacuba' ac'u'x ruc' ri Tzij Pixab re ri Dios yey catac'aba' ak'ij ma ri Dios c'o awuc'. 18Aweta'am c'u ri' sa' ri caraj ri Dios y sa' ri lic utz chwach Rire, ma Rutzij Upixab cuc'ut chawe sa' ri chirajawaxic wi ca'ano. 19E chawach ri'at, at c'amal quiwach ri e potz' y at k'ijsak chiquiwach ri quebin pa k'eku'm. 20E chawach ri'at, at k'ilonel que ri na jinta caquiriko y at c'utunel que ri e ch'uti'k. E cach'ob ri'at c'o ronoje ya'bal na'oj y k'ijsak awuc', ma ya'tal ri Tzij Pixab pak'ab. 21Jela' c'u ri' we catc'utun chique jujun chic, ¿su'be na catc'utun ta chawibil awib? Ri'at cat-tzijon puwi' na utz taj we jun cu'an elek'; ¿su'be c'u ri' ri'at ca'an elek'? 22Yey cabi'ij na utz taj we junok camacun chirij ri c'ulaniquil; ¿su'be c'u ri' ri'at ca'an wa'? Catch'a't ne chiquij ri tiox; ¿su'be c'u ri' cacoj ak'ab che tak ri re tiox? 23Ri'at lic ca'an nim che awib ma c'o awuc' ri Tzij Pixab re ri Dios. ¡Yey ri'at capalajij ri Tzij Pixab re ri Dios y ruc' wa ca'ano cac'ak bi uk'ij Rire! 24E uwari'che e jela' pacha' ri tz'ibital can pa Ruch'a'tem ri Dios:
Ruma ri imac ri'ix ix aj judi'ab,
ri na e ta aj judi'ab lic tzel quech'a't chirij rubi' ri Dios Ez. 36:20-22
cacha'.
25Pakatzij wi ri retalil re circuncisión c'o cutikoj wi chawe, we catakej ri Tzij Pixab. No'j we na catakej taj, ri' junam awach ruc' ri na ucojom ta ri retalil re circuncisión. 26No'j we c'o junok na ucojom ta ri retalil re circuncisión, yey we cu'an c'u ri catakan ri Tzij Pixab che, ri' e junam ruc' ucojom wa retalil, tob na ucojom taj. 27We c'o c'u junok na ucojom ta ri retalil re circuncisión, pero cu'an chi utz ronoje ri takanic re Rutzij Upixab ri Dios, ri' takal ne che rire e cak'ataw tzij pawi' ri'at. Ma e ri'at, tob acojom ri retalil re circuncisión y c'o awuc' ri Tzij Pixab re ri Dios tz'ibital canok, e ne capalajij ri cubi'ij. 28Ma junok e cuq'uil raj judi'ab na ruma ta ri quilitaj che, yey ri sakil circuncisión na e tane ri retalil xa cojotal che ri rulewal. 29Ma chupa ri ranima' junok cak'alajinic we pakatzij wi e cuq'uil raj judi'ab e utinamit ri Dios. Yey ri sakil circuncisión e ri cu'an ri Dios pa ranima' junok; y wa' e ruma ri Ruxlabixel ri Dios, na e ta ruma ri takanic tz'ibital canok. Ec'u ri yacbal uk'ij junok e cuq'uil rutinamit ri Dios na e ta rachijab queya'w re, ma e ri Dios caya'w re.
Currently Selected:
Romanos 2: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.