1 Pedro 1
1
Ri Pedro cuya pan rutzil quiwach ri echa'tal ruma ri Dios
1Ri'in in Pedro, in tako'n re ri Kanimajawal Jesucristo. Quintz'iban pan che alak, ri naj c'o wi alak che ri katinamit, ri jekel alak pa tak ri luwar re Ponto, re Galacia, re Capadocia, re Asia y re Bitinia. 2Ralak cha'tal lo alak ruma ri Kakaw Dios, ma jela' uch'obom chi lo Rire ojertan. Ec'u wo'ora, ruma ri Ruxlabixel ri Dios, ya'tal che alak cac'oji' alak che jun santowilaj binic cha' cacoj alak utzij ri Dios y cach'ajtaj ri mac alak ruc' ruquiq'uel ri Kanimajawal Jesucristo. E lic q'uiyar na c'u pawi' alak ri unimal rutzil c'u'xaj y ri utzil chomal re ri Dios.
Cubul pan kac'u'x che uc'ulic janipa ri cuya ri Dios chike
3Lic nim uk'ij ri Dios, Rukaw ri Kanimajawal Jesucristo, ma ruma ri unimal rutzil uc'u'x xuya jun c'ac' kabinic kasilabic. Yey ruma ruc'astajibal lo ri Kanimajawal Jesucristo chiquixo'l ri ecaminak, lic cubul pan kac'u'x che uc'ulic ri c'aslemal ubi'tisim chike. 4Yey wa koye'em na casach ta uwach, na cach'ulax ta uwach ruc' ri mac y na cachup tane c'ana ruchomal. Jiquibam c'u uwach ri' caya'taj wa' che alak chila' chicaj. 5Ruma c'u ri cubulibal c'u'x alak ruc' ri Dios, Rire cuchajij alak ruc' ruchuk'ab cha' jela' cac'ul alak ri colobetajic bi'tisim chi che alak yey wa' cak'alajin na chupa tak ri q'uisbal k'ij.
6Ruma c'u ri', caqui'cot alak wo'ora, tob copon jujun k'ij chirajawaxic quic'ow na alak pa tak uq'uiyal c'axc'olil 7cha' cac'am pa alak puwi ri cubulibal c'u'x alak ruc' ri Dios jela' pacha' ca'an che ri oro echiri' quic'owisax pa ak', ilibal re we sakil oro. Yey ri cubulibal c'u'x ralak ruc' ri Dios más c'o uwach chwa ri oro, ma ri oro xa caq'uisic. We xch'ij c'u alak wa c'axc'obic quic'owibej alak, ri' re yacbal k'ij ralak y re yacbal uk'ij ri Dios. Ma echiri' ri Kanimajawal Jesucristo cuk'alajisaj uwach chikawach apanok, cutac'aba' k'ij ralak ruma ri cubulibal c'u'x alak ruc' ri Dios. 8Ralak c'ax cana' alak ri Jesús tob na ilom ta alak uwach Rire, yey cubul c'u'x alak ruc' tob na quil ta alak uwach wo'ora. Y caqui'cot alak ruc' unimal qui'cotemal, yey wa' na carikitaj tane ubi'xiquil. 9Caqui'cot c'u alak, ma cac'ul na alak ri colobetajic oye'em alak ruc' cubulibal c'u'xaj.
10Ri k'alajisanelab re ojertan xek'alajisan lo puwi ri unimal rutzil uc'u'x ri Dios, ri caya'i' che ralak. Rique lic xquiya quina'oj puwi wa colobetajic y lic xquitij uk'ij umajic usuc' wa'. 11Ma c'o ri xuk'alajisaj ri Ruxlabixel ri Cristo chique puwi tak ri c'axc'obic cutij Rucha'o'n lo ri Dios y ri yacbal uk'ij ca'anic echiri' ic'owinak chi chupa wa'. Ec'u rique xquich'ob rakan china puwi' xbi'x wa' y jampala' cu'ana'. 12Yey ri Dios xuk'alajisaj chique wa' wa k'alajisanelab na caquil ta wa' chupa tak ri k'ij e c'o wi rique, ma wa' e cu'ana chupa tak wa k'ij oj c'o wi ri'oj. Yey wa' e ri xya' che alak cuma ri quitzijom ri Utzilaj Tzij ruc' ruchuk'ab ri Santowilaj Ruxlabixel ri Dios, ri xtak lo chila' chicaj. Yey ri ángeles lic cacaj ne caquimaj usuc' tak wa'.
