2 Corintios 12
12
Tob ri Pablo lic utijom c'ax, ruchuk'ab ri Dios c'o ruc' rire
1Tob na jinta cutikoj che junok cu'an nim che rib, na ruc' ta c'u ri' cantzijoj sa' ruc'utum y ruk'alajisam ri Kajawal chinuwach. 2Lic weta'am c'u uwach jun achi uya'om rib puk'ab ri Cristo. Ec'u cajlajuj junab wa' ric'owic echiri' rire xc'am bi c'a chila' chicaj. Na weta'am ta c'ut we xc'am bi ruc' rucuerpo o xa e ri ranima' xe'ec, xew ri Dios eta'mayom re. 3Xew c'u weta'am xc'am bi, tob pacha' ri nubi'im chic, na weta'am taj we xc'am bi ruc' rucuerpo o xa e ri ranima' xe'ec, xew ri Dios eta'mayom re. 4Ri weta'am, e xc'am bi chupa ri chomilaj luwar chila' chicaj. Chila' c'u ri' xuta chomilaj tak tzij yey wa' na ya'tal tane c'ana che junok cutzijoj. 5Cambi'ij c'u ri', utz canyac uk'ij ri xilow re y ri xtaw re wa'. Pero we canyac nuk'ij ri'in, na e ta cantzijoj ri k'alajisam chwe, ma xew cantzijoj ri c'akibal bi nuk'ij. 6Ma we ta cuaj canyac nuk'ij ruma ruk'alajisam ri Dios chwe, ri' na rak'ubal ta ri cambi'ij, ma lic e ube ri'. Pero na can'an taj, ma na cuaj taj c'o junok cucoj uwi ri ilitajinak y ri tatajinak chwe.
7Yey cha' na canyac ta c'u nuk'ij ruma na jinta c'ana c'o wi ri k'alajisam chwe, xya'taj c'u che ri Satanás cucoj jun c'ax che ri nucuerpo pacha' juna q'uix xaki cuch'iquich'a' chwe. 8Ruma c'u ri', oxlaj xinelaj che ri Kajawal cha' caresaj wa' chwe. 9No'j Rire jewa' xubi'ij chwe: «Ri unimal rutzil nuc'u'x c'o awuc', e wa' ri lic cajawax chawe. Ma ri nuchuk'ab más cak'alajin cuc' ri na jinta quichuk'ab» xcha'. E uwari'che ri'in lic quinqui'cot che echiri' na jinta nuchuk'ab, ma jela' e cac'oji' ruchuk'ab ri Cristo wuc'. 10Ruma c'u la', ruc' qui'cotemal canch'ij tak ri c'ax cape panuwi' ruma in re ri Cristo, tob na jinta nuchuk'ab, tob e c'o ri tzel quech'a't lo chwij, tob nucuyum niba'il, tob inya'om pa c'ax y pa bis; ma echiri' canna'o na jinta nuchuk'ab, e más canna' ruchuk'ab ri Cristo c'o wuc'.
11Xa uma c'u ralak xintac'aba' nuk'ij pacha' cu'an junok na jusuc' ta runa'oj, pero e ralak xinminow alak chupa. Ec'u ri lic usuc' e ralak ri cayacaw alak nuk'ij. Ma tob na jinta nuwach ri'in, pero wa' wa nimak e tako'n ri xa caqui'an nim che quib, rique na jinta más quiwach chinuwa ri'in. 12Echiri' xinchacun chixo'libal alak, xk'alajin chiwach alak in utako'n ri Cristo. Ma echiri' xinc'oji' uc' alak, na xincos ta che uc'utic chiwach alak tak ri c'utubal re ruchuk'ab ri Dios ruc' nimak tak milagros. 13¿Sa' nawi ri xinjaljob wi chiwach alak? ¿Na xin'an ta neba che alak pacha' ri xin'an chique ri nic'aj chic iglesias? Laj e ri xinjaljob wi ma na xinya ta alc'ayew che alak ruma na xintz'onoj ta wajil che alak. We e numac wa', cuyu alak numac.
Ri Pablo cuyijba' pan ri urox roponibal Corinto
14Tape alak: Ri'in nuyijbam chi wib cha' quinopon uc' alak churox laj. Y we xinoponic, na canya ta alc'ayew che alak, ma na jinta c'o cantz'onoj che alak. Ec'u ri cuaj che alak na e ta ri c'o uc' alak, ma e ri cac'ut alak ri rutzil c'u'x alak chwe. Xew c'u lic cuaj canto' alak pacha' cu'an juna achi cuc' ri ralc'o'al. Ma chique ri quichu-quikaw takal wi caquitzucuj ri cajawax chique ri ch'uti'k; na e ta ri ch'uti'k ri takal chique caquitzucuj ri cajawax chique ri quichu-quikaw. 15Ec'u ri'in ruc' ronoje nuc'u'x na xew ta canq'uis ronoje ri c'o wuc', ma canya ne wib che to'ic alak ruc' ri c'aslemal alak chwach ri Dios. Pero e canwil ri'in, echiri' más canc'ut ri c'axna'bal nuc'u'x che alak, e más cak'ob ri c'axna'bal c'u'x ralak chwe ri'in.
16Eta'am c'u alak na xinya ta alc'ayew che alak. Na ruc' ta c'u ri', e c'o ri caquibi'ij xinwesaj ne puak che alak xa xe'lak'ay. 17¿Su'chac cach'ob alak wa'? ¿C'o neba juna socoso'nel nutakom bi uc' alak? 18Ri'in xintz'onoj che ri Tito que'rila alak y xintak bi ri jun hermano ruc'. ¿Xu'an neba elek' ri Tito che alak? Rire junam wuc' ri'in xa jun kac'u'x che ri caka'ano.
19Hermanos, laj cach'ob alak e ronoje wa nubi'im lok xa re to'bal kib, pero na e ta ri'. Ma pakatzij wi chwach ri Dios y chupa rubi' ri Cristo kabi'im lo wa' re to'bal e alak, ri lic c'ax cakana' alak. 20Cubisoj nuc'u'x ma c'axtaj we xinopon uc' alak, na utz ta 'anom alak y jela' c'u ri' na cuc'ul ta nuc'u'x ri qui'nrika'. Yey we e ri', laj na cuc'ul ta c'u'x alak ri woponibal ma ri' yaj ri qui'n'ana'. Cubisoj c'u nuc'u'x ma c'axtaj c'o ch'a'oj chixo'libal alak, c'o ri c'ax quic'u'x chiquij jujun chic, c'o oyowal chiwach alak, jachom pa alak, c'o ri caquich'amij quib, c'o ri e aj molot, c'o ri caqui'an nim che quib yey e c'o ri e sok'osak e quiwach e tzucul ch'a'oj. 21Cubisoj c'u nuc'u'x ma c'axtaj we xinopon tanchi uc' alak, laj qui'nrika' e q'ui che alak c'a e c'o pa mac y na quitzelem ta quitzij chwach ri Dios; ma caqui'an tak ri ch'ulilaj mac, caquetz'abej uwa quik'ij cuc' jujun chic na quic'ulel taj y quiya'om quib che u'anic ronoje tak ri rayibal re ri quiti'jil. We xi'nrika c'u ri' wa', lic quinq'uix chwach ri Dios uma ralak y quebenuwok'ej c'u ri' ri quebanaw re wa'.
Currently Selected:
2 Corintios 12: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.