Romanos 1
1
Ri Pablo cuya pan rutzil quiwach ri hermanos e c'o Roma
1Ri'in in Pablo, in raj chac ri Kanimajawal Jesucristo. In c'u siq'uim re quinu'an utako'n y ya'tal chwe cantzijoj ri Utzilaj Tzij re ri Dios. 2Wa' wa Utzilaj Tzij e ri ubi'tisim lo ri Dios ojertan, yey e ri tz'ibital can pa ri Santowilaj Uch'a'tem cuma ruk'alajisanelab. 3Ri Utzilaj Tzij e ri cach'a't puwi Ruc'ajol ri Dios, ri Kanimajawal Jesucristo. Rire xalax wara che ruwachulew yey upetebem chique ri e ralc'o'al ri rey David. 4Yey ruma ri Santowilaj Ruxlabixel ri Dios, xk'alajinic ri Kanimajawal Jesucristo e Uc'ajol ri Dios echiri' ruc' unimal chuk'ab xc'astaj lo chiquixo'l ri ecaminak. 5Ruma c'u Rire, xkac'ul ri sipanic re coju'an oj utako'n cha' uq'uiyal ticawex pa tak ronoje ri tinamit che ruwachulew cacubi' quic'u'x ruc' y caquicoj utzij y jela' calok'ox uk'ij rubi'. 6Yey ralak e alak cuq'uil ri esiq'uim cha' cac'oji' alak puk'ab ri Kanimajawal Jesucristo. 7Quintz'iban c'u pan che onoje alak ri jekel alak pa ri tinamit Roma, ri lic c'ax cana' alak ruma ri Dios y siq'uim alak cha' cu'an alak re ri Dios. C'ulu c'u alak ri unimal rutzil c'u'xaj y ri utzil chomal re ri Kakaw Dios y re ri Kanimajawal Jesucristo.
Ri Pablo caraj que'bina cuc' ri e aj Roma
8Nabe na, ruma ri Kanimajawal Jesucristo, cantioxij che ri nu Dios uma onoje alak, ma che ronoje luwar che ruwachulew lic catataj puwi ri cubulibal c'u'x alak. 9Ri Dios, ri canlok'nimaj ruc' ronoje nuc'u'x echiri' cantzijoj ri Utzilaj Tzij re Ruc'ajol, Rire lic reta'am xaki cancuxtaj alak chwach echiri' can'an orar. 10Cantz'onoj c'u che ri Dios chuya'a na chwe quine'bina uc' alak juna k'ij we e caraj ri' Rire chwe. 11Ma lic cuaj canwil wach alak cha' canto' alak che ri binic silabic alak chwach ri Dios y jela' lic catiqui' alak chi utz. 12Jec'ula' cakanimarisaj kac'u'x chikawach, ma ralak y ri'in junam cubul kac'u'x ruc' ri Kanimajawal.
13Hermanos, lic cuaj c'ut queta'maj alak, ri'in uq'uiyal laj nuch'obom cuaj qui'nwila alak re canto' alak cha' caq'uiy alak chwach ri Dios, jela' pacha' ri nu'anom cuc' ri jujun chic na e ta aj Israel. Pero c'amaja' ya'tal chwe quinopon uc' alak. 14Ri'in lic canna'o chinuwach c'o wi cantzijoj ri Utzilaj Tzij chique conoje; wa' e ri e tijotal pa ri ch'a'tem griego yey ri e aj naj na e tijotal taj, ri lic c'o queta'am yey ri na jinta c'o queta'am. 15Jec'ula' lic cacha wanima' che quin'ec pa ri tinamit Roma re cantzijoj ri Utzilaj Tzij che alak.
Ruchuk'ab ri Utzilaj Tzij
16Ri'in na quinq'uix ta che ri Utzilaj Tzij, ma ruc' wa' cak'alajin ruchuk'ab ri Dios re quebucolobej conoje ri quecojow re; nabe chique ri e aj judi'ab, tec'uchiri' chique ri na e ta aj judi'ab. 17Ma ri Utzilaj Tzij cuk'alajisaj chikawach su'anic cojc'oji' jusuc' chwach ri Dios, yey wa' e ruma ri cubulibal kac'u'x ruc' Rire; ronoje c'u ri kac'aslemal chwach ri Dios e ruma ri cubulibal kac'u'x. Ma jewa' tz'ibital can pa Ruch'a'tem:
Ri e jusuc' chwach ri Dios,
c'o quic'aslemal ruma ri cubulibal quic'u'x ruc' Rire Hab. 2:4
cacha'.
