Popular Bible Verses from Santiago 4

Share

E uwari'che, ya'a ib alak puk'ab ri Dios; ch'ija alak uchuk'ab ritzel winak y jec'ula' rire canimaj chiwach alak.

Lic kib alak ruc' ri Dios y jela' Rire cakib uc' ralak. Ralak ri c'o alak pa mac, chomaj alak ri binic silabic alak. Ec'u ralak ri xa queb c'u'x alak, ri ca'aj alak c'ax cana' alak ri Dios yey lic que'ec c'u'x alak ruc' ri mac re ruwachulew, lic chomaj ri anima' alak che wa'.

'Ana c'u alak ch'uti'n che ib alak chwach ri Dios; yey we ca'an c'u alak wa', Rire cuyac k'ij alak.

Pero ri Dios lic nim ri unimal rutzil uc'u'x cuya chike. Ruma la' jewa' tz'ibital pa Ruch'a'tem: Ri Dios uyacom rib chiquij janipa ri caquitac'aba' quik'ij; no'j uya'om ri unimal rutzil uc'u'x chique janipa ri caqui'an ch'uti'n che quib cacha'.

E junok reta'am sa' ri utz chirajawaxic ca'anic yey na cu'an taj, ri' camacunic.

Yey ri catz'onoj alak, na cac'ul ta alak ma na utz ta utz'onoxic ca'an alak. Ma ri catz'onoj alak xa e re catz'ila' alak che ri rayibal alak.

Ralak ri na jusuc' ta ri anima' alak chwach ri Dios, ¿na eta'am ta cami alak we jun cujunimaj rib ruc' tak ri rayinic xa re ruwachulew, e junam ruc' cach'o'jin chirij ri Dios? China c'u ri que'ec uc'u'x ruc' ri rayinic xa re ruwachulew, ri' e cu'ana aj retzelal c'u'x chirij ri Dios.

Yey na eta'am tane c'ana alak sa' ri cac'ulumaj alak ri chwe'k. Ma ¿sa' ri unimal uwach ri c'aslemal alak? Pakatzij wi, xa pacha' sutz', ma xa pa jok'otaj cawinakiric y tec'uchiri' casachic.