Romanos 3
3
Ri Dios lic jusuc' ri cu'ano
1¿Sa' c'u ri' ri cutikoj che jun we e cuq'uil rutinamit ri Dios e aj judi'ab? ¿O sa' ri utz cuc'am lo che junok ucojom ri retalil re circuncisión? 2Lic c'o tak cutikoj wi. Ma ri Dios nabe na xuya Ruch'a'tem paquik'ab. 3Pero ¿sa' cu'ana' we e c'o jujun chique na xcaj taj caquicoj Ruch'a'tem ri Dios? ¿Ruma nawi ri' wa' cujec' rib ri Dios che ri ubi'tisim? 4¡Pakatzij wi na e ta ri'! Ma ri Dios na aj ta rak'ul; janipa rubi'im Rire, e cu'ano, tob c'u conoje ri winak xa e aj rak'ul. Ma e pacha' ri tz'ibital can pa Ruch'a'tem ri Dios:
We c'o junok cuc'ambej upa ri ch'a'tem la,
cak'alajinic Rilal lic Lal jusuc' che ronoje ri cabi'ij la;
jec'ula' quel pana la ruc' puwi ronoje Sal. 51:4
xcha ri rey David che ri Dios.
5C'o ri caquibi'ij: «E tak ri lic na jusuc' taj caka'ano c'o cutikoj; ma echiri' caka'an wa', más cak'alajin ri lic jusuc' cu'an ri Dios» quecha'. (Jela' caquich'ob rakan ri ticawex re ruwachulew.) ¿Sa' c'u ri' ri cakabi'ij puwi wa'? ¿Na jusuc' ta neba ri cu'an ri Dios we cuk'at tzij pakawi'? 6¡Are', lic jusuc'! Ma we ta na jusuc' ta Rire, ¿sa' c'u u'anic ri' cuk'at tzij paquiwi conoje ri e c'o che ruwachulew? 7Ma laj c'o junok cubi'ij: «We ruc' ri rak'ubal can'ano e catac'abax uk'ij ri K'ijsak re ri Dios, ¿sa' c'u ube ri' c'a cabi'xic in aj mac y cak'at tzij panuwi'?» cacha'. 8¿Utz ne ri' cakabi'ij: «Ka'ana ri na utz taj cha' wa' e cuc'am lo ri utz»? ¡Na utz ta q'uenok! Yey c'o ri caquibi'ij rak'ubal chikij, ma caquibi'ij jela' cojc'utun ri'oj. E ri quebi'n re wa', lic takal chique cak'at tzij paquiwi'.
Conoje ri ticawex emacuninak chwach ri Dios
9¿E cami que'elawi ri' ri oj aj judi'ab, lic utz ka'anom y na jinta c'ana kamac chiquiwa ri na e ta aj judi'ab? ¡Na e ta ri'! Ma e pacha' ri nuc'utum lok: Conoje, tob e aj judi'ab o na e ta aj judi'ab, junam e c'o chuxe' ri k'atbal tzij re ri Dios ruma ri quimac. 10Ma jewa' ri tz'ibital can pa Ruch'a'tem ri Dios:
Na jinta juna ticawex jusuc' chwach ri Dios,
tob tane xa jun.
11Na jinta junok camajaw usuc' runa'oj ri Dios.
Na jinta junok catzucuw re Rire.
12Conoje ri winak ebelinak
che rube ri Dios,
y na jinta chi c'ana quichac.
Na jinta junok ca'anaw ri utz,
tob tane xa jun. Sal. 14:2-3
13Ri ch'a'tem quel lo pa quichi' ri winak
e pacha' uchuyil ujul anima' tek'el uchi';
ma ruc' ri cak' quesocoso'nic. Sal. 5:9
Ri ch'a'tem quel lo pa quichi'
e pacha' chi veneno re cumatz. Sal. 140:3
14Yey rupa quichi' nojinak che itzel tak tzij y c'axlaj ch'a'tem. Sal. 10:7
15Lic cacha quic'u'x che quecamisanic.
16Tob pa tak quebic'ow wi,
quequicoj ri winak pa c'axc'olil y pa bis;
17pa tak e c'o wi rique,
na jinta c'ana utzil chomal. Is. 59:7-8
18Na jinta ne c'ana xi'in ib cuc' chwach ri Dios Sal. 36:1
cacha'.