Ri Dios cojusiq'uij che jun santowilaj binic
13E uwari'che suc'upij alak ri na'oj alak, lic ch'obo na alak rakan sa' tak ri ca'an alak. E choye'ej alak ri unimal rutzil uc'u'x ri Dios, ri caya' na che alak echiri' cak'alajisax uwach ri Kanimajawal Jesucristo. 14Ralak alak chi ralc'o'al ri Dios, ruma c'u ri' cojo alak utzij Rire. Maya c'u ib alak che ri rayinic c'o wi alak ojertan echiri' c'amaja' queta'maj alak uwach ri Dios. 15Ma jela' pacha' ri Jun siq'uiyom e alak lic na jinta c'ana mac ruc', jec'ula' 'ana alak che ri binic silabic ralak. 16Ma jewa' tz'ibital can pa Ruch'a'tem ri Dios:
Chi'ana jusuc' che ri ibinic isilabic,
ma Ri'in na jinta c'ana mac wuc'. Lv. 19:2
17Yey we cabi'ij alak «Kakaw» che ri Jun na cacha'w ta chiquixo'l ri ticawex echiri' cu'an k'atbal tzij paquiwi conoje ruma tak ri qui'anom, ri' lic chirajawaxic che alak cabin alak ruc' xi'in ib chwach Rire ronoje k'ij che ri c'aslemal alak. 18Ma lic eta'am alak, ri Dios xresaj lo alak che ri binic silabic alak na chom taj, ri xc'ut can che alak cuma ri chu'kaw alak ojertan. Yey rutojic xu'an ri Dios re caresaj lo alak puk'ab ri mac, na e ta ruc' oro o ruc' plata, ma wa' xa casach uwach; 19rutojic xu'ano e ruc' ri lok'laj uquiq'uel ri Cristo, ri xya'i' pa camic pacha' juna k'apoj bexex lic chom y na yewa' ta uwach caya'i' chwach ri Dios. 20Yey ri Cristo cha'om chi lo ojertan chwi lo echiri' c'amaja' ne ca'an ruwachulew; pero c'a ec'u wo'ora chupa wa q'uisbal k'ij oj c'o wi, ri Dios xuc'utubej uwach ruma ri rutzil uc'u'x che alak. 21Ruma c'u ri Kanimajawal Jesucristo, xcubi' c'u'x alak ruc' ri Dios, ma e Rire ri xuc'astajisaj lo ri Cristo chiquixo'l ri ecaminak y lic xuyac uk'ij. Ruma c'u ri', cubul c'u'x alak ruc' ri Dios y oye'em alak che Rire janipa ri ubi'tisim che alak.
22Ruma xcoj alak ri K'ijsak, wo'ora xu'an chom ri c'aslemal alak cha' pakatzij wi c'ax cana' ib alak ri chak' ib alak chupa rubi' ri Cristo. E uwari'che lic c'ax na'a ib alak chiwach alak ruc' ronoje chuk'ab alak y ruc' ronoje c'u'x alak. 23Ma ralak alak alaxinak tanchic y wa' na e ta cuma ri chu'kaw alak ri xa e ticawex, ma e ruma Ruch'a'tem ri Dios, ri lic c'aslic y na casach ta c'ana uwach. 24Ma jewa' tz'ibital can pa Ruch'a'tem ri Dios:
Conoje ri ticawex e jela' pacha' rak'es
yey ri yacbal quik'ij e pacha' rucotz'i'jal rak'es;
ma rak'es xa cachup uwach
y rucotz'i'jal xa cachakijic y capukic.
Jec'ula' ri' ri ticawex xa quecamic
y ri yacbal quik'ij xa casach uwach,
25no'j Ruch'a'tem ri Dios na casach ta c'ana uwach Is. 40:6-8
cacha'. Yey wa ch'a'tem e ri Utzilaj Tzij tzijotal chi lo che alak.
Currently Selected:
1 Pedro 1: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.