Santiago 4
4
Me'ec kac'u'x ruc' ri xa re ruwachulew
1¿Pa tak cape wi ri ch'a'oj y ri oyowal chiwach alak? Wa' pa anima' alak cape wi, ma ri rayibal e alak e pacha' c'o pa ch'a'oj ruc' ri caraj ri Dios che alak. 2Lic c'o carayij alak yey wa' na caya'taj ta che alak. Caq'uis c'u ib alak che retzelal c'u'xaj; ruma c'u ri' catij alak uk'ij che uc'ulic ri ca'aj alak, cach'o'jin alak y ca'an ne alak camic y ch'a'oj. Pero na cac'ul ta alak ri ca'aj alak ma na catz'onoj ta alak wa' che ri Dios. 3Yey ri catz'onoj alak, na cac'ul ta alak ma na utz ta utz'onoxic ca'an alak. Ma ri catz'onoj alak xa e re catz'ila' alak che ri rayibal alak.
4Ralak ri na jusuc' ta ri anima' alak chwach ri Dios, ¿na eta'am ta cami alak we jun cujunimaj rib ruc' tak ri rayinic xa re ruwachulew, e junam ruc' cach'o'jin chirij ri Dios? China c'u ri que'ec uc'u'x ruc' ri rayinic xa re ruwachulew, ri' e cu'ana aj retzelal c'u'x chirij ri Dios. 5Laj cach'ob c'u alak rakan na il ta uwach Ruch'a'tem ri Dios pa cubi'ij wi: «Ri Ruxlabixel uya'om ri Dios pa kanima' lic c'ax cojuna'o y lic na cuc'ul ta uc'u'x we lic e que'ec kac'u'x ruc' tak ri xa re ruwachulew»#Éx. 20:4-5; Dt. 4:24; Zac. 8:2 cacha'. 6Pero ri Dios lic nim ri unimal rutzil uc'u'x cuya chike. Ruma la' jewa' tz'ibital pa Ruch'a'tem:
Ri Dios uyacom rib chiquij
janipa ri caquitac'aba' quik'ij;
no'j uya'om ri unimal rutzil uc'u'x chique
janipa ri caqui'an ch'uti'n che quib Pr. 3:34
cacha'.
7E uwari'che, ya'a ib alak puk'ab ri Dios; ch'ija alak uchuk'ab ritzel winak y jec'ula' rire canimaj chiwach alak. 8Lic kib alak ruc' ri Dios y jela' Rire cakib uc' ralak. Ralak ri c'o alak pa mac, chomaj alak ri binic silabic alak. Ec'u ralak ri xa queb c'u'x alak, ri ca'aj alak c'ax cana' alak ri Dios yey lic que'ec c'u'x alak ruc' ri mac re ruwachulew, lic chomaj ri anima' alak che wa'. 9Chubisoj c'u'x alak ri 'anom alak, c'ax chuna'a c'u'x alak y chok' alak ruma wa'. Ec'u ri' ri tze' alak chu'ana ok'ej y ri qui'cotemal alak chu'ana bis. 10'Ana c'u alak ch'uti'n che ib alak chwach ri Dios; yey we ca'an c'u alak wa', Rire cuyac k'ij alak.
Makach'a'tibej kib chikawach
11Hermanos, mach'a'tibej ib alak chiwach alak. Ma e ri cach'a't chirij ri ratz-uchak' y cuk'at tzij puwi' xa pa re rire, ri' e junam ruc' e cach'a't chirij ri Tzij Pixab y cuk'at tzij puwi wa'. Yey we ca'an la wa', ri' e que'elok na lal ta 'anal re ri Tzij Pixab; ec'u ca'an che ib la lal aj k'atal tzij puwi'. 12Ma xa Jun ri ya'yom lo re ri Tzij Pixab y xew Rire c'o puk'ab cojucolobej o cusach kawach. No'j rilal ¿sa' ri wach la cha' xa pa e la cak'at la tzij puwi jun chic?
Na keta'am taj sa' ri cakac'ulumaj chwe'k
13Wo'ora tape alak, ri jewa' cabi'ij alak: «Wak'ij o chwe'k coj'ec pa jun tinamit y cojc'oji' chila' jun junab; caka'an c'u kac'ay y cakach'ac karajil» cacha alak. 14Yey na eta'am tane c'ana alak sa' ri cac'ulumaj alak ri chwe'k. Ma ¿sa' ri unimal uwach ri c'aslemal alak? Pakatzij wi, xa pacha' sutz', ma xa pa jok'otaj cawinakiric y tec'uchiri' casachic. 15Yey ri chirajawaxic wi e cabi'ij alak wa': «We ri Kakaw caraj, cojc'asi'ic y caka'an wa'riri' o caka'an lele'» cacha alak. 16No'j ri ca'an ralak, e lic ca'an alak nim che ib alak echiri' catac'aba' k'ij alak. Yey lic na usuc' taj we junok cutac'aba' uk'ij. 17E junok reta'am sa' ri utz chirajawaxic ca'anic yey na cu'an taj, ri' camacunic.
Currently Selected:
Santiago 4: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.