19Ronoje ri cubi'ij Rutzij Upixab ri Dios, wa' cubi'ij chique ri c'o wa Tzij Pixab paquik'ab. Jec'ula' na jinta junok c'o puk'ab cubi'ij: «Na utz ta cuk'at tzij ri Dios panuwi' ma ri'in na jinta c'ana numac.» Ma pakatzij wi conoje ri winak e c'o che ruwachulew, tob e aj judi'ab o na e ta aj judi'ab, e c'o chuxe' ri k'atbal tzij re ri Dios. 20Y na jinta juna ticawex cu'an jusuc' che rib chwach ri Dios ruma ri cutakej ri takanic re ri Tzij Pixab. Ma ri Tzij Pixab na jinta uchuk'ab cha' cojresaj puk'ab ri mac; xew cuc'ut chike: Ri'oj oj aj mac.
Ri ticawex quecolobetaj ruma ri cubulibal quic'u'x ruc' ri Dios
21Pero wo'ora ri Dios uk'alajisam chikawach su'anic Rire cu'an jusuc' chike, jela' pacha' ri cubi'ij Rutzij Upixab ri Dios tz'ibital can ruma ri Moisés y cuma ri k'alajisanelab. Na coju'an ta c'u jusuc' chwach ri Dios ruma ri katakem tak ri takanic, 22ma e ruma ri cubulibal kac'u'x ruc' ri Kanimajawal Jesucristo. Ma ri Dios cu'an jusuc' chique conoje ri cacubi' quic'u'x ruc' ri Cristo, tob e chinok. 23Conoje c'u ri ticawex emacuninak y lic naj e c'o wi lo che ri unimal uchomalil ri Dios. 24Na ruc' ta c'u ri', ri Dios cu'an jusuc' chique ruma ri unimal rutzil uc'u'x y cusipaj c'u ri colobetajic chique ruma ri xu'an ri Kanimajawal Jesucristo echiri' xeresaj lo puk'ab ri mac. 25Ri Dios xuya lo ri Cristo cha' ruma Rire ri ticawex caquirik cuybal quimac we xcubi' quic'u'x ruc' ruquiq'uel xturuwic. Jec'uri'la' ri Dios xuc'utu Rire lic jusuc' y lic c'o unimal uc'u'x, ma ojertan na asu ta xusachisaj quiwach ri winak ruma ri quimac qui'anom lok. 26Yey Rire uch'obom chi lo rakan sa' ri cu'an chupa wa' wa k'ij oj c'o wi. Ec'u wo'ora uc'utum chic su'anic cu'an jusuc' chique ri ticawex; e ruma ri cubulibal quic'u'x ruc' ri Jesús. Jela' c'u ri', xk'alajinic ri Dios lic jusuc' y e Rire ri cu'an jusuc' chique ri cacubi' quic'u'x ruc' ri Cristo.
27¿C'o neba ka'anom ri'oj cha' ruc' wa' utz caka'an nim che kib chwach ri Dios? ¡Na jintaj! ¿Su'be? Ma na e ta ruma cakatakej ri takanic ri ca'anaw chike cojkib ruc' ri Dios; e ruma ri cubulibal kac'u'x ruc' ri xu'an Rire. 28Cakaq'uisbej c'u ruc' wa': Ri Dios cu'an jusuc' che ri ticawex ruma ri cubulibal uc'u'x ruc' Rire, na ruma ta ri utakem tak ri takanic. 29¿Ri Dios xew neba Dios que ri e aj judi'ab? ¿Na e ta neba Dios que ri na e ta aj judi'ab? Pakatzij wi Rire e Dios que ri e aj judi'ab y que ri na e ta aj judi'ab. 30Ma xa jun Dios c'olic. Yey Rire cu'an jusuc' chique ri ticawex ruma ri cubulibal quic'u'x. Wa' e cu'an cuc' ri quicojom ri retalil re circuncisión y cuc' ri na quicojom taj. 31¿Ruma nawi ri xcubi' kac'u'x ruc' ri Cristo, utz cakac'ak bi uk'ij ri Tzij Pixab tz'ibital can ruma ri Moisés y cakabi'ij wa' na jinta chi uchac? ¡Na e ta ri'! Ma ruc' ne ri cubulibal kac'u'x, cakamaj usuc' lic c'o uwach ri Tzij Pixab.
Currently Selected:
Romanos 3: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.