Santiago 5
5
Pixabanic chique ri beyomab
1Ec'u wo'ora, ralak ri alak beyomab, tanape alak: Chok' alak y juyuy alak ruma ri c'axc'obic cape pawi' alak. 2Ma ri beyomalil alak xa cak'ayic y ri chomilaj k'u' alak xa capoq'uiric. 3Ri oro y ri plata c'olom alak cu'an mojos, yey wa' e c'utubal re na utz ta 'anom alak, ma e benak c'u'x alak ruc' ri beyomalil re ruwachulew. Ruma c'u ri', wa' e cu'ana pacha' ri ak' asu cuporoj ri ti'jil alak echiri' ri Dios cuk'at tzij pawi' alak, ma ralak molom alak uchi' uq'uiyal beyomalil chupa wa' wa q'uisbal k'ij oj c'o wi.
4Ec'u raj chac xechacun chwa tak rulew alak, na tz'akat ta ri cajil xya alak. Ri cajil wa aj chac na tojom ta alak e pacha' catunan chi'ij alak. Yey ri tunanic que wa aj chac xtataj ruma ri Dios Kajawxel ri c'o unimal uchuk'ab.
5Ralak ya'om ib alak chupa ronoje rukusil ruwachulew y ya'om ib alak che u'anic tak ri rayibal alak. Ri 'anom alak e pacha' ri ca'an che juna chicop lic catzuk chi utz re cati'o'jrisaxic ma ya copon ri k'ij cacamisaxic.
6E ralak k'atom alak tzij paquiwi ri na emacuninak ta chi'ij alak yey e ne ralak camisayom alak que. Yey rique na caquich'ij taj caquito'bej quib chiwach alak.
Runimal c'u'xaj chupa ri c'axc'obic
7Pero ralak hermanos, ruc' unimal c'u'xaj choye'ej alak ruc'unibal ri Kanimajawal Jesucristo. Ch'obo pe alak, juna awanel caroy'ej na ri chomilaj uwach rutico'n y ruc' unimal uc'u'x caroy'ej na ruk'ijol ri nabe jab y ri q'uisbal jab.#5:7 “Ruk'ijol ri nabe jab y ri q'uisbal jab”: Ri nabe jab e ri catzak pa octubre echiri' catic ri trigo. Ri q'uisbal jab e ri catzak pa abril echiri' c'amaja' camol ri trigo. Ucabichal wa' lic cajawax che ri tico'n. 8Jec'ula' 'ana ralak, choye'ej alak ri Kanimajawal ruc' unimal c'u'xaj yey jiquiba' c'u'x alak ruc' Rire, ma ruc'unibal xa nakaj chi c'o wulok.
9Hermanos, mach'a'tibej ib alak chiwach alak cha' jela' na cak'at ta tzij pawi' alak. Cheta'maj c'u alak wa': Ri Dios, ri Aj K'atal Tzij, xa ri' chi c'o wulok. 10Alak nu hermanos, e c'ama na'oj alak che ri xqui'an ri k'alajisanelab ri xech'a't chupa rubi' ri Dios Kajawxel, ma rique ruc' unimal quic'u'x xquich'ij uchuk'ab ri c'axc'olil. 11Yey ri'oj keta'am lic nim quik'ij calaxic ri caquich'ij uchuk'ab ri c'axc'obic. Tom chi alak puwi runimal uc'u'x ri Job y eta'am alak ri utz xuc'am lo ri Dios che rire pa ri q'uisbal re ri xuc'ulumaj. Ma ri Dios lic cuc'ut ri rutzil uc'u'x y ri c'axna'bal uc'u'x.
12Puwi c'u ronoje ri ca'an alak nu hermanos, mac'o majiquiba' alak uwach pubi' ri caj o pubi' ruwachulew o pubi' juna chic. Ri 'ana alak e wa': We katzij, xew bi'ij alak: «Katzij»; no'j we na katzij taj, xew bi'ij alak: «Na katzij taj» cha' jela' na cape ta ri k'atbal tzij re ri Dios pawi' alak.
Ri oración
13¿C'o junok paxinak uc'u'x chixo'libal alak? Chutz'onoj uto'bal che ri Dios. ¿C'o junok caqui'cotic? Chubixoj rubi' ri Dios. 14¿C'o juna yewa' chixo'libal alak? Chebusiq'uij ri e aj wach re riglesia cha' caqui'an orar puwi', caquicoj c'u aceite puwi' chupa rubi' ri Kanimajawal. 15Ec'u ri oración ca'an ruc' cubulibal c'u'xaj chwach ri Dios, e cacoloben ri yewa' che ri yabil y ri Dios e cayacaw re. Yey we macuninak ri yewa', cacuytaj c'u umac ri'. 16Tzelej tzij alak chiwach alak y 'ana alak orar pawi' alak chiwach alak cha' jela' cacunutaj alak. Ma lic c'o uchuk'ab ri sakil oración cu'an junok jusuc' rubinic usilabic.
17Ri k'alajisanel Elías junam uwach kuc' ri'oj ma xa ticawex. Na ruc' ta c'u ri', xutz'onoj che ri Dios ruc' ronoje uc'u'x cha' na cu'an ta chi jab y na xu'an ta chi jab che ruwachulew oxib junab ruc' nic'aj. 18Jec'uri'la', xu'an tanchi orar cha' catzak ri jab; y xtzak c'u ri jab y ri tico'n che ruwachulew xuya tanchi uwach.
19Hermanos, we c'o junok chixo'libal alak uya'om can ri K'ijsak, yey c'o c'u junok catzelen lo re, 20cheta'maj c'u alak ri': E ri quesan lo wa aj mac chupa ri na utz taj cu'ano, ri' e cucolobej jun ticawex cha' na casach ta uwach y cha' cacuytaj ruq'uiyal umac.
Currently Selected:
Santiago 5: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.