2 Corintios 3
3
1Echiri' quinch'a't chwi ri chac uya'om ri Dios chike, na e ta re cantac'aba' kak'ij. Ma ¿cajawax nawi canya juna carta chiwach alak, c'utubal re ri chac ka'anom? ¿Cajawax nawi cantz'onoj che alak catz'ibaj alak juna carta cubi'ij we utz ri chac ka'anom? Laj c'o jujun cajawax wa' chique, pero ri'oj na cajawax ta chike; 2ma e ralak ri alak kacarta, alak c'utubal re ri kachac ka'anom. Lic tz'ibital c'u pa kanima' janipa ri u'anom ri Dios uc' alak kuma ri'oj, yey wa chac lic cak'alajin chiquiwach conoje ri ticawex ruma ri c'ac' binic silabic alak. 3Lic c'ut k'alaj e alak c'utubal re ri kachac ka'anom, e pacha' alak jun carta tz'ibital ruma ri Cristo. Yey wa' wa carta na ruc' ta tinta tz'ibital wi, e ruma ri Ruxlabixel ri Dios c'aslic; y na chwa ta ne jutak pera'j abaj xtz'ibax wi pacha' u'anom ojertan,#Éx. 24:12 ma tz'ibital chupa ri canima' ri ticawex.
4Ruma c'u ri u'anom ri Cristo kuc', cakajiquiba' uwach ri cakabi'ij puwi ri kachac yey ri Dios reta'am lic katzij wa'. 5We ta e la' xa katuquel, na cakach'ij ta u'anic wa chac, ma keta'am xew ruc' ri Dios petinak wi ri kana'oj y kachuk'ab che u'anic ruchac Rire. 6Ec'u ri Dios mismo ri xya'w wa chac chike, uya'om kana'oj y kachuk'ab re cakak'alajisaj chi utz ri c'ac' tzij cu'an Rire cuc' ri ticawex. Yey na cu'an ta wa' ruma katakem takanic, ma e ruma ri cu'an ri Ruxlabixel ri Dios pa kanima'. Ma ri takanic cuc'am lo k'atbal tzij re camic pakawi', no'j ri cuya ri Ruxlabixel ri Dios chike e c'aslemal.#Ez. 11:19-20
Ri c'ac' tzij
7Ri takanic tz'ibital can chwa abaj cuc'am lo camic, pero lic c'o uchomalil. Ma lic xwon rupalaj ri Moisés echiri' xuc'ul wa takanic, c'utubal re ruchomalil Rutzij ri Dios. Yey ri e aj Israel na utz ta xquitzu' uwach ri Moisés ruma wa' wa wonibal,#Éx. 34:29 yey wa' xa xic'owic. 8We c'o c'u uchomalil ri takanic xuya lo ri Dios ojertan, ¡janipa c'u lo ri' ruchomalil ruchac ri Ruxlabixel ri Dios cu'an kuc'! 9We c'o c'u uchomalil wa takanic, ri xuk'alajisaj ri k'atbal tzij re ri Dios paquiwi ri ticawex ruma ri quimac, ¡janipa c'u lo ri' ruchomalil ri jun chic tzij, ri cuc'ut chike su'anic coju'an jusuc' chwach ri Dios! 10Ri takanic xuya ri Dios ojertan c'o uchomalil, pero ruchomalil wa' na cajunimax ta c'ana ruc' ri c'ac' tzij. 11Rupalaj ri Moisés xwon xa pa jok'otaj ruma ruchomalil ri Tzij xuya ri Dios che; pero ¡más c'o uchomalil ri' ri c'ac' tzij, ma wa' na casach taj!
12Ruma lic cubul kac'u'x che wa na casach taj, ri'oj lic cakak'alajisaj chi utz ri c'ac' tzij y na jinta cakewaj che. 13Na e ta pacha' rojertan echiri' ri Dios xuya ri takanic che ri Moisés, ma rire xuch'uk rupalaj ruma lic xwonic, cha' ri e aj Israel na caquitzutza' ta ruwonibal, ri xa quic'owic.#Éx. 34:29-35 14Ec'u rique na xcaj ta caquimaj usuc' Rutzij ri Dios y c'a e ne wak'ij ora echiri' cacajilaj wa Tzij Pixab xuya ri Dios ojertan, na caquimaj ta usuc'; e pacha' ch'ukutal ri quiwach. Yey wa' wa ch'ukuyum ri quiwach, xew ri Cristo quesan re chique. 15C'a wak'ij ora nenare' echiri' cacajilaj wa Tzij Pixab tz'ibital can ruma ri Moisés, e pacha' ch'ukutal ri quiwach y ruma la' na cak'alajin ta ri K'ijsak chiquiwach.#3:15 Wa' e que'elawi na caquimaj ta usuc' ri K'ijsak. 16No'j echiri' junok cutzelej utzij chwach ri Kanimajawal, quesax na c'u ri' ri ch'ukuyum ruwach. 17Ri Kanimajawal e junam ruc' ri Ruxlabixel ri Dios;#3:17 Ri Kanimajawal y ri Ruxlabixel ri Dios junam quic'u'x y junam quina'oj. y china ri c'o ri Ruxlabixel ri Kanimajawal pa ranima', na jinta chi chuxe' rutakanic junok chic. 18Konoje ri'oj na ch'ukutal ta chi ri kawach. E uwari'che, cakil chi utz ruchomalil ri Kanimajawal y cojwolk'in che uk'alajisaxic wa' ruc' ri kabinic kasilabic. Ma jalan catajin kajalc'atixic cha' jela' coju'ana pacha' ri Kanimajawal. Yey ri Ruxlabixel Rire e ri ca'anaw re wa' kuc'.
Currently Selected:
2 Corintios 3: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.