2 Corintios 4

Ri Pablo cuk'alajisaj ri chomilaj K'ijsak re ri Dios

1Ruma c'u wa' na capax ta kac'u'x che u'anic wa chac, ma wa' ya'tal chike ruma ri rutzil uc'u'x ri Dios. 2Ri'oj na jinta c'o caka'an xa xe'lak'ay y q'uixbal uwach, na quekasoc tane ri ticawex yey na cakacoj tane uwi' ri cubi'ij Rutzij ri Dios. Ma e cakac'ut pa sakil wi ri K'ijsak cha' jela' conoje ri quetaw re, caqueta'maj lic jusuc' ri caka'ano. 3Yey we c'o caquich'obo na k'alaj ta ri Utzilaj Tzij, wa' e chique ri catajin usachic quiwach. 4Rique na caquicoj ta ri Utzilaj Tzij ma sachisam ri quina'oj ruma ri jun catakan che ruwachulew; wa' e ritzel winak, ri xu'an pacha' potz' chique cha' na caquil ta ri chomilaj K'ijsak re ri Cristo, ri cuc'utubej uwach ri Dios. 5Na e ta c'u cakatzijoj kib ri'oj; ri cakatzijoj e ri Jesucristo e Takanel paquiwi conoje yey ri'oj xa oj nimanel e alak, ma e caraj ri' ri Jesús chike.#Lc. 22:27 6Ma ri Dios ri xtakan che xwon ri k'ijsak chupa ri k'eku'm,#Gn. 1:2-3 e Rire ri xwon chupa ri kanima' cha' ruc' la' caketa'maj runimal uchomalil Rire, ri cak'alajin ruma ri Cristo.#4:6 “Cak'alajin ruma ri Cristo”: Pa ri ch'a'tem griego cubi'ij “che rupalaj ri Jesús”. Mt. 17:2; Jn. 8:12

Mapax kac'u'x tob cojic'ow pa c'axc'obic

7Ri K'ijsak re ri Dios e jun nimalaj beyomalil, yey uk'alajisam wa' chike tob ri'oj xa oj ulew poklaj. Jela' xu'ano cha' cak'alajin wa': Ri unimal chuk'ab c'o kuc', na ke ta ri'oj, ma ruc' ri Dios cape wi. 8Tob cape c'u uq'uiyal uwach c'axc'obic pakawi', cojel na chupa. Tob c'o ubis kac'u'x, na capax ta kac'u'x che. 9Tob cojternabex ruc' c'ax, ri Dios na oj rok'otam taj. Tob ne cojmach'ax pulew, na caquisach ta kawach. 10Pa tak coj'ec wi, ri kacuerpo xaki chwach ri camic c'o wi, jela' pacha' ri xuc'ulumaj ri Jesús; yey cojic'ow chupa wa' cha' ruc' ri kabinic kasilabic cak'alajin ruc'aslemal ri Jesús.#4:10 Echiri' cakach'ij uchuk'ab tak ri c'axc'obic, cak'alajinic e ruma ruchuk'ab y ruto'bal ri Jesús kuc'. 11Wa oj c'o wara che ruwachulew, xaki catewun ri camic pakawi' ruma oj aj chac re ri Jesús; yey cojic'ow chupa wa' cha' quilitaj ruc'aslemal ri Jesús che ri kacuerpo, tob ri kacuerpo na jinta ucowil ma xa cacamic. 12Jela' c'u ri' ri camic c'o pakawi' ri'oj; yey ruma wa', ralak rikom alak ri chomilaj c'aslemal re ri Dios.

13Ec'u Rutzij Upixab ri Dios cubi'ij:

Xcubi' nuc'u'x ruc' ri Dios,

e uwari'che xink'alajisaj Rutzij Rire. Sal. 116:10

Jec'ula' ri'oj cubul kac'u'x ruc' ri Dios; e uwari'che cakatzijoj rubi'. 14Keta'am c'ut e ri xc'astajisan lo re ri Kanimajawal Jesús chiquixo'l ri ecaminak, jela' cu'an chike ri'oj; cojuc'astajisaj y junam uc' alak cojuc'am bi ruc' Rire. 15Ronoje c'u wa kic'owibem e uma ralak, cha' jela' caq'uiyar quiwach ri quec'uluw re ri unimal rutzil uc'u'x ri Dios. Yey wa' e re yacbal uk'ij ri Dios, ma jela' lic e q'ui ri caquitioxij ri unimal rutzil uc'u'x ri Dios paquiwi'.

16E uwari'che na capax ta kac'u'x, tob ne wa kacuerpo catajin uri'jobic; no'j ruc'u'xibal ri kac'aslemal na je ta la' u'anom, ma jalan cac'oji' ne más kachuk'ab ri jujun k'ij. 17Janipa tak wa c'ax cakatij che ruwachulew xa quic'owic, yey wa' lic c'o cutikoj che ri kabinic kasilabic y che ri chomilaj kac'aslemal chila' chicaj, ri na jinta utakexic y na jinta c'ana cajunimax wi. 18Ec'u ri'oj na cakaya ta kac'u'x che ri quilitaj wara che ruwachulew, e cakaya kac'u'x che ri na quilitaj taj; ma ronoje ri quilitaj uwach xa caq'uisic, no'j ri na quilitaj ta uwach na jinta utakexic rucowil.

Currently Selected:

2 Corintios 4: acrT

Highlight

Copy

Compare