Conoje ri ticawex emacuninak chwach ri Dios
18Lic cak'alajin c'u ri royowal ri Dios echiri' ruk'atbal tzij cape chila' chicaj paquiwi ri ticawex lic itzel quic'u'x chirij ri Dios y na jusuc' ta ri quibinic quisilabic; ma ruma ri na utz taj caqui'ano, quebu'an e latz'anel chique jujun chic cha' na caqueta'maj ta ri K'ijsak. 19Yey rique c'o queta'am puwi ri Dios, ma e Rire k'alajisayom wa' chique. 20Ma e janipa ri na quilitaj ta uwach che ri Dios, pacha' ruchuk'ab na jinta utakexic y runimal uwach Rire, wa' lic xk'alajin lo chwi ri jekebal re ruwachulew ruma ronoje tak ri 'anatal ruma Rire. E uwari'che na usuc' taj we c'o junok cubi'ij: «Na jinta c'o weta'am puwi ri Dios.» 21Pero ri winak tob queta'am chic c'o jun Dios c'aslic, na quiya'om ta c'u ri' ri yacbal uk'ij takal che y na quetioxin tane chwach. Jec'ula' xsach ri quina'oj ma e caquich'ob ri na jinta uchac; yey ruma wa' na caquimaj ta chi usuc' sa' ri utz y sa' ri na utz taj. 22Tob caquibi'ij lic c'o quina'oj, pakatzij wi lic na jinta c'o queta'am. 23Na xquiyac ta chi uk'ij ri Dios c'aslic, ri Jun na cacam taj; ma e xquijek uyaquic quik'ij quic'axwach winak xa quecamic y quic'axwach tak awaj quexiq'uic' pa caj, tak awaj cajib cakan yey tak awaj quecharar pulew.
24Ruma c'u la', ri Dios xebuya can chupa ri ch'ulilaj mac y chupa ri quirayibal na chom taj. Jec'ula' xquijek xemacun chiquiwach, xqui'an ruc' ri quicuerpo ri lic q'uixbal uwach. 25Wa' xquic'ulumaj ma xquic'ak bi ri K'ijsak re ri Dios yey puc'axel e xquitakej ri xa rak'ubal. Ec'u xquiyac quik'ij y xquilok'oj janipa tak ri u'anom ri Dios; yey na e ta xquiyac uk'ij ri 'anayom re janipa tak ri c'olic, ri Jun lic takal che cayac uk'ij na jinta utakexic. Amén.
26Ruma c'u la', ri Dios xerok'otaj can chupa ri quirayibal lic q'uixbal uwach. Xu'ana nenare' ri ixokib xquijalc'atij rusuc' ri quirayibal cuc' ri cachijilal y e xqui'an ri na usuc' taj, ma xquijek caquirayij quib chiquiwach e ixokib. 27Jec'ula' rachijab xquijalc'atij rusuc' ri quirayibal cuc' ri quixokilal; xquitzak c'u quib che u'anic ri lic q'uixbal uwach, ma xquijek caquirayij quib chiquiwach, achijab cuc' achijab. Ruma c'u ri' e xquipetisaj lo ri royowal ri Dios paquiwi' y quic'ulum c'u ri tojbal re ri ch'ulilaj mac qui'anom.
28Rique na xcaj taj caqueta'maj uwach ri Dios. E uwari'che Rire xerok'otaj can chupa ri sachibal na'oj cha' jela' e caqui'an ronoje ri na usuc' taj. 29Jec'ula' e quiya'om quib che u'anic janipa ri na jusuc' taj: wa' e ri caquetz'abej uwa quik'ij cuc' jujun chic na quic'ulel taj, ri caqui'an ri lic itzel uwachlibal, ri e aj rayinel, ri itzel quic'u'x, ri c'ax quic'u'x chiquiwach, ri e camisanel, ri e aj ch'a'oj, ri e socoso'nel, ri caqui'an c'ax chique jujun chic, 30ri e aj molot, ri e aj nuc'ul ch'a'tem, ri itzel quic'u'x chirij ri Dios, ri e aj yajanel ruc' itzel ch'a'tem, ri caqui'an nim che quib, ri caquitac'aba' quik'ij, ri itzel uwach tak ri caquino'jij, ri na e ta cojol tzij que quichu-quikaw, 31ri na cacaj taj quetanic, ri na caqui'an taj sa' ri caquibi'ij, ri na jinta c'ana rutzil c'u'xaj cuc', ri na e ta cuyul mac y ri na jinta c'ana c'axna'bal c'u'xaj cuc'. 32Rique lic queta'am chi utz ri k'atbal tzij re ri Dios paquiwi ri e aj mac, ma Rire ubi'im lo wa': Janipa ri caquipalajij rutakanic, lic takal chique quecamic. Tob c'u e u'anom ri', rique na xew ta caqui'an ri na utz taj, ma lic ne quequi'cot che echiri' caquilo e c'o jujun chic caqui'an que cuc'.
Currently Selected:
Romanos 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.