2 Corintios 2
2
1Ruma c'u la', xinch'obo na quinopon ta tanchi uc' alak, ma na xuaj taj canya alak pa bis. 2Ma we ri'in canya alak pa bis, ¿china chi c'u ri' caya'w qui'cotemal chwe ri'in? Na jinta c'u nuqui'cotemal ri' we nuya'om alak pa bis. 3Ruma c'u ri' xintz'iban pan che alak,#2:3 Quil nota 2 Corintios 1:23. cha' we xinopon uc' alak, na quinya ta alak pa bis, ma qui'cotemal ri canwoy'ej che alak. Lic c'ut cubul nuc'u'x uc' onoje alak, ma weta'am e janipa ri cuya qui'cotem chwe ri'in, cuya qui'cotem che ralak. 4Na xa ta jubik' ri c'ax y ri paxibal c'u'x xinic'ow wi echiri' ruc' ok'ej xintz'iban pan che alak. Na xin'an ta c'u wa' cha' canya alak pa bis, ma e xin'ano cha' queta'maj alak lic nim ri rutzil nuc'u'x che alak.
Cuyu alak umac ri jun xutzelej utzij
5Xintz'iban c'u pan puwi ri jun xinuya ri'in pa bis ruma rumac u'anom. Y na xew ta ri'in, ma laj ne uya'om onoje ralak pa bis. (Cambi'ij “Laj” cha' na lic ta c'ax catataj wa nuch'a'tem.) 6Cu'an na c'u la' janipa ri x'an alak che wa jun ticawex echiri' xk'at alak tzij puwi', ma ruc' wa' xutzelej utzij. 7Ec'u ri takal che ca'an alak wo'ora e cuyu alak umac y bochi'ij alak uc'u'x cha' jela' na casach ta ruma runimal ubis. 8Cantz'onoj c'u co che alak c'utu tanchi alak ri rutzil c'u'x alak che. 9Ri xuaj ri'in ruc' wa carta e canwilo we coc alak il che ronoje ri nupixabanic. 10We ralak cacuy alak umac junok, jela' ri'in cancuy umac. We c'o c'u cajawax wi cacuy umac, ri'in nucuyum chi umac uma ralak y chupa rubi' ri Cristo. 11Can'an c'u wa' cha' ri Satanás na cumaj ta uchuk'ab pakawi', ma lic keta'am chi runo'jibal chikij.
Ri Pablo xraj cuto sa' u'anom riglesia c'o Corinto
12Echiri' xinopon chupa ri tinamit Troas che utzijoxic ri Utzilaj Tzij re ri Cristo, lic chom ri jekebal re ri nuchac xuya ri Kanimajawal chwe; 13na ruc' ta c'u ri', na xcubi' ta ri wanima', ma na xinrik ta ri hermano Tito chila'. Ruma c'u ri', xebenuya can ri hermanos e c'o Troas y ximpe Macedonia cha' co'lnutzucuj.#2:13 Ri Pablo lic roye'em quirason ri hermanos e c'o Corinto, ma caraj careta'maj we xutzir ri problema e c'o wi. Quil 2 Corintios 7:5-16.
Ri chomilaj chac uya'om ri Dios chike
14¡Xa maltiox c'u che ri Dios! Ma cojel pan chi utz chwa ronoje ruma ri Cristo, yey ya'tal chike cakak'alajisaj ruc'u'x Rire. Ma kuma ri'oj que'ec utzijoxic ri Cristo che ronoje luwar, e pacha' cunabal qui' ruxlab camuyuyic. 15Oj c'u pacha' cunabal lic qui' ruxlab camuyuyic copon chwach ri Dios, ma kuma ri'oj cak'alajin ruc'u'x ri Cristo chiquiwach ri quecolobetajic y chiquiwach ri catajin quisachic. 16Ec'u rutzijoxic caka'ano e pacha' utewul camic chiquiwach ri na cacaj ta caquito, ma cuc'am lo camic paquiwi'. No'j chiquiwach ri quec'uluw re, e pacha' cunabal qui' ruxlab, ma cuc'am lo chomilaj c'aslemal chique. Chwach c'u wa' wa nimalaj chac re ri Dios, ¿china cach'ijow u'anic?#2 Co. 3:5
17Ri'oj na caka'an ta pacha' ri caqui'an jujun, ma e q'ui ri quijalc'atim Ruch'a'tem ri Dios, xa qui'anom ch'acabal puak che rutzijoxic; no'j ri caka'an ri'oj chwach ri Dios y pa rubi' ri Cristo, e cakatzijoj pa sakil wi ri Tzij uya'om ri Dios chike.
Currently Selected:
2 Corintios 2: